އަފްގާނިސްތާނުގެ ގާނޫނީ ސަރުކާރު ވައްޓާލައި ތާލިބާނުން އެ ގައުމު ހިފި މައްސަލަ އާއި ފަލަސްތީނުގެ ރައްޔިތުންނާ މެދު އިޒްރޭލުން އަނިޔާވެރިވާ މައްސަލައިގައި ކަންބޮޑުވުން ފާޅުކުރައްވައި ދިވެހިރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު، އދ. ގައި މިރޭ އެކަމުގެ ހައްލަކަށް ގޮވާލައްވައިފި އެވެ.
އދ. ގެ އަހަރީ އާއްމު ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ ދެކުނު އޭޝިޔާގެ އަވައްޓެރި ގައުމެއްގެ ހައިސިއްޔަތުން "އަފްގާނިސްތާނުގެ މިއަދުގެ ހާލަތާމެދު ދިވެހިން ކަންބޮޑުވާ" ކަމަށެވެ. އަދި "އެ ގައުމުގެ ރައްޔިތުންގެ ރައްކާތެރިކަން ކަށަވަރުވުން" ބޭނުންވެވަޑައިގަންނަވާ ކަމަށް ވެސް ރައީސް ވިދާޅުވި އެވެ.
"އަންހެނުންނާއި އަންހެނުން ކުދިންގެ ހައްގުތަކާއި ސަލާމަތާއި ހިމާޔަތް އެ ގައުމުގައި އޮތުމަށް އެދެން. މިކަންކަން ހިފެހެއްޓި ކަށަވަރުވެފައި އޮތުމަށްޓަކައި، ރައްޔިތުން އިންތިހާބު ކުރާ ސަރުކާރެއް އެ ގައުމުގައި އޮތުން މުހިންމު،" ރައީސް ސޯލިހު ވިދާޅުވި އެވެ.
ރައީސްގެ ތަގުރީރުގައި، ފަލަސްތީނުގެ މިނިވަން ދައުލަތެއް ގުދުސްގައި ބިނާ ކުރުމަށް ރާއްޖޭން ކުރަމުން އަންނަ ވަކާލާތު ތަކުރާރު ކުރައްވައި، "ދިވެހި ސަރުކާރާއި ދިވެހި އެންމެހާ ރައްޔިތުން ތިބީ" ފަލަސްތީނާއެކު އެކުކަމުގެ ޔަގީންކަން އެރުއްވި އެވެ.
"އދ. ގެ އެތައް އަހަރެއްގެ މަސައްކަތުން ވެސް އެމީހުންގެ ހައްގުތައް ވަނީ ކަށަވަރުކޮށްނުދެވި. އިޒްރޭލުން ފަލަސްތީނުގެ އަންހެނުން، ފިރިހެނުން، އަދި ކުދިބޮޑު އެތައް ބައެއްގެ ހައްގުތައް ތަކުރާރުކޮށް އެބަ ނިގުޅައިގަނޭ،" އެކަމިނުފާނު ވިދާޅުވި އެވެ.
އާބާދީ މަދު، ދިވެހިރާއްޖެއަކީ މިނިވަން ދައުލަތެއްގެ ގޮތުގައި އދ. އިން ބަލައިގަނެފައިވާއިރު މިލިއަނުން އާބާދީގައި މީހުން ހިމެނޭ ފަލަސްތީނު އެއީ ދައުލަތެއްގެ ގޮތުގައި ބަލައިނުތަމުގެ އުޒުރަކީ ކޮބައިތޯ ރައީސް މިރޭ ސުވާލު އުފެއްދެވި އެވެ.
"އދ. ގެ އާންމު މަޖިލީހާއި ސެކިއުރިޓީ ކައުންސިލުން ފަަލަސްތީނުގެ ހައްގުގައި ނެރުނު ގަރާރުތަކާއި ނިންމުނު ނިންމުންތައް ގިނަ. މަދު އެއްޗަކީ، އަމުދުން ނުވެސް ނެތް އެއްޗަކީ، ފަަލަސްތީނުގެ ހައްގު،" ރައީސްގެ ތަގުރީރުގައި ވިދާޅުވި އެވެ.
"އެބަޔަކު، އަޅުގަނޑު މިތާ ހުރެ ތަމްސީލު ކުރާ ދިވެހީން ބޭނުންވަނީ އދ. އިންނާއި މުޅި ދުނިޔެއިން މިނިވަން ގައުމެއްގެ ގޮތުގައި ފަަލަސްތީނު ބަލައިގަތުން."
މިރޭގެ ޖަލްސާގައި ރައީސް ސޯލިހު ވަނީ ދުނިޔޭގެ އެކި ކަންކޮޅުގައި ހިންގަމުންދާ ޓެރަރިޒަމްގެ އަމަލުތައް ކުށްވެރިކުރައްވައި، ރާއްޖޭގެ ކުރީގެ ރައީސް މުހައްމަދު ނަޝީދު އަވަހާރަކޮށްލުމަށް މެއި 6، ދިން ބޮމުގެ ހަމަލާއާ ގުޅޭ ގޮތުން ވާހަކަ ދައްކަވައިފަ އެވެ.
"ހަރުކަށި ފިކުރުން ދީން މާނަ ކުރުމުގެ ނުރައްކަލަށް ބަލަހައްޓައިގެން ތިބެވޭކަށް ނެތް. ދިވެހިރާއްޖެއަކީ ފެށުނީއްސުރެ މެދު މިނުގެ ދީނީ އަގީދާ ގަބޫލު ކުރާ ގައުމެއް. ނަމަވެސް ހަރުކަށި ފިކުރުން މި ކުޑަކުޑަ ރާއްޖެ ވެސް ސަލާމަތެއް ނުވި،" ރައީސް ވިދާޅުވި އެވެ. "މިފަދަ ހަމަލާތައް ދޭ ތަން ބަލަން އަދި ޅަ ކުދިންގެ ސިކުނޑިތަކުގާ ހަރުކަށި ފިކުރު އަށަގަންނުވާތަން ދެކެން އަޅުގަނޑުމެނެއް ނުތިބޭނަން."
މީގެ އިތުރުން، ރައީސްގެ ތަގުރީރުގައި އެމަނިކުފާނު ވަނީ ކޮވިޑް-19 އާ ގުޅޭ ގޮތުންނާއި މޫސުމަށް އަންނަ ބަދަލުތަކާ ގުޅޭ ގޮތުން ވާހަކަ ދައްކަވައި، ގައުމުތަކުގެ މެދުގައި އުފެދޭ މައްސަލަތައް ހައްލު ކުރުމަށް އދ. އިން ކުޅެވޭނެ މުހިންމު ދައުރުގެ ވާހަކަ ފާހަގަ ކުރައްވައިފަ އެވެ.
