ޓެރަރިޒަމްގެ ބޮޑެތި ތުހުމަތުކުރެވޭ މީހުން ފަސޭހައިން ދޫވެގެންދަނީ ޓެރަރިޒަމްގެ މައްސަލަތަކުގައި ކަމާބެހޭ ފަރާތްތަކުން ފަރުވާތެރި ކަން ނުބައްހައްޓާތީ ނޫނީ "ސީރިއަސް" ނުވެވޭތީ ކަމަށް އެމްޑީޕީން ބުނެފި އެވެ.
އެމްޑީޕީން މިހެން ބުނެ ބަޔާން ނެރެފައި މިވަނީ، ރާއްޖޭގެ އައިއެސް ލީޑަރު ކަމަށް ބުނާ ޏ. ފުވައްމުލައް މާދަޑު، ކަރިއްޔާވިލާ، މުހައްމަދު އަމީން ދޫވުމާ ގުޅިގެންނެވެ.
ބުރާސްފަތު ދުވަހު ހައިކޯޓުން އަމީންގެ މައްޗަށް އުފުލާފައިވާ ޓެރަރިޒަމްގެ ދައުވާތައް ބޭރުކޮށްލީ، މުއްދަތު ހަމަވީ ފަހުން ދައުވާ އުފުލި ކަމަށް ބުނެ އެވެ. ހައިކޯޓުން މި ދައުވާތައް ބޭރުކުރީ ކްރިމިނަލް ކޯޓުގައި އަމީންގެ މައްޗަށް އުފުލާފައިވާ ދައުވާތަކުގެ ޝަރީއަތްތައް ކުރިޔަށް ދަނިކޮށެވެ.
އަމީން ދޫކޮށްލުމުން ކަންބޮޑުވުންފާޅުކޮށް އެމްޑީޕީން ނެރުނު ބަޔާނުގައި ބުނީ އިޖުރާއީ ނުކުތާއެއް ހުއްޖަތެއްގެ ގޮތުގައި ދައްކައިގެން ޑްރަގް ޓްރެފިކިން އާއި ޓެރަރިޒަމްގެ ތުހުމަތުވާ މީހުން ދޫވަނީ އަލުން ދައުވާ ވެސް ނުއުފުލޭ ގޮތަށް ކަމަށެވެ. އަދި ހެއްކާއި ގަރީނާގެ މައްޗަށް ބެލުމުގެ ބަދަލުގައި، އިޖުރާއީ ނުކުތާތަކެއްގެ މައްޗަށް ދޫވަނީ މިކަންކަން ބެލުމުގެ ޒިންމާ މަތިކޮށްފައިވާ މީހުންގެ ފަރުވާކުޑަކަމުން ކަމަށް ފާހަގަކުރި އެވެ.
"މިފަދަ ސީރިއަސް އަދި ބޮޑު ޓެރަރިޒްމްގެ މައްސަލައެއްގައި ހައްޔަރުކުރެވުނު މީހަކު، މި ބާވަތުގެ ގާނޫނީ ހުއްޖަތެއްގައި ދޫވެދިއުމަކީ، ތަހްގީގުކުރާ އިދާރާ ނުވަތަ ޕްރޮސިކިޔުޓާ ޖެނެރަލް ނުވަތަ ކޯޓުން ކުރެ ކޮންމެ ވެސް ފަރާތަކުން ޓެރަރިޒަމްގެ މައްސަލަތަކުގައި ސަމާލުވެ، ފަރުވާތެރިވެ، ނުވަތަ ސީރިއަސް ވާންޖެހޭ މިންވަރަށް އަމަލުނުކުރުމުގެ ސަބަބުންކަމަށް ދެކެމެވެ،" އެމްޑީޕީގެ ބަޔާނުގައި ބުންޏެވެ.
އެމްޑީޕީން ބުނީ މިކަން މިގޮތަށް ވުމުން އެމްޑީޕީގެ ރައީސް، އަދި ރައްޔިތުންގެ މަޖިލިސް ރައީސް، މުހައްމަދު ނަޝީދު އަވަހާރަކޮށްލަން ދިން ހަމަލާގެ ތުހުމަތުވާ މީހުން ދޫވުމުގެ ކަންބޮޑުވުން ވެސް އެބައޮތް ކަމަށެވެ. ހަމަ އެއާ ވިދިގެން އެ މީހުންގެ މައްޗަށް އުފުލާފައިވާ ދައުވާތަކާ މެދު ވެދާނެ ގޮތަކާ މެދު ވެސް ސުވާލު އުފެއްދި އެވެ.
އެމްޑީޕީގެ ބަޔާން ނިންމާލަމުން ވަނީ ރާއްޖެއަށް ކުރިމަތިވެފައިވާ ޓެރަރިޒަމްގެ ނުރައްކަލާ މެދު އިހުމާލުނުވެ، ސީރިއަސް ވުމަށް ދައުލަތު ކަމާބެހޭ ފަރާތްތަކަށް އިލްތިމާސްކޮށްފަ އެވެ.
އަމީންގެ މައްސަލައިގައި ޕްރޮސެކިޔުޓާ ޖެނެރަލް ހުސެއިން ޝަމީމް ވަނީ ހައި ކޯޓުން ގާނޫނު މަނާކުރީ ގޯސްކޮށް ކަމަށް ބުނެ އިސްތިއުނާފު ކުރާނެ ކަމަށް ވިދާޅުވެފަ އެވެ.
