މިހާރު ކުރިއަށްދާ މެލޭޝިއާ ކްރިކެޓް އެސޯސިއޭޝަން (އެމްސީއޭ)ގެ އިންޓަ ސްޓޭޓް 50 އޯވަރުގެ މުބާރާތުގައި، ކުއަލަ ލަމްޕޫރު ޓީމަށް ކުޅެމުން އަންނަ ރާއްޖޭގެ ހުނަރުވެރި ތަރި، ޔޫސުފް އަޒްޔާން ފަރުހަތުގެ ތަފާތު ކުޅުމަކާ އެކު އޭނާގެ ޓީމު އެންމެ ފަހުން ކުޅުނު މެޗުން މޮޅުވެއްޖެ އެވެ.
ސްކޮލަޝިޕެއްގައި މެލޭޝިއާގައި ކިޔަވަމުން އަންނަ އަޒްޔާން، މެލޭޝިއާގައި ދިރިއުޅެމުން ވެސް އަންނަނީ ކްރިކެޓް ކެރިއަރު ކުރިއަށްގެންދަމުންނެވެ. ގައުމީ ކްރިކެޓް ޓީމުގެ ކެޕްޓަންކަން ކުރުމުގެ އިތުރުން. ރާއްޖޭގެ އެންމެ މޮޅު ކްރިކެޓް ކުޅުންތެރިޔާގެ މަގާމު ހޯދި އަޒްޔާން ކުޅޭ ކުއަލަ ލަމްޕޫރު ޓީމު އެންމެ ފަހުން ކުޅުނު މެޗުގައި ވާދަކުރީ، ސަރަވަކްއާ އެވެ.
އެ މެޗުގައި، ޓޮސް ދިމާވުމުން، ކުއަލަ ލަމްޕޫރުން ނިންމީ ހޮވާށެވެ. ސަރަަވަކުން ކުޅެން އަރައި، 50 އޯވަރުގެ ތެރޭގައި، ހަތް ކުޅުންތެރިން ނުބައިވެގެން ހެދީ 190 ލަނޑެވެ. އަޒްޔާން ވަނީ 10 އޯވަރަށް ދެ ވިކެޓް ނަގައިފަ އެވެ. އަދި، މި އޯވަރު ތަކުގައި ޖުމްލަ، 45 ޑޮޓް ބޯޅަ ވަނީ އުކައިފަަ އެވެ.
ޖަވާބުގައި ކުޅެން އަރައި، ކުއަލަ ލަމްޕޫރުން މޮޅުވީ 43.1 އޯވަރަށް ތިން ކުޅުންތެރިން ނުބައިވެގެން 191 ލަނޑު ހަދައިގެންނެވެ. އަޒްޔާން ވަނީ ނުބައިނުވެ، 75 ބޯޅައިން 105 ލަނޑު ހަދައިފަ އެވެ. ހަތަރަކަށް ދެ ބޯޅަ އަދި ހަޔަކަށް ދެ ބޯޅަ ޖެހި އެވެ.
ޖުމްލަ ހަ ޓީމު ވާދަކުރަމުން އަންނަ މި މުބާރާތުގައި ކޮންމެ ޓީމެއް ތިން މެޗު ކުޅުނުއިރު، އެއް ވަނައިގައި އޮތީ ތިން މެޗުން ވެސް މޮޅުވެ، ހަ ޕޮއިންޓް ހޯދާފައިވާ ޕެރާކް އެވެ. ދެ ވަނައިގައި އޮތް ޖޮހޯރަށް ތިން މެޗުން ފަސް ޕޮއިންޓް ލިބިފައިވާއިރު، ކުއަަލަ ލަމްޕޫރު ތިން ވަނަިއގައި އޮތީ ތިން މެޗުގެ ތެރެއިން ދެ މެޗުން މޮޅުވެގެން، ހަތަރު ޕޮއިންޓާ އެކު އެވެ.
އަޒްޔާން ވަނީ 2019 ވަނަ އަހަރު އޭނާގެ އުމުރުން އެންމެ 19 އަހަރުގައި ރާއްޖޭގެ އެންމެ މޮޅު ކްރިކެޓް ކުޅުންތެރިޔާގެ މަގާމު ހޯދައިފަ އެވެ. އެކި އަނިޔާގެ މައްސަލަތައް ދިމާވި ނަމަވެސް ކެރިއަރު ކުރިއަށްގެންދިއުމަށްޓަކައި ހިތްވަރު ދެއްކި، އަޒްޔާން ވަނީ، 2022 ވަނަ އަހަރު އޮސްޓްރޭލިއާގެ ވިކްޓޯރިއާގެ ކުލަބެއް ކަމަށްވާ ފްރެންކްސްތަން ޕެނިންސޫލާ ކްރިކެޓު ކުލަބަށް ވެސް ކުޅެފަ އެވެ.
