އަންނަ މަހު ކުޅެން ނިންމާފައިވާ ކްރިކެޓުގެ ޓީ20 ވޯލްޑް ކަޕް ކޮލިފައިންގައި މެޗުތަކަށް އެކުލަވާލި ގައުމީ ކްރިކެޓް ސްކޮޑު އިއުލާނުކޮށްފި އެވެ.
ކްރިކެޓް ބޯޑް އޮފް މޯލްޑިވްސް (ސީބީއެމް) އިން ރޭ ބޭއްވި ހާއްސަ ހަފްލާއެއްގައި ގައުމީ ކްރިކެޓް ސްކޮޑު އެކުލަވާލާފައިވަނީ އަންނަ މަހު ޓީ20 ވޯލްޑް ކަޕް ކޮލިފައިންގައި ރަނގަޅު އަމާޒެއްގައި މަސައްކަތް ކުރުމަށެވެ.
މިއީ ރާއްޖޭން 2019 ވަނަ އަހަރުގެ ސައުތު އޭޝިއަން ގޭމްސްގައި ވާދަކުރި ފަހުން ބައިނަލްއަގުވާމީ ކްރިކެޓް މެޗުތަކަކަށް ނުކުންނަ ފުރަތަމަ ފަހަރެވެ. ކޮލިފައިންގައި ރާއްޖެ ވާދަކުރަން ޖެހިފައިވަނީ ގަތަރު، ސައުދީ އަރަބިއާ، ކުވައިތު އަދި ބަހްރެއިން އެވެ. މި ޒޯންގެ ކޮލިފައިން މެޗުތައް ކުރިއަށްދާނީ ގަތަރުގެ ދޯހާގަ އެވެ. މެޗުތައް ތާވަލުކޮށްފައިވަނީ އަންނަ މަހު 19-30 އަށެވެ.
ގައުމީ ޓީމުގެ ކެޕްޓަނަކަށް ހަމަޖައްސާފައިވަނީ މުހައްމަދު މަހަފޫޒް އެވެ. އަދި ވައިސް ކެޕްޓަނަކީ ޔޫސުފް އަޒްޔާން ފަރުހަތު އެވެ.
ގައުމީ ކްރިކެޓް ސްކޮޑު:
މުހައްމަދު މަހަފޫޒް (ކެޕްޓަން)، ޔޫސުފް އަޒްޔާން ފަރުހަތު، އަހުމަދު ހަަސަން، އާދަމް ނާސިފް އުމަރު، މުހައްމަދު އައްޒާމް، ހަަސަން އިބްރާހިމް، އިބްރާހިމް ނަޝާތު، އިބްރާހިމް ރިޒާން، ހަސަން ހާޒިގް ރަޝީދު، އަހުމަދު އަމީލް މައުރޫފް، ލީމް ޝަފީގް، ޑަބްލިއުޖޭ މަލިންދާ، މުހައްމަދު އިވާން، މުހައްމަދު ރިޝްވާން
ޓީ20 މުބާރާތަށް އެކުލަވާލި ކްރިކެޓް ޓީމާއި ސީބީއެމްގެ އިސް ވެރިން ފޮޓޯ އަކަށް ހުއްޓިގެން.
ކްރިކެޓް ޓީމާ މުހާތަބުކޮށް ވާހަކަ ދެއްކެވިއިރު، ސީބީއެމްގެ ރައީސް މުހައްމަދު ފައިސަލް ވަނީ މުހިއްމު ކަންތައްތަކެއް ފާހަގަކުރައްވައިފަ އެވެ. ހާއްސަކޮށް ފައިސަލް އަލިއަޅުއްވާލެވީ މޮޅު ކުޅުންތެރިއަކަށް ވުމަށްޓަކައި ޑިސިޕްލިން ހިފެހެއްޓުމުގެ މުހިއްމު ކަމުގެ މައްޗަށެވެ.
"ފާހަގަކޮށްލަން ޖެހޭ ކަމަކީ ވަރަށް މޮޅެތި ކުޅުންތެރިން ވެސް ޑިސިޕްލިން ނުހިފެހެއްޓިގެން އެބަހުރި ކުރިއަށް ނުދެވިފައި. އެހެންވީމަ ކޮންމެ ކުޅުންތެރިއަކު ވެސް ޑިސިޕްލިންއާ އެކު ކުރިއަށް ދިއުން މުހިއްމު،" ފައިސަލް ވިދާޅުވި އެވެ.
ކޮވިޑް-19ގެ ހާލަތުގެ ތެރޭގައި ޓީމުގެ ކޯޗު އަހުމަދު ނީޝަމް ނާސިރު އާއި އެސިސްޓަންޓް ކޯޗު އިސްމާއިލް ނިހާދު ކުރި މަސައްކަތަށް ސީބީއެމް އިން ވަނީ ޝުކުރު އަދާކޮށްފަ އެވެ.
ގައުމީ ކްރިކެޓް ޓީމުގެ މެނޭޖަރަކަން ހަމަޖައްސާފައިވަނީ އަލި މުހައްމަދު މަނިކު (އަލިބެ) އެވެ. އޭނާ އަކީ 2005 ވަނަ އަހަރު ރާއްޖޭން ފުރަަތަމަ ފަހަރަށް ބައިނަލްއަގުވާމީ މުބާރާތެއްގެ ޗެމްޕިއަންކަން ހޯދިއިރު، ޓީމުގެ މެނޭޖަރުގެ ޒިންމާ އަދާކުރި ފަރާތެވެ.
ފަހަކަށް އައިސް ބައިނަލްއަގުވާމީ މުބާރާތްތަކުގައި ރާއްޖޭގެ ކްރިކެޓް ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ. ކްރިކެޓް ބޯޑް ހިންގުމުގައި މިހާރު އޮތް ލީޑަޝިޕުން ކްރިކެޓްގެ މުސްތަގުބަލަށް އަމާޒުކޮށް ހިންގާ ޕްރޮޖެކްޓްތަކުގެ މައިގަނޑު އަމާޒަކަށްވެފައި އޮތީ ގައުމީ ޓީމުގެ ނަތީޖާ ރަނގަޅު ކުރުމަށެވެ. އެ ގޮތުން ގައުމީ ޓީމާ ހަމައަށް ފެންވަރު ރަނގަޅު ޒުވާން ކުޅުންތެރިން ރަނގަޅަށް ޓްރެއިނިން ދީގެން ގެންދިއުމަކީ މިހާރު އޮތް ސީބީއެމްގެ ލީޑަޝިޕުން ގެންގުޅޭ ތަސައްވުރެކެވެ.
