އޮޑިޓަ ޖެނެރަލްގެ މަގާމަށް ކުރިމަތިލާން ރައީސް އޮފީހުން މިއަދު ހުޅުވާލައިފި އެވެ.
ރައީސް އޮފީހުން ބުނި ގޮތުގައި މި މަގާމަށް ކުރިމަތިލުމުގެ ފޯމު ބަލައިގަތުމަށް ހަމަޖެހިފައި ވަނީ ޖޫން 7 އަދި 8 ވަނަ ދުވަހުގެ ހެނދުނު 10 އިން މެންދުރު 12:30 އަށެވެ.
އޮޑިޓަ ޖެނެރަލަކަށް އެންމެ ފަހުން ހުންނެވީ ހަސަން ޒިޔަތެވެ. އޭނާ މަގާމުން އިސްތިއުފާ ދެއްވީ އެމްއެމްޕީއާރުސީގެ ހިޔާނާތުން މަންފާވި ލިސްޓުގައި ނަން އޮތް ކަން އެނގިވަޑައިގަތުމުންނެވެ.
ތަހުގީގީ އިދާރާތަކުން އެ ލިސްޓު ހޯދައިގެން އާއްމުކުރީ ރައްޔިތުންގެ މަޖިލީހުންނެވެ. ޒިޔަތު ވިދާޅުވެފައި ވަނީ، އޭނާގެ ނަން ލިސްޓުގައި ހިމަނާފައި ވަނީ ސުވާލުކުރުމެއް ނެތި ކަމަށާއި އެހެން ވިޔަސް އިތުރަށް އެ މަގާމުން ދެމިހުންނެވުމަކީ މުއައްސަސާގެ އިތުބާރަށް އެންމެ ރަނގަޅު ގޮތް ނޫން ކަމަށެވެ.
ޒިޔަތު ވިދާޅުވި ގޮތުގައި ލިސްޓުގައި އޭނާގެ ނަން ހިމެނީ، ރައްޔިތުންގެ މަޖިލީހުގެ އިންތިހާބަށް ޕީޕީއެމްގެ ކެންޑިޑޭޓެއްގެ ގޮތުގައި ނުކުތުމުން ކެމްޕޭނަށް އެ ޕާޓީން ހަރަދުކޮށްފައިވާތީ އެވެ. ދެ ފަހަރެއްގެ މަތިން ކެމްޕޭނަށް ފައިސާ ޕާޓީން ލިބުނު ކަމަށް ޒިޔަތު އެއްބަސްވެވަޑައިގެންނެވި އެވެ.
އޭނާ ވިދާޅުވި ގޮތުގައި އެކަމަކު އެއީ އެމްއެމްޕީއާރުސީގެ ފައިސާކަން އެނގިވަޑައެއްނުގަންނަވަ އެވެ.
ތަހުގީގީ އިދާރާތަކުން ކުރިން އެކުލަވާލި ލިސްޓުގައި ހިމެނުނީ 267 ނަމެކެވެ. އެކަމަކު، ފަހުން މަޖިލީހަށް ފޮނުވި ލިސްޓުގައި 281 މީހުން ހިމެނެ އެވެ. އެ ލިސްޓުގައި ތިބި ދައުލަތުގެ އިސް މަގާމްތަކުގައި ތިބި 119 މީހުންގެ ނަން ވަކިން ވަނީ އާއްމުކޮށްފަ އެވެ.
އެ މީހުން މަގާމުތަކުން ވަކިކުރަން ވެސް އޮތީ ނިންމައިފަ އެވެ.
