އިންޑިއާގެ ގައުމީ އެއާލައިން އެއާ އިންޑިއާ ޕްރައިވެޓައިޒް ކުރަން ހުޅުވާލި ބިޑު ޓާޓާ ކުންފުނިން ކާމިޔާބުކޮށްފި ކަމަށް އިންޑިއާ ސަރުކާރުން ހާމަކޮށްފި އެވެ.
ބޮޑު ގެއްލުމެއްގައި ހިންގަމުން އަންނަ މި އެއާލައިން ވިއްކާލަން އިންޑިއާ ސަރުކާރުން މަސައްކަތްކުރާތާ އަހަރުތަކެއް ވެއްޖެ އެވެ. މި އެއާލައިން ވިއްކާލަން 2018 ގައި ހުޅުވާލި ބިޑަށް އެއްވެސް ކުންފުންޏަކުން ކުރިމަތިލާފައެއް ނުވެ އެވެ.
ޓާޓާއިން އެއާ އިންޑިއާގެ ބިޑު ކާމިޔާބުކުރީ 2.4 ބިލިއަން ޑޮލަރު ހުށަހަޅައިގެންނެވެ. މި ބިޑުގައި އެއާ އިންޑިއާގެ ޖުމްލަ 8.2 ބިލިއަން ޑޮލަރުގެ ދަރަނީގެ ތެރެއިން ޓާޓާ ކުންފުނިން ޒިންމާވާ 1.9 ބިލިއަން ޑޮލަރު ވެސް ހިމެނެ އެވެ.
އެއާ އިންޑިއާ އެއްބަސްވުމުގެ ދަށުން އެ އެއާލައިނުގެ 121 އެއާކްރާފްޓާއި 25 ކުދި މަތިންދާބޯޓުތަކުގެ ފްލީޓް އެއްކޮށް ޓާޓާގެ ދަށަށް ބަދަލުވާނެ އެވެ. އަދި އެތެރޭގެ އުދުހުންތަކާއި، މެދުއިރުމައްޗާއި އިރުމަތީ އޭޝިއާގެ ބައެއް ގައުމުތަކަށް ދަތުރުކުރާ ބަޖެޓު އެއާލައިން އެއާ އިންޑިއާ އެކްސްޕްރެސް ހިންގުން ވެސް ޓާޓާއާ ހަވާލުވާނެ އެވެ.
މި އެއާލައިނުން ރާއްޖެއަށް ވެސް އިންޑިއާގެ ހަތަރު މަންޒިލަކުން ސީދާ ދަތުރުތައް ކުރެ އެވެ. އެއީ ޓްރިވެންޑްރަމް، ބެންގަލޯ، ދިއްލީ އަދި މިފަހުން ދަތުރުތައް ފެށި މުމްބާއީ އެވެ.
ޓާޓާއިން އުފެއްދި އެއާލައިން އަލުން އެ ކުންފުނީގެ ދަށަން
އެއާ އިންޑިއާއަކީ ޓާޓާ އެއާ މެއިލްގެ ނަމުގައި 1932 ވަނަ އަހަރު ޖޭއާރްޑީ ޓާޓާގެ މޭސްތިރިކަމުގެ ދަށުން އުފެއްދި އެއާލައިނެކެވެ.
އިންޑިއާގެ މަތިންދާބޯޓުގެ ސިނާއަތަށް އިންގިލާބީ ބަދަލެއް ގެނައި މި ކުންފުނި އިންޑިއާ ސަރުކާރުގެ ދަށަށް ގެނައި 1953 ވަނަ އަހަރު އޭރުގެ ބޮޑުވަޒީރު ޖަވާހަރްލާލް ނެހެރޫގެ ސަރުކާރުގެ ޕްރައިވެޓް އެއާލައިންތަކުގެ ނެޝަނަލައިޒޭޝަން އެޖެންޑާގެ ދަށުންނެވެ.
އެފަހަރު އެއާ އިންޑީއާގައި އޮތް ޓާޓާގެ ހިއްސާ ގަންނަން އިންޑިއާ ސަރުކާރުން ދެއްކީ އެންމެ 372,680 ޑޮލަރެވެ.
ޓާޓާއަށް ބިޑު ކާމިޔާބުވުމާ ގުޅިގެން ކުރި ޓްވީޓެއްގައި އެ ކުންފުނީގެ ޗެއާމަން ރަތަން ޓާޓާ ވަނީ އެއާ އިންޑިއާގެ އެނބުރި އައުމަށް މަރުހަބާ ވިދާޅުވެފަ އެވެ. އަދި ބުރަ މަސައްކަތެއް ނަމަވެސް، މިއީ އޭވިއޭޝަން ސިނާއަތުގައި ޓާޓާގެ ވިޔަފާރި ފުޅާކުރަން ފަހި ފުރުސަތެއް ކަމަށް އޭނާ ފާހަގަކުރެއްވި އެވެ.
އިންޑިއާގެ އެންމެ ދުވަސްވީ ކުންފުނި ޓާޓާގެ ހިއްސާ މިހާރު ވެސް ދެ އެއާލައިނެއްގައި އޮވެ އެވެ. އެއީ ސިންގަޕޯ އެއާލައިންސްއާ ގުޅިގެން އެ ކުންފުނިން ހިންގާ ވިސްތާރާ އާއި މެލޭޝިއާގެ އެއާ އޭޝިއާ ގްރޫޕާ ގުޅިގެން ހިންގާ ބަޖެޓު އެއާލައިން އެއާ އޭޝިއާ އިންޑިއާ އެވެ.
