މާދަމާ ފަށަން ހަމަޖެހިފައިވާ ސަރަހައްދީ އެންމެ ބޮޑު ފުޓުބޯޅަ މުބާރާތް ސާފް ޗެމްޕިއަންޝިޕްގެ ސަލާމަތީ ކަންކަން ބެެލެހެއްޓުމަށް 100 އަށް ވުރެ ގިނަ ފުލުހުން ހަރަކާތްތެރިވާނެ ކަމަށް ފުލުހުންގެ ހިދުމަތުން ބުނެފި އެވެ.
ފޯރިގަދަ ވާނެ ކަމަށް ބެލެވޭ ސާފު ޗެމްޕިއަންޝިޕުގެ މެޗުތައް ކުޅެން ހަމަޖެހިފައިވަނީ މާލޭގެ ގަލޮޅު ދަނޑުގަ އެވެ.
ސާފުގެ ސަލާމަތީ ކަންކަމާ ގުޅޭ ގޮތުން ސުޕްރެޓިންޑެންޓް އޮފް ޕޮލިސް އަހުމަދު އަޒްހާން "އަދަދު"އަށް ވިދާޅުވީ މުބާރާތާ ގުޅުވައިގެން ގާތްގަނޑަކަށް 100-120 އާ ދެމެދުގެ އަދަދެއްގެ ފުލުހުން އެ މަސައްކަތަށް ޑިޕްލޮއި ކުރާނެ ކަމަށެވެ.
"އެއީ ބައިނަލްއަގްވާމީ ބޮޑު މުބާރާތެއް މި ކުރިޔަށް ގެންދަނީ. ކާމިޔާބުކަމާ އެއްކޮށް ބޭއްވުމަށް ސަލާމަތީ ކަންކަންވެސް ވަރަށް މުހިންމު ވާނެ. އަޅުގަނޑުމެން ހުރިހާ ކަމެއް ރާވާނީ ދަނޑުގެ އެތެރެއާ ބޭރަށް ފޯކަސްކޮށްގެން،" އަޒްހާން ވިދާޅުވި އެވެ.
ސަތޭކައަށް ވުރެ ގިނަ ފުލުހުން ސާފް މުބާރަތަށް ޑިޕްލޮއިކުރާއިރު، މަގުމައްޗާއި މެޗުތަކަށް ކޯޑޮން ކުރާ ސަރަހައްދުތަކުގައި ވެސް ފުލުހުން ހަރަކާތްތެރިވާނެ ކަމަށް ވިދާޅުވި އެވެ.
މެޗުތައް ކުރިޔަށް ދާ ވަގުތުގައި ގަލޮޅު ދަނޑުގެ މަޖީދީ މަގު ފަޅީގައި އާއްމުންނަށް ޕާކު ނުކުރެވޭނެކަމަށް އޭނާ ވިދާޅުވި އެވެ.
އެ ސަރަހައްދު ހާއްސަކޮށްފައިވާނީ ވީވީއައިޕީ އާއި ވީއައިޕީ ބޭފުޅުންނަށެވެ.
"ވީވީއައިޕީގެ ގޮތުގައި މި ބަލަނީ ރައީސުލްޖުމްހޫރިއްޔާއާއި ނައިބު ރައީސް، ދެން އެ ސަރަހައްދުގެ އިތުރުން ގަލޮޅު ދަނޑުގެ އިރުމަތި ފަރާތަށް އޮންނަ މަގު ފަޔާ ވެހިކަލްއާއި އެމްބިއުލާންސް ފަދަ ވެހިކަލްތަކަށް ހާއްސަކުރާނެ،" އަޒްހާން ވިދާޅުވި އެވެ.
ދެ މެޗަކަށް ސަލާމަތީ ކަންކަން ވަރުގަދަ ކުރާނެ!
އޭނާ އިތުރަށް ވިދާޅުވި ގޮތުގައި މުބާރާތުގެ ބައެއް މެޗުތަކަށް ސެކިއުރިޓީ ވަރުގަދަ ކުރަން ވެސް ހަމަޖެހިފައި ވެ އެވެ.
"އެއީ ރާއްޖޭގަ އެބަ އުޅޭ ވަރަށް ބޮޑު ކޮމިއުނިޓީއެއް ބަންގްލަދޭޝްގެ. އެހެންވީމަ ބަންގްލަދޭޝް ރާއްޖެ މެޗަށާއި އިންޑިއާއާއި ރާއްޖެ ވާދަކުރާ މެޗަށް ސަލާމަތީ ކަންކަން އިތުރަށް ވަރުގަދަ ކުރާނެ،" އަޒްހާން ވިދާޅުވި އެވެ.
ގަލޮޅި ދަނޑު. ފޮޓޯ: ހުސެއިން ޝަޔާހު، އަދަދު
ބަންގްލަދޭޝްއާއި ރާއްޖެ ވާދަކުރާ މެޗު އޮކްޓޯބަރު 7 ވަނަ ދުވަހު އޮތް އިރު އިންޑިއާއާއި ރާއްޖެ ވާދަކުރާ މެޗު އޮތީ 13 ވަނަ ދުވަހު އެވެ.
ފޯރިގަދަވާނެ ކަމަށް ބެލެވޭ އެ ދެ މެޗަށް ގިނަ އަދަދެއްގެ ސަޕޯޓަރުން ވަންނާނެ އެވެ.
އެހެންކަމުން އަޒްހާން އެދިވަޑައިގެންނެވީ އެފަދަ މެޗުތަކުގައި ވެސް ސަޕޯޓަރުންގެ ފަރާތުން ހަމަޖެހުން ގެއްލުވާލާ ފަދަ އަމަލުތަކުން ދުރުވެ ތިބުމަށެވެ.
ސަލާމަތީ ފިޔަވަޅުތަކުގެ ތެރޭގައި ރެންޑަމްކޮށް ދަނޑަށް ވަންނަ ފަރާތްތަކާއި އެ ފަރާތްތަކުގެ ދަބަސްތައް ފަދަ ތަކެތި ޗެކު ކުރާނެ ކަމަށް ފުލުހުން ބުނެ އެވެ.
އަދި އެހާ ގިނަ އަދަދެއްގެ މީހުން ދަނޑަށް ވަންނަ އިރު، ވަކި ވަކިން ސްކޭން ނުކުރެވުނު ނަމަވެސް އެ މަސައްކަތް ވެސް ކުރާނެ ކަމަށް ފުލުހުން ބުނެ އެވެ.
އަޒްހާން ވިދާޅުވީ ސާފު މުބާރާތް ކާމިޔާބުކޮށް ބޭއްވުމަށް އާއްމުންގެ އެހީތެރިކަން ވަރަށް ބޮޑަށް ބޭނުންވާނެ ކަމަށެވެ.
އަދި ދަނޑަށް ވެއްދުން މަނާ ތަކެތީގެ ލިސްޓަކާއި ޕޯސްޓަރެއް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ދަނޑުގެ ކައިރި ސަރަހައްދުގައި ބަހައްޓާނެކަމަށާއި، އެގޮތަށް ވެއްދުން މަނާ ތަކެތި ދަނޑަށް ވަންނަން ދާ އިރު ނުގެންދިޔުމަށް އަޒްހާން އިލްތިމާސް ކުރެއްވި އެވެ.
"ސަޕޯޓަރުން ދަނޑަށް ވައްދަން ފަށާނެ ދެ ގަޑިއިރު ކުރިން. އެހެންވީމަ ވަރަށް ބޮޑު އެދުމެއް އެއީ އެންމެ ފަހު ވަގުތަށް މަޑުނުކުރުން. އެއީ އަނެއްކާ ވެސް ކިއުތައް ދިގުވެގެން ގޮސް ލަސްތަކެއް ކުރިމަތިވާނެތީ. ދެން އެނގިލައްވާނެ މިއީ އާއްމު ހާލަތެއް ނޫންކަން ވެސް. އެހެންކަމުން އަޅުގަނޑުމެން ވެސް ވެކްސިން ކާޑު ބަލައި، އޭގެ މައުލޫމާތާއި އެއީ އެބޭފުޅާއަށް ނިސްބަތްވާ ސައްހަ އެއްޗެއްތޯ ވެސް ބަލާތީ، ވަގުތު ހޭދަވާނެ. އެހެންވީމަ ދުރާލާ ދަނޑަށް ވަޑައިގަތުން އެއީ ވަރަށް ބޮޑު އެދުމެއް،" އަޒްހާން ވިދާޅުވި އެވެ.
ސާފު ޗެޕްޕިއަންޝިޕް ބާއްވަން ހަމަޖެހިފައިވަނީ މާދަމާއިން ފެށިގެން އޮކްޓޯބަރު 16 ވަނަ ދުވަހުގެ ނިޔަލަށެވެ.
