މިއަހަރުގެ ސެޕްޓެމްބަރުގެ ނިޔަލަށް ޖުމްލަ 870،862 ފަތުރުވެރިން ދިވެހިރާއްޖެއަށް އައިސްފައިވާއިރު އެންމެ ގިނައިން ޒިޔާރަތްކޮށްފައި ވަނީ އަވައްޓެރި އިންޑިއާގެ ރައްޔިތުން ކަމަށް ޓުއަރިޒަމް މިނިސްޓްރީގެ ހިސާބުތަކުން ދައްކައިފި އެވެ.
މިނިސްޓްރީގެ ހިސާބުތަކުން ދައްކާ ގޮތުގައި އެންމެ ގިނައީ އިންޑިއާގެ ފަތުރުވެރިން ނަމަވެސް އެއް މަންޒިލަކުން އެންމެ ގިނަ މީހުން ރާއްޖެ އައީ ރަޝިއާ އިންނެވެ.
މިދިޔަ ސެޕްޓެމްބަރު މަހުގެ ނިޔަލަށް އިންޑިއާގެ 200،449 މީހުން ރާއްޖެ އައިސްފައިވާއިރު އެއީ ޖުމްލަ އައި ފަތުރުވެރިންގެ 23 ޕަސެންޓެވެ. ދެ ވަނައަށް އެންމެ ގިނައިން ރާއްޖެއަށް އައީ ރަޝިއާ މީހުންނެވެ. އެ ގައުމުގެ 171،308 ފަތުރުވެރިއަކު ރާއްޖެ އައިސްފައިވެ އެވެ.
ދެން އެންމެ ގިނައިން ރާއްޖެއަށް އައިސްފައި ވަނީ ޖަރުމަނާއި އެމެރިކާ އާއި ސައުދީ އަރަބިއްޔާގެ ރައްޔިތުންނެވެ.
އެއް މަންޒިލަކުން އެންމެ ގިނައިން ރާއްޖެ އަށް މީހުން އައި ރަޝިއާ އިން 162،236 ފަތުރުވެރިއަކު ރާއްޖެ އައިސްފައިވެ އެވެ. އަދި މި ލިސްޓުގެ ދެ ވަނަ އަށް އައި އިންޑިއާ އިން 161،963 މީހަކު ރާއްޖެ އައިސްފައިވެ އެވެ.
އޭގެ އިތުރުން އެންމެ ގިނައިން ފަތުރުވެރިން އައިސްފައި ވަނީ ޖަރުމަނާއި ޔޫއޭއީ އާއި ސައުދި އަރަބިއްޔާއިންނެވެ.
ރާއްޖޭގައި ފަތުރުވެރިން އެވްރެޖުކޮށް ނުވައެއް ނުވަތަ 10 ދުވަސް ހޭދަކުރާ އިރު، އަހަރު ނިމެންވާ އިރަށް ކަނޑައަޅާފައިވާ އަމާޒަށް ރާއްޖެ އަށް ފަތުރުވެރިން އަންނާނެ ކަމުގެ ޔަގީންކަން ސިނާއަތުގެ ހިއްސާދާރުން ދެ އެވެ.
މިއަހަރު ސަރުކާރުން އަމާޒުހިފާފައި ވަނީ އެއް މިލިއަން ފަތުރުވެރިން ރާއްޖެ ގެނައުމަށެވެ.
