ރ. ކިނޮޅަހުގެ ބަނދަރަށް ވެލި އަރައި، ރަށުން އަރައިފައިބަން ބޮޑު ގޮންޖެހުމަކަށްވެފައިވާ މައްސަލަ ސަރުކާރުން ހައްލުނުކޮށްދީގެން އެ ރަށު ރައްޔިތުން އިއްޔެ މުޒާހަރާއެއް ކޮށްފި އެވެ.
ކިނަޅޮހުގައި 2008 ވަނަ އަހަރު ސަރުކާރުން އެޅި ބަނދަރަށް ވެލި ވަންނަ މައްސަލަ ހައްލުކޮށްދޭން އެދޭތާ 12 އަހަރުވެއްޖެ ކަމަށް ރަށު ކައުންސިލް މެމްބަރު ވާފިރު އަހުމަދު މި ނޫހާ ވާހަކަ ދައްކަވަމުން ވިދާޅުވި އެވެ. މުޒާހަރާ ކުރީ ރައްޔިތުންގެ ޝުއޫރުތައް އަދިވެސް އެއްފަހަރު ސަރުކާރަށް އިއްވުމަށް ކަމަށް އޭނާ ވިދާޅުވި އެވެ.
"މިކަމުގެ ސަބަބުން ސަރުކާރުގެ ޕްރޮޖެކްޓްތަކަށް ތަކެތި ގެނެވޭނެ ގޮތެއްވެސް ނެތް. މުދާ ގެންނަ ބޯޓުފަހަރާއި އަތޮޅު ފެރީ ވެސް އެރަށަށް މިހާރު ކައިރި ނުކުރެވޭ. ފެރީއަށް ދާން ރަށުން ޑިންގީއެއްގަ ދަނީ ފައިނަށް،" ވާފިރު ވިދާޅުވި އެވެ.
ކިނޮޅަހު ރައްޔިތުން އިހްތިޖާޖު ކުރަނީ: މައްސަލަ ހައްލުކޮށްދޭން އެދޭތާ 12 އަހަރުވެއްޖެ -- ފޮޓޯ: ރަށު ކައުންސިލް
ވާފިރު ވިދާޅުވީ ބަނދަރަށް ދިމާވެފައިވާ މައްސަލައިގެ ސަބަބުން ރައްޔިތުން ތިބެން ޖެހިފައި ވަނީ ރަށު ބަންދެއްގައި ކަމަށެވެ.
ބަނދަރު މައްސަލައިގައި އިއްޔެ ހަވީރު ކުރި އެ އިހުތިޖާޖުގައި ކިނޮޅުގެ ގިނަ އަދަދެއްގެ ރައްޔިތުން ބައިވެރިވި އެވެ. ކައުންސިލުން ބުނީ އިއްޔެ ކުރި އެ އިހުތިޖާޖުގެ ބޭނުމަކީ އެރަށުގެ ރައްޔިތުންނަށް ދިމާވެފައިވާ ދަތިތައް ސަރުކާރުގެ ކަމާބެހޭ އިދާރާތަކުގެ ސަމާލު ކަމަށް ގެނައުން ކަމަށެވެ. އަދި އެއީ ރައްޔިތުން އިންތިޒާމު ކުރި މުޒާހަރާއެއް ކަމަށް ވެސް ކައުންސިލުން ބުންޏެވެ.
ކިނަޅޮހު މީހުން ބުނާ ގޮތުގައި ބަނދަރަށް އަރާ ވެލިގަނޑަކީ ރަށް ވަށައިގެން މޫސުމީ ގޮތުން އެނބުރޭ ވެލިގަނޑެކެވެ. ޕްލޭނިން މިނިސްޓްރީގެ ފަރާތުން ބަނދަރު ހެދިއިރު، އެ ވެލިގަނޑު އޮތީ ބަނދަރު ހެދުމަށް ހަމަޖެހިފައިވާ އޮތް ސަރަހައްދުގައި ކަމަށް ރަށު މީހުން ބުނެ އެވެ. އެހެންވެ ބަނދަރުގެ މަސައްކަތް ކުރުމަށްޓަކައި މި ވެލިގަނޑުން ބައެއް ނެގުމަށްފަހު، ބަނދަރާއި ވެލިގަނޑުގެ ބާކީ އޮތް ބައި ވަކި ކުރުމަށް ހިލަ ޖެހީ އެވެ.
އެކަމަކު އެ ބަނދަރާއި ވެލިގަނޑު ވަކި ކުރުމަށް ޖެހި ފާރު އޭގެ އަހަރެއްހާ ދުވަސް ފަހުން ހަލާކުވެ، ކޮންމެ ހުޅަނގު މޫސުމެއްގައި ބަނދަރަށް ވަރަށް ބޮޑަށް ވެލި އަރައި، ބޭނުން ނުކުރެވޭވަރުވާ ކަމަށް ކިނޮޅަހު މީހުން ބުނެ އެވެ.
