ސިޔާސީ ޕާޓީތަކުގެ ލީޑާޝިޕް ބަދަލުނުވާ މައްސަލައަކީ ހައްލުކުރަން ޖެހޭ މައްސަލައެއް ކަމަށް މޯލްޑިވްސް ރިފޯމް މޫވްމަންޓު (އެމްއާރްއެމް)ގެ ރައީސް ފާރިސް މައުމޫން މިއަދު ވިދާޅުވެއްޖެ އެވެ.
އެމްއާރްއެމްގެ އިންތިހާބީ ލީޑާޝިޕުން ބޭއްވި ފުރަތަމަ ނޫސްވެރިންގެ ބައްދަލުވުމުގައި ފާރިސް މިހެން ވިދާޅުވީ އެއް އާއިލާއެއްގެ ގިނަ ބަޔަކު ޕާޓީއެއްގެ ލީޑާޝިޕުން ފެންނަނީ ކީއްވެގެންތޯ އާއި ލީޑާޝިޕުން އެހެން މީހުންނަށް އޮތީ ކޮން ފުރުސަތުތަކެއްތޯ ނޫސްވެރިޔަކު ކުރި ސުވާލަކާ ގުޅިގެންނެވެ.
އެގޮތުން ފާރިސް ވިދާޅުވީ، އޭނާ އާއި ރާއްޖޭގެ ރައީސްކަން ގިނަ ދުވަސްތަކެއް ވަންދެން ކުރެއްވި ކުރީގެ ރައީސް މައުމޫން އަބްދުލް ގައްޔޫމް ޕާޓީގެ ލީޑާޝިޕުން ފެނުނު ނަމަވެސް އެއް އާއިލާއަކަށް ނިސްބަތްވާ ގިނަ ބަޔަކު އެ ޕާޓީގެ ލީޑާޝިޕުގައި ނުތިބޭނެ ކަމަށެވެ. އަދި މިހާރު އެ ޕާޓީގެ ލީޑާޝިޕަށް ބަލާލިޔަސް ގިނަ ބަޔަކަށް ފުރުސަތު އޮތްކަން ފެންނާނެ ކަމަށް އޭނާ ވިދާޅުވި އެވެ.
"އައްޔަނުވެގެން މި އައި އެކްސްކޯ ތެރޭގައި ވަކި އާއިލާއަކަށް ނިސްބަތްވާ ގިނަ ބަޔަކު ނުތިބޭނެ... އަޅުގަނޑުމެންގެ ތެރޭގައި ވަކި އާއިލާއަކަށް ނިސްބަތްވާ ގިނަ ބަޔަކު މިވަގުތަކު ވެސް ނެތް," ފާރިސް ވިދާޅުވި އެވެ.
ޕާޓީގެ ލީޑާޝިޕް ބަދަލުނުވާ މައްސަލައިގައި ފާރިސް ވިދާޅުވީ، ޑިމޮކްރެޓިކް ނިޒާމުގެ ތެރެއިން ޕާޓީގެ ލީޑާޝިޕް ބަދަލުކުރުމަކީ އެންމެން ވެސް ދަސްކުރަން ޖެހޭ ކަމެއް ކަމަށެވެ. އަދި ކުރިން އޭނާ މަސައްކަތް ކުރި ސިޔާސީ ޕާޓީތަކާއި އެހެން ސިޔާސީ ޕާޓީތަކުގެ ވެސް ލީޑާޝިޕް ބަދަލުނުވާ މައްސަލަ ހުރި ކަމަށް އޭނާ ވިދާޅުވި އެވެ.
"ވަކި ޕާޓީއެއް ވަކި ބަޔެއް ދަންނަވާކަށް ބޭނުމެއް ނުވޭ. އެހެންނަމަވެސް ހުރިހާ ޕާޓީތަކަށް. އަޅުގަނޑުވެސް ކުރިން މަސައްކަތް ކޮށްފައި ހުރި ޕާޓީތަކުގައި އައިސް އެބަޖެހޭ ސީލިންއެއްގައި. ލީޑާޝިޕް ބަދަލުނުވާ މައްސަލައަކީ އޮންނަ މައްސަލައެއް. ހައްލުކުރަން ޖެހޭ މައްސަލައެއް." ފާރިސް ވިދާޅުވި އެވެ.
ލީޑާޝިޕަށް އައުމުގައި ނުފޫޒެއް ނޯންނާނެ: ފާރިސް
އެމްއާރްއެމްގެ ރައީސްގެ މަގާމަށް ފާރިސް އިންތިހާބުވީ އިތުރު މީހަކު އެ މަގާމަށް ކުރިމަތިނުލާތީ އޮޓަމެޓިކުންނެވެ. އެކަމާ ގުޅިގެން އެމްއާރްއެމްއާ އިދިކޮޅު ގިނަ ބަޔަކު ވަނީ އެއީ އާއިލީ ނުފޫޒު (ނެޕޮޓިޒަމް)ގެ ތެރެއިން ފާރިސްއަށް ލިބުނު މަގާމެއް ކަމަށް ތުހުމަތުކޮށް ފާޑުކިޔާފަ އެވެ.
އެ ފާޑުކިޔުންތަކާ ގުޅިގެން ފާރިސް ވިދާޅުވީ، އިންތިހާބީ މަގާމަކަށް އެ އޮންނަ އަދަދަށް ވުރެ ގިނަ މީހުން ކުރިމަތި ނުލަންޏާ އޮންނަ ގޮތަކީ ޝަރުތު ހަމަވާ ނަމަ ވޯޓަކަށް ނުގޮސް އެ މީހުން އެ މަގާމުތަކަށް އިންތިހާބުކުރުން ކަމަށެވެ. އަދި އެއީ ޑިމޮކްރެސީ ދަންނަ ހަމައެއް ކަމަށް އޭނާ ވިދާޅުވި އެވެ.
އެހެން ނަމަވެސް، މުސްތަގުބަލުގައި މިއަށް ވުރެ ވާދަވެރިކޮށް އިންތިހާބުތައް ކުރިޔަށް ދާނެ ކަމުގެ އުއްމީދު އެބައޮތް ކަމަށް ފާރިސް ވިދާޅުވި އެވެ. އަދި އެކަން ބަހާއި އަމަލުން ދައްކަން އެ ޕާޓީ އޮތީ ތައްޔާރަށް ކަމަށް ވިދާޅުވި އެވެ.
އޭގެ އިތުރުން އެ ޕާޓީގެ ޒައީމުގެ މަގާމުގައި ހުންނެވި ރާއްޖޭގެ ރައީސްކަން 30 އަހަރު ކުރެއްވި ކުރީގެ ރައީސް މައުމޫން އަބްދުލް ގައްޔޫމު ޕާޓީ ހިންގެވުމުގައި ނޫޅުއްވާނެ ކަން ފާރިސް ހާމަކުރެއްވި އެވެ. އަދި ވިދާޅުވީ އެ މަނިކުފާނުގެ ލަފާ ހޯދާނީ ޕާޓީގެ ލީޑާޝިޕުން ބޭނުންވީމަަ ކަމަށެވެ.
"އަޅުގަނޑުމެން މަގުން ކައްސާލައިގެން ދާ ހިނދެއްގައި ނޫނިއްޔާ ވަކި ކަމެއްގައި ލަފަޔެއް ދެއްވަން ބޭނުންފުޅު ވަގުތެއްގައި ޒައީމް އެކަން ކުރައްވާނެ." ފާރިސް ވިދާޅުވި އެވެ.
