މިދިޔަ ހުކުރު ދުވަހުގެ މެންދުރުފަހު އައްޑޫ ސިޓީގެ ފްލެޓެއް ތެރޭ މީހަކަށް ވަޅިން ހަމަލާދީ ޒަހަމްކޮށްލި މައްސަލައިގައި މީހަކު ހައްޔަރުކޮށްފި އެވެ.
ފުލުހުން ބުނީ އެ މައްސަލައާ ގުޅިގެން ހައްޔަރުކޮށްފައިވަނީ އުމުރުން 31 ދިވެހި ފިރިހެނެއް ކަމަށެވެ. އަދި އެމީހާ ހައްޔަރުކޮށްފައިވަނީ ކޯޓު އަމުރެއްގެ ދަށުން ރޭގެ ވަގުތެއްގައިކަމަށް ވެސް ފުލުހުން ބުނެ އެވެ.
ހަމަލާގައި ޒަހަމްވި މީހާ އެންމެ ފުރަތަމަ ގެންދިޔަ އައްޑޫ އިކުއެޓޯރިއަލް ހޮސްޕިޓަލުން ވަނީ އެމީހާގެ ބޮލަށް ބޮޑެތި ޒަހަމްތަކެއް ލިބިފައިވާ ކަމަށް ބުންޏެވެ.
އަދި އެމީހާގެ ހާލު ސީރިއަސް ނޫނަސް، އިންޓާނަލް ބްލީޑިންގެ ސަބަބުން އިތުރު ފަރުވާއަށްޓަކައި އެމީހާ ވަނީ މާލެއަށް ބަދަލުކޮށްފަ އެވެ.
އައްޑޫގައި ހުކުރު ދުވަހު އިތުރު މާރާމާރީއެއް ވެސް ވަނީ ހިނގައިފަ އެވެ. އެ މާރާމާރީގައި އަންހެނަކާއި ފިރިހެނަކަށް ވަނީ އަނިޔާވެފަ އެވެ.
ހޮސްޕިޓަލުން މައުލޫމާތު ދިން ގޮތުގައި އެ މާރާމާރީގައި ފިރިހެން މީހާގެ ކޮނޑަށް އަދި އަންހެން މީހާގެ އަތަށް ވަނީ ޒަހަމްތަކެއް ލިބިފަ އެވެ.
