ޖިނާއީ މައްސަލަތަކުގައި މީހުންނަށް ފާރަލުމާއި ވަގު ވަގަށް ހެކި ހޯދޭ ގޮތަށް ހަދާފައިވާ ގަވާއިދަކީ ގާނޫނުއަސާސީން ލިބިދީފައިވާ މިނިވަންކަމަށް ފުލުހުންނަށް އަރައިގަނެވޭނެ ގޮތަށް ފަރުމާކޮށްފައިވާ ގަވާއިދެއް ކަމަށް ބުނެ، އެ ގަވާއިދު މުރާޖައާ ކުރަން އިދިކޮޅުން ހުށަހެޅި ކުއްލި މައްސަލަ ރައްޔިތުންގެ މަޖިލީހުން މިއަދު ބަލައިނުގަނެ ބޭރުކޮށްލައިފި އެވެ.
ފުލުހުންގެ ހިދުމަތުގެ ގާނޫނުން ބާރުލިބިގެން ހަދާފައިވާ "ތަހުގީގު ކުރުމުގެ ހާއްސަ އުކުޅު ބޭނުން ކުރުމުގެ ގަވާއިދު" ގައި ހާއްސަ އުކުޅުތަކުގެ ތެރޭގައި ހަ ކަމެއް ހިމަނާފައި ވެ އެވެ.
އެއީ ޑައިރެކްޓް ސަވައިލެންސް އާއި ކޯވާޓް ހިއުމަން އިންޓެލިޖެންސް އާއި އިންޓްރޫސިވް ސަވައިލެންސް އާއި އިންޓަސެޕްޝަން އާއި ސްޓިންގް އޮޕަރޭޝަން އަދި ޕާސޯނާ އުކުޅުތަކެވެ.
އެކަމާ ގުޅިގެން މާވަށު ދާއިރާގެ އިދިކޮޅު މެމްބަރު މުހައްމަދު ސައީދު ހުށަހެޅުއްވި ކުއްލި މައްސަލައިގައި ބުނެފައިވަނީ، އެ ގަވާއިދުގެ ދަށުން އެކިއެކި އާލަތްތައް ބޭނުންކޮށްގެން މީހުންނަށް ޖާސޫސު ކުރުމާއި ފާރަލެވުމަކީ އާންމު ރައްޔިތުންގެ ޒާތީ ދިރިއުޅުމުގެ މިނިވަންކަމާއި ހައްގަށް ހުރަސްއެޅޭ ކަމަށެވެ.
މާވަށު ދާއިރާގެ އިދިކޮޅު މެމްބަރު މުހައްމަދު ސައީދު މަޖިލީހުގެ ޖަލްސާއެއްގައި ވާހަކަ ދައްކަވަނީ. --ފޮޓޯ: މަޖިލިސް
އެގޮތުން، ގާނޫނުއަސާސީގައި ބަޔާންކޮށްފައިވާ އެއްވެސް މިނިކަމަކާއި ހައްގެއް ގާނޫނަކުން އަދި ގަވާއިދަކުން ވެސް ނިގުޅައިގަތުމަށް ޖާގަ ނުލިބޭތީ، އެ ގަވައިދު އަލުން މުރާޖައާ ކުރުމަށް ސަރުކާރުގެ ކަމާބެހޭ އިދާރާތަކަށް އެ މައްސަލައިގައި ވަނީ ގޮވާލައިފަ އެވެ.
ނަމަވެސް، އެ މައްސަލަ މަޖިލީހަށް ބަލައިގަތުމަށް ނެގުނު ވޯޓުގައި، އެ މައްސަލަ ބަލައިގަތުމަށް ނުފެންނަ ކަމަށް 22 މެމްބަރުން ވޯޓާއެކު އެ މައްސަލަ ވަނީ ބޭރުކޮށްލައިފަ އެވެ. އެ މައްސަލަ ބަލައިގަތުމަށް ވޯޓު ދީފައިވަނީ އެންމެ ހަތް މެމްބަރުންނެވެ.
އެ ގަވާއިދުން ފުލުހުންނަށް ލިބިދޭ ބައެއް ބާރުތައް
ފުލުހުންގެ ހިދުމަތުގެ ގާނޫނުން ބާރުލިބިގެން ހަދާފައިވާ އެ ގަވާއިދުގައި ހާއްސަ އުކުޅުތަކުގައި ހިމެނޭ ޑައިރެކްޓް ސަވައިލެންސަކީ މީހެއްގެ ހަރަކާތްތަކަށް ފާރަލުމެވެ.
ކޯވާޓް ހިއުމަން އިންޓެލިޖެންސަކީ ޖާސޫސުން މެދުވެރިކޮށް މީހަކާ މެދު ގުޅުމެއް އުފައްދައިގެން މައުލޫމާތު ހޯދަން އުޅުމެވެ. އިންޓްރޫސިވް ސަވައިލެންސަކީ ގޭ ތެރެ ނުވަތަ އޮފީސް ފަދަ ތަނެއް ބަގުކޮށް އަޑާއި މަންޒަރު ރެކޯޑު ކުރެވޭ ގޮތް ހެދުމެވެ.
އިންޓާސެޕްޝަނަކީ ފޯނު ނުވަތަ އީމެއިލް ފަދަ ތަކެތި ބެލުމާއި އަޑުއެހުމެވެ. ސްޓިންގް އޮޕަރޭޝަންތަކަކީ ހެއްކާއެކު މީހަކު އަތުލުމަށް ވަކި ސެޓިންއެއް ހެދުމެވެ.
ޕާސޯނާއަކީ ވާޗުއަލް ނުވަތަ ފޭކު މީހެއްގެ ނަމުގައި މުއާމަލާތްކޮށްގެން ހެކި ހޯދުމެވެ.
އެ ގަވާއިދުގައި ބުނެފައިވާ ގޮތުން ތަހުގީގު ކުރުމުގެ ހާއްސަ އުކުޅެއް ބޭނުން ކުރެވޭނީ ގައުމީ ސަލާމަތަށް ނުރައްކާވާ ހާލަތްތަކުގަ އާއި ބޮޑެތި ކުށްތައް ތަހުގީގު ކުރުމުގަ އެވެ. އަދި ބޭނުންކުރަންޖެހިއްޖެ ނަމަ ހުއްދަ ލިބިގެން އެހެން ހާލަތްތަކުގައި ވެސް އެފަދަ އުކުޅުތައް ބޭނުން ކުރެވިދާނެ ކަމަށް ގަވާއިދުގައި ބުނެފައިވެ އެވެ.
ގަވާއިދުގައި ބުނެފައިވާ ހުރިހާ އުކުޅުތަކަކީ ވެސް ފުލުހުން މިހާރު ބޭނުން ކުރަމުންދާ އުކުޅުތަކެވެ. އަދި އެފަދަ އުކުޅުތައް ބޭނުންކޮށްގެން ޓެރަރިޒަމްގެ ބޮޑެތި މައްސަލަތައް ހިންގުމުގެ ކުރިން ހުއްޓުވާފައި ވެސް އެބަހުއްޓެވެ.
އޭގެ އިތުރުން، ފުލުހުންނާ ގުޅޭ ހަތިޔާރު ގެންގުޅުމުގެ ގަވާއިދަކާއި ފުލުހުންގެ ބާރު ބޭނުން ކުރުމުގެ ގަވާއިދަކާއި ޕޮލިސް ރިކޯޑް ދޫކުރުން ފަދަ ގަވާއިދުތަކެއް ހޯމް މިނިސްޓްރީން ވަނީ ގެޒެޓުކޮށްފަ އެވެ. އެ ހުރިހާ ގަވާއިދުތަކެއް ވެސް ގެޒެޓުކޮށްފައި ވަނީ ކުރީގެ ރައީސް މުހައްމަދު ނަޝީދު އަވަހާރަކޮށްލަން މެއި 6، ގައި ދިން ޓެރަރިސްޓް ހަމަލާއަށްފަހު އެވެ.
