ފަނޑު މެނޭޖުކުރުމަށާއި އިންވެސްޓްމަންޓުތަކާ ގުޅިގެން ލަފާއަރުވަން އުފެއްދި ރާއްޖޭގެ ފުރަތަމަ އަމިއްލަ އިންވެސްޓްމަންޓް ކުންފުނި، ފަސްޓް ނޭޝަނަލް ފިނޭންސް ކޯޕަރޭޝަން (ފަސްޓް ނެޝަނަލް)އަށް ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ)ގެ ލައިސެންސިން އިއްޔެ ލިބިއްޖެ އެވެ.
ފަސްޓް ނެޝަނަލްއަކީ ކުރީގެ އޮޑިޓާ ޖެނެރަލް ހަސަން ޒިޔަތު އާއި ރާއްޖޭގެ މާލީ ދާއިރާގެ ފުންނާބު އުސް ބޭފުޅުންތަކެއް ގުޅިގެން އުފެއްދި ކުންފުންޏެކެވެ. މި ކުންފުންޏަށް ސީއެމްޑީއޭއިން ވަނީ އިންވެސްޓްމަންޓް އެޑްވައިޒާ އަދި ސެކުއިރިޓީސް ޑީލާ ލައިސެންސިން ދީފަ އެވެ.
ފަސްޓް ނެޝަނަލްގެ މަސައްކަތްތައް ރަސްމީކޮށް ފަށަން ލައިސެންސިން ލިބުމާ ގުޅިގެން އެ ކުންފުނީގެ ސީއީއޯ ޒިޔަތު ވިދާޅުވީ، މިއާ ގުޅިގެން ކެޕިޓަލް ބާޒާރުން އިންވެސްޓްމަންޓްތަކާއި ފައިނޭންސިން ހޯދަން ލަފާއެރުވުމާ މެނޭޖުކުރުމުގެ ހިދުމަތްތައް އެ ވިޔަފާރިން ލިބޭނެ ކަމަށެވެ.
މި ކުންފުނީގެ ކްލަޔަންޓުންނަށް ފޯރުކޮށްދޭން ނިންމާފައިވާ ހިދުމަތްތަކުގެ ތެރޭގައި ފަންޑު މެނޭޖުކުރުމާއި ލަފާއެރުވުމާއި، އިންވެސްޓްމަންޓް ހޯދުމާއި، އަމިއްލަ މުދަލާއި ފައިސާގެ (ވެލްތު) ޕްލޭނިން ހިދުމަތްތައް ހިމެނެ އެވެ. ވެލްތު ޕްލޭނިން ހިދުމަތުގެ ތެރޭގައި ފައިސާ އިތުރުކުރަން އިންވެސްޓް ކުރަން ލަފާއެރުވުން ވެސް ހިމެނެ އެވެ.
ފަސްޓް ނެޝަނަލްއިން ފޯރުކޮށްދޭ ހިދުމަތްތައް
- އިންވެސްޓްމަންޓް އެޑްވައިޒަރީ
- ވެލްތު ޕްލޭނިން
- ދަރުމަވެރި މަސައްކަތަށް އަމިއްލަ ޖަމިއްޔާ ހެދުން
- ވަޒީފާދޭ ފަރާތްތަކާ ގުޅިގެން މުވައްޒަފުންގެ ސޭވިންސް ޕްލޭން ފަރުމާކުރުން
ފަސްޓް ނެޝަނަލް އިން ބުނީ އެ ވިޔަފާރީގެ އިންވެސްޓްމަންޓް ސޮލިއުޝަންސް ބޭނުންކޮށްގެން ފައިސާ ރައްކާ ކުރާ މީހުންނަށް އޭގެން ލިބޭ މަންފާ އިތުރުވޭނެ ކަމަށެވެ. އަދި ބޭންކުގައި ފައިސާ ރައްކާކުރުމުގެ ބަދަލުގައި ހިއްސާ އާއި ބޮންޑް އަދި ޓްރެޝަރީ ބިލުތަކަށާއި، އަމިއްލަ ކުންފުނިތަކުގެ ހިއްސާއަށް ވެސް އިންވެސްޓް ކުރަން ފުރުސަތުތައް ލިބޭނެ ކަމަށް ބުންޏެވެ.
އެގޮތުން ޒިޔަތު ވިދާޅުވީ، ފަސްޓް ނެޝަނަލްއިން މީހުންނަށް އިންވެސްޓްމަންޓް ލަފާއަރުވާނީ އެ މީހަކު ހާސިލުކުރަން ބޭނުންވާ ލަނޑުދަނޑިތަކާއި، އާއިލާ އާއި، ޓެކުހާއި ގުޅޭ ކަންކަމަށް ބިނާކޮށެވެ. މީގެ ސަބަބުން އިންވެސްޓަރުންނަށް ބޭނުންވާ މައުލޫމާތު ލިބިގެން ގޮތް ނިންމަން މަގުފަހި ވާނޭ ކަމަށް އޭނާ ވިދާޅުވި އެވެ.
އޭގެ އިތުރުން އެ ވިޔަފާރިން ފޯރުކޮށްދޭ ވެލްތް ޕްލޭނިން ހިދުމަތަކީ ވެސް ރާއްޖެއަށް ކޮންމެހެން ބޭނުންޖެހިފައި އޮތް ހިދުމަތެއް ކަމަށް ޒިޔަތު ވިދާޅުވި އެވެ.
އެގޮތުން ފަސްޓް ނެޝަނަލް އިން ހިދުމަތް ދެނީ އެ މީހެއްގެ ވަޒީފާ އާއި އާއިލީ ހާލަތަށް ބަލައި ވަށާޖެހޭ ފަދަ ގޮތަކަށް ކަމަށް އޭނާ ވިދާޅުވި އެވެ.
ޒިޔަތު ވިދާޅުވި ގޮތުގައި މި ހިދުމަތުގެ މައިގަނޑު ބޭނުމަކީ މުދަލާއި ފައިސާއަށް ގެއްލުން ނުވާނެ ފަދަ ގޮތަކަށް ދިރިއުޅުމުގެ ހަރަދުތައް ބައްޓަންކޮށް، އަނެއް ޖީލާ ހަމަޔަށް ރައްކާތެރިކަމާއެކު ތަނަވަސްކަން ގެންދެވޭނެ މަގުފަހިކުރުމެވެ.
