ރައްޔިތުންގެ މަޖިލީހުގެ އިންތިހާބުގައި ވާދަކުރާ ފިރިހެނުންގެ ހައްގު ގެއްލޭ ގޮތަށް ނަަމަވެސް، މަޖިލީހަށް އަންހެން މެންބަރުން އިތުރުވާނެ ގޮތެއް ހޯދަން ޖެހޭ ކަމަށް މޯލްޑިވްސް ރިފޯމް މޫވްމަންޓުގެ ލީޑަރު އަހުމަދު ފާރިސް މައުމޫނު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ސިޔާސީ ޕާޓީތަކުގެ މަންދޫބުންނާ އެކު މިއަދު ބޭއްވި ބައްދަލުވުމުގައި އެމްއާރްއެމްގެ ފަރާތުން ވާހަކަ ދައްކަވަމުން ފާރިސް ވިދާޅުވީ މަޖިލީހުގައި އަންހެން މެންބަރުން އިތުރުވެއްޖެއްޔާ މާ ރަނގަޅަށް ކަންތައްތައް ނިންމޭނެ ކަމަށެވެ. ސިޔާސީ ގޮތުން އެދެވޭ ހިސާބަކަށް ދިޔު މުގައި އަންހެނުންނަށް ހުރަސްތަކެއް ހުރިކަމަށް ގަބޫލުކުރަން ޖެހޭ ކަމަށް ވެސް އޭނާ ވިދާޅުވި އެވެ.
"މި ބެރިއާތަކަކީ އަޅުގަނޑުމެންގެ ތާރީހާ އަޅުގަނޑުމެންގެ ސަގާފަތާ އެހެނިހެން ކަންކަމާ ގުޅިފައި ހުރި ކަންތައްތައް. މިކަންކަން ނައްތައިލުމަކީ އިތުރު އަމަލީ މަސައްކަތުން ކުރެވޭނެ ކަމެއް. އެހެންވީމާ އޭގެ މާނައަކީ އަޅުގަނޑުމެން އެބަ، އެހެން ގޮތަކުން ނަމަވެސް އެކަންތައްތައް ކުރިއަރުވަން މަސައްކަތްކުރަން ޖެހޭ. ހަގީގަތުގައި ކުރިމަތިލާ ފިރިހެން ބޭފުޅެއްގެ ހައްގު ގެއްލުނު ނަމަވެސް މުޅި ދައުލަތުގެ ހައްގުގައި އަދި އަންހެނުންގެ ރެޕްރެޒެންޓޭޝަން ކަށަވަރުކުރުމަށް ޓަކައި އެއް ހައްގެއް އުނިވީ ކަމަށް ވިޔަސް މިކަން ކުރަން ޖެހޭ،" ފާރިސް ވިދާޅުވި އެވެ.
އޭނާ ވިދާޅުވި ގޮތުގައި އެއީ އެހެން ގައުމުތަކުގެ ތާރީހުން ވެސް ފެންނަން އޮތް ކަމެއް ކަމަށާއި ރާއްޖޭގައި ވެސް ކޮށްފައިވާ ކަމެއް ކަމެކެވެ.
މަޖިލީހުން އަންހެނުން ފެންނަން ފެށުމުން މީހުންނަށް އެކަން ރަނގަޅުވާން ފަށާނެ ކަމަަށާއި އޭރުން އަންހެން މެންބަރުން އިތުރުވާނެ ކަމަށް ވެސް އޭނާ ވިދާޅުވި އެވެ.
އަންހެން މެންބަރުން އިތުރުކުރުމަށް ޓަކައި ވަގުތީ ގޮތުން އަޅާ ފިޔަވަޅެއްގެ ގޮތުގައި ކޯޓާއެއް ކަނޑައަޅަން އޭނާ ތަމްސީލުކުރައްވާ އެމްއާރްއެމް އިން ތާއީދުކުރައްވާ ކަމަށް ވެސް ފާރިސް ވިދާޅުވި އެވެ.
