އައްޑޫގައި ކުޑަ އަންހެން ކުއްޖަކު ރޭޕްކުރި ކަމަށް ތުހްމަތުކުރެވޭ ފުލުސް މީހާ ޝަރީއަތް ނިމެންދެން ބަންދުކުރަން ކޯޓުން އަމުރުކޮށްފި އެވެ.
މައްސަލައިގެ ތުހުމަތުވާ 34 އަހަރުގެ ފުލުސް މީހާ ހައްޔަރުކުރީ ރޭ ހައްޔަރުކޮށްފައިވަނީ, އޭނާ ހައްޔަރުނުކޮށްގެން އައްޑޫގައި މުޒާހަރާ ކުރަމުން ދަނިކޮށެވެ.
އެ މުޒާހަރާ ހޫނުވެ, ރޫޅާލުމަށް ފުލުހުން ބާރުގެ ބޭނުން ވެސް ކޮށްފައިވެ އެވެ.
ރައްޔިތުން ނުކުމެ, އެ ފުލުސް މީހާއާ ދެކޮޅަށް މުޒާހަރާ ކުރަން ޖެހުނީ އެ މައްސަލަ ނުބަލާ, އޮއްބާލަން މަސައްކަތް ކުރަމުންދާ ކަމަށް ބުނެ އެވެ. ނަމަވެސް, ފުލުހުން ވެސް އަދި ޖެންޑާ މިނިސްޓްރީން ވެސް ބުނަމުން ދިޔައީ މައްސަލަ ބަލަމުންދާ ކަމަށެވެ.
ފުލުސް މީހާއަށް ތުހުމަތު ކުރަނީ އޭނާގެ އަނބިމީހާއާ އާއިލީ ގޮތުން ގުޅުން އޮންނަ ކުއްޖަކާ ދެ އަހަރު ވަންދެން ބެހުނު ކަމަށެވެ. އެ ކުއްޖާއަށް 14 އަހަރުގައި އޭނާ ބެހެން ފެށި ކަމަށް ތުހުމަތު ކުރެ އެވެ. ކުއްޖާއަަށް މިހާރު 16 އަހަރެވެ.
އައްޑޫގައި މި މައްސަލަ ފެންމަތިވެފައިވަނިކޮށް, މިއަދު ގދ. ތިނަދޫގައި ވެސް ކުޑަކުއްޖަކަށް ޖިންސީ ގޯނާކުރި މައްސަލައެއް ވަނީ ފެންމަތިވެފަ އެވެ.
ކުޑަކުދިންނަށް ޖިންސީ ގޯނާކުރުމުގެ ރެކޯޑްސްތައް ރާއްޖޭގައި އުޅެނީ މަތީގަ އެވެ.
ރާއްޖޭގައި ކުޑަކުދިންނާ ދެކޮޅަށް ހިންގާ އަނިޔާތަކާ ގުޅޭ ގޮތުން ހެދި އެންމެ ފުރަތަމަ ދިރާސާގައިވާ ގޮތުން ބޮޑުވަމުންދާ ކުދިންގެ ތެރެއިން 15 ޕަސެންޓު ކުދިންނަށް ޖިންސީ ގޯނާއާ ކުރިމަތިލާން ޖެހެ އެވެ. ފެބްރުއަރީ 2009 ގައި ޝާއިއު ކުރި އެ ދިރާސާ ރިޕޯޓުގައި ބުނީ 20 ޕަސެންޓު އަންހެން ކުދިންނަށް އަދި 11 ޕަސެންޓު ފިރިހެން ކުދިންނަށް ޖިންސީ ގޯނާއާ ކުރިމަތިލާން ޖެހޭ ކަމަށެވެ.
