"އިހްލާސްތެރި މޯލްޑިވްސް ޕާޓީ"ގެ ނަމުގައި ސިޔާސީ ޕާޓީއެއް އުފައްދަން އިލެކްޝަން ކޮމިޝަނުން ދިން ހުއްދަ ބާތިލްކުރުމަށް، އިސްވެ އެދުމުން، އިލެކްޝަން ކޮމިޝަނުން މިއަދު އެ ބާތިލްކޮށްފި އެވެ.
އެންމެ ފުރަތަމަ މި ޕާޓީ އުފައްދަން ހުށަހެޅީ "ކަރިޝްމާ ޕާޓީ މޯލްޑިވްސް" ގެ ނަމުގަ އެވެ. ނަމަވެސް, އެއީ ދިވެހިވަންތަ ޕާޓީއަކަށް ނުވާތީ ހުއްދަ ނުދިނުމުން އިހްލާސްތެރި މޯލްޑިވްސްގެ ނަމުގައި އަލުން ހުށަހެޅީ އެވެ.
"އިހްލާސްތެރި މޯލްޑިވްސް ޕާޓީ" އުފައްދަން މ. ކެލަން, މުހައްމަދު އިސްމާއިލްއަށް ހުއްދަ ދީފައި ވަނީ މީގެ ދެތިން ދުވަސް ކުރިންނެވެ. އެހެންނަމަވެސް, އެ ހުއްދަ ބާތިލް ކުރުމަށް އޭނާގެ ފަރާތުން މިއަދު އިލެކްޝަނަށް ހުށަހަޅާފައިވާ ކަމަށް އެ ކޮމިޝަންގެ ރައީސް ފުއާދު ތައުފީގު މި ނޫހަށް ވިދާޅުވި އެވެ.
ފުއާދު ވިދާޅުވީ އިހްލާސްތެރި ޕާޓީ އުފައްދަން ދިން ހުއްދަ ބާތިލް ކުރަން ހުއްދަ ދޫކުރި ފަރާތުން އެދިފައި ވަނީ އެ ޕާޓީން މީޑިއާއަކަށް ދިން އިންޓަވިއުއެއްގައި ދައްކާފައިވާ ބައެއް ވާހަކަތަކާ ގުޅިގެން ސަރުކާރުގެ އެކި މުއަސަސާތަކުންނާއި، އާންމު ފަރާތްތަކުން ކަންބޮޑުވުން ހިއްސާކޮށްފައިވަނިކޮށް ކަމަށެވެ. އެ ޝަކުވާތައް ކޮމިޝަނަށް ހުށަހެޅި، އެކަން ދިރާސާ ކުރަމުން ގެންދެވިކަން ފުއާދު ފާހަގަ ކުރެއްވި އެވެ.
އޮންލައިން މީޑިޔާއަކަށް ދިން އިންޓަވިއުއެއްގައި އެ ޕާޓީގެ އިސް މުއައްސިސް މުހައްމަދު އިސްމާއިލް ބުނެފައިވަނީ އިހްލާސްތެރި ޕާޓީއަކީ ދިވެހި ރައްޔިތުންގެ ސްޓްރެސް ފިލުވާލަދިނުމަށް އުފައްދާ ޕާޓީއެއް ކަމަށެވެ. އަދި އެ ޕާޓީގެ ސިޔާސަތުގައި ފަށްކަނޑާ ސެންޓަރެއް ހެދުމާއި ކައިވެނިކުރާނެ މީހުން ހޯދައިދިނުން ހިމެނޭ ކަމަށެވެ.
ރާއްޖޭގެ މައި ޕާޓީތަކަކީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޕީޕަލްސް ނޭޝަނަލް އެލަޔަންސް (ޕީއެންސީ) އާއި ޖުމްހޫރީ ޕާޓީ އާއި އަދާލަތު ޕާޓީ އަދި މޯލްޑިވްސް ރިފޯމް މޫވްމަންޓް (އެމްއާރްއެމް) އެވެ.
އޭގެ ކުރިން ދިވެހި ރައްޔިތުންގެ ޕާޓީ (ޑީއާރްޕީ) އާއި އިސްލާމިކް ޑިމޮކްރަޓިޕް ޕާޓީ (އައިޑީޕީ) އާއި މޯލްޑިވްސް ސޯޝަލް ލިބަރަލް ޕާޓީ (އެސްއެލްޕީ) އާއި ޕީޕަލްސް އެލަޔަންސް (ޕީއޭ) ފަގީރުކަންނައްތާލާ ޕާޓީ ވެސް ހިންގި އެވެ.
ރާއްޖެ އަށް ރަސްމީކޮށް ޕާޓީ ނިޒާމު އައުމުގެ ކުރިން, 1940ގެ އަހަރުތަކުގެ ފަހުކޮޅު ރައްޔިތުންގެ މުތަގައްދިމް ޕާޓީގެ ނަމުގައި ޕާޓީއެއް ހިންގި އެވެ.
