ރ. ކިނޮޅަސް ބަނދަރުގެ ނެރުމައްޗާ ދިމާލުން ވަރަށް ބޮޑަށް ވެލި އަރައި، ރަށަށް އަރައިފޭބުމަށް ހުރަސް އެޅޭ މައްސަލަ ހައްލު ކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީގެ ފަރާތުން އާދީއްތަ ދުވަހު އެ ރަށަށް ފުރާ ގޮތަށް ހަމަޖެހިއްޖެ އެވެ.
ރަށް ވަށައިގެން އެނބުރޭ ބޮޑު ދޮންވެލިގަނޑެއް ކޮންމެ ހުޅަނދު މޫސުމެއްގައި ރަށު ބަނދަރަށް ވަދެ، އެކަމުގެ ސަބަބުން އޮޑިދޯނިފަހަރަށް ލަފައި، ނުފުރޭތީ ކިނަޅޮހު ރައްޔިތުން ވަނީ ބުދަ ދުވަހު އިޖްތިޖާޖެއްކޮށް ސަރުކާރަށް އަޑު އިއްވައިފަ އެވެ.
އެއާއެކު ޕްލޭނިން މިނިސްޓްރީގެ ފަރާތުން ސޯޝަލް މީޑިޔާގައި ނެރުނު ކުރު ބަޔާނެއްގައި ބުނީ "މި ވަގުތު ބަނދަރަށް ވަދެ ނުކުތުމަށް ދިމާވެފައި އޮތް މައްސަލަ ހައްލުކުރުމަށް" ސަރުކާރު ކުންފުނި އެމްޓީސީސީ އަންނަ އާދީއްތަ ދުވަހު ކިނޮޅަހަށް ދާނެ ކަމަށެވެ.
ކިނޮޅަސް ބަނދަރު މަތިން ފެންނަ ގޮތް: ކޮންމެ ހުޅަނގު މޫސުމެއްގައި މިހެން ދިމާވާ ކަމަށް ރަށު މީހުން ބުނޭ -- ފޮޓޯ: ރަށު ކައުންސިލް
ޕްލޭނިން މިނިސްޓްރީން ބުނެފައި ވަނީ ކިނޮޅަހު ބަނދަރުގެ މަސައްކަތް ކުރުމަށް ބިޑަށް ހުޅުވާލުމުން ކުރިމަތިލި އެއްވެސް ފަރާތަކަށް ބީލަން ކާމިޔާބު ނުކުރެވުނު ކަމަށެވެ. އެހެންކަމުން ޑައިރެކްޓް އެވޯޑްގެ އުސޫލުގެ ދަށުން ބިޑަށް ހުޅުވާލުމެއް ނެތި އެ މަސައްކަތް އެމްޓީސީސީއާ ހަވާލު ކުރުމަށް މަސައްކަތް ކުރަމުންދާ ކަމަށް ވެސް އެ މިނިސްޓްރީން ބުނެފައިވެ އެވެ.
އޭގެ އިތުރުން އެ ބަޔާނުގައި ބުނެފައި ވަނީ ކިނޮޅަސް ބަނދަރު ހެދުމަށް އެންމެ ފުރަތަމަ ހުޅުވާލީ މިއަހަރުގެ މާޗު މަހުގެ ތެރޭގައި ކަމަށެވެ. ނަމަވެސް ރަށު ކައުންސިލުން ޑިޒައިނަށް ބަދަލު ގެންނަން ބޭނުންވާތީ އެފަހަރު މަސައްކަތް ލަސްވީ ކަމަށް މިނިސްޓްރީން ބުނެ އެވެ.
ޕްލޭނިން މިނިސްޓްރީގެ ފަރާތުން 2008 ވަނަ އަހަރު އެ ރަށުގައި އެޅި ބަނދަރަށް އަހަރެއް ނުވަނީސް ވެލި ވަންނަން ފަށައިފި ކަމަށް ކިނޮޅަހު މީހުން ބުނެ އެވެ. އަދި އެކަން ހައްލުކޮށްދޭން ސަރުކާރުގައި އެދޭތާ 13 އަހަރުވެއްޖެ ކަމަށް ވެސް އެމީހުން ބުނެ އެވެ.
"މިކަމުގެ ސަބަބުން ސަރުކާރުގެ ޕްރޮޖެކްޓްތަކަށް ތަކެތި ގެނެވޭނެ ގޮތެއް ވެސް ނެތް. މުދާ ގެންނަ ބޯޓުފަހަރާއި އަތޮޅު ފެރީ ވެސް ރަށަށް މިހާރު ކައިރި ނުކުރެވޭ. ފެރީއަށް ދާން ރަށުން ޑިންގީއެއްގަ ދަނީ ފައިނަށް،" ކިނޮޅަސް ކައުންސިލް މެމްބަރު ވާފިރު އަހުމަދު ވިދާޅުވި އެވެ.
