އިނގިރޭސި ސަރުކާރުގެ ފޮރިން އޮފީހުގެ ޒަރޫރީ ނޫން ބޭނުންތަކުގައި ދަތުރުނުކުރާ "ނޯ-ގޯ" ލިސްޓުން ރާއްޖެ މިއަދު އުނިކޮށްފި އެވެ.
ރާއްޖޭގައި ހުންނަ އިނގިރޭސި ހައިކޮމިޝަނުން ޓްވިޓާގައި ބުނީ، ފޮރިން އޮފީހުގެ ދަތުރުުކުރުން މަނާ ގައުމުތަކުގެ ލިސްޓު މުރާޖާކޮށް ރާއްޖޭގެ ނަން އުނިކޮށްފައިވާ ކަމަށެވެ.
އެގޮތުން ރާއްޖޭގެ ކޮވިޑުގެ ހާލަތަށް އައި ބަދަލާއެކު، އެ ލިސްޓުން ނެގުމާއެކު އިނގިރޭސިވިލާތުން ރާއްޖެ އަންނަން މިހާރު އެއްވެސް ހުރަހެއް ނޯންނާނެ އެވެ.
މި އަހަރުގެ މޭ މަހުން ފެށިގެން އިނގިރޭސިވިލާތުގެ ރެޑް ލިސްޓުގައި އޮތުމަށް ފަހު ހުސްވި ހަފުތާއިން ފެށިގެން ރާއްޖެ ދަތުރުކުރަން ހުއްދަ ދިން ނަމަވެސް، ފޮރިން އޮފީހުގެ މި ލިސްޓުގައި އޮތުމުން ދަތުރުކުރަން ބޭނުންވާ މީހުންނަށް އޮޅުންބޮޅުން އެރި އެވެ. އަދި އެ ގައުމުގެ ޓްރެވަލް އެޖެންސީތަކުން ދެ ލިސްޓު އެއްގޮތް ކުރުމަށް އިނގިރޭސި ސަރުކާރަށް ގޮވާލާފަ އެވެ.
އެ ޓްރެވަލް އެޖެންސީތަކުން މައިގަނޑު ގޮތެއްގައި ފާހަގަކުރީ، ސަރުކާރުގެ ދެ ލިސްޓެއްގައި ދެ ގޮތަށް އޮތުމަކީ ބުއްދި ގަބޫލުކުރެވޭ ހަމައެއް ނޫން ކަމަށެވެ. އަދި ކޮންމެވެސް އެއް ގޮތަކަށް އެކަން ކަނޑައަޅާ، ދަތުރުކުރެވޭނެތޯ އޮތް ސުވާލަށް ސާފު ޖަވާބެއް ދިނުމަށް ގޮވާލި އެވެ.
ޓްރެވަލް އެޖެންސީތަކުން މި ލިސްޓުތައް އެއްގޮތް ކުރަން ގޮވާލި މައިގަނޑު ސަބަބަކީ ފޮރިން އޮފީހުގެ "ނޯ-ގޯ" ލިސްޓުގައި އޮންނަ ގައުމުތަކަށް ދަތުރުކުރެވުނު ނަމަވެސް، އިންޝުއަރެންސް ނުލިބޭތީ އެވެ. އެގޮތުން ބަލިމަޑުކަމުގެ މި ހާލަތުގައި ޓްރެވަލް އިންޝުއަރެންސާ ނުލާ ދަތުރުކުރުން ރަނގަޅު ނުވާނެތީ، މިކަމަށް ހައްލެއް ހޯދައިދޭން އެ ވިޔަފާރިތަކުން ގޮވާލި އެވެ.
ރާއްޖޭގެ އިތުރުން މި ސަރަހައްދުގެ ގައުމުތަައް ކަމުގައިވާ ބަންގްލަދޭޝް އަދި ސްރީލަންކާއަށް ވެސް މި މައްސަލަ ދިމާވި އެވެ. ފަހުން އާންމުކުރި ލިސްޓުގައި ރާއްޖެއެކޭ އެއް ފަދައިން މި ދެ ގައުމު ވެސް ވަނީ ލިސްޓުން އުނިކޮށްފަ އެވެ.
