އަންނަ މަހު ބާއްވާ ގައުމީ ބީޗް ވޮލީބޯޅަ މުބާރާތުގައި އަލަށް އުމުރުފުރާ ދެ ޑިވިޝަނެއް ކުރިއަށް ގެންދަން ނިންމުމުގެ އެންމެ ބޮޑު ބޭނުމަކީ މުސްތަގުބަލުގައި ބައިނަލްއަގުވާމީ ލެވަލްގައި ރަން މެޑަލެއް ހޯދަން ކުރާ މަސައްކަތުގެ ފެށުމެއް ކަމަށް ވޮލީބޯލް އެސޯސިއޭޝަން (ވީއޭއެމް) އިން ބުނެފި އެވެ.
އަންނަ މަހު 7-30 އަށް ކުރިއަށް ގެންދަން ނިންމާފައިވާ ބީޗް ވޮލީބޯޅަ މުބާރާތަށް އިތުރު ކޮށްފައިވާ ދެ ޑިވިޝަނަކީ 19 އާއި 23 އަހަރުން ދަށުގެ ޑިވިޝަނެވެ. ދެން އޮންނާނީ މިހާތަނަށް ވެސް މި މުބާރާތުގައި ބާއްވަމުން އަންނަ އޯޕަން ޑިވިޝަނެވެ.
މި މުބާރާތުގެ ކޮންމެ ޑިވިޝަނެއްގައި ވެސް އަންހެން އަދި ފިރިހެން ބައި ވަކިން އޮންނާނެ އެވެ.
ވީއޭއެމް އިން ކުރިން ހަމައެކަނި އޯޕަން ޑިވިޝަނެއް ކުޅޭ ގޮތަށް ބާއްވާ މުބާރާތް އުމުރު ފުރާ ޑިވިޝަންތަކެއް ލައިގެން ކުރިއަށް ގެންދިއުމުގެ ބޭނުމަކީ ރާއްޖެ އަކީ ވަރަށް ގިނައިން ބައިނަލްއަގުވާމީ ލެވަލްގެ ބީޗް ވޮލީ މުބާރާތްތަކުގައި ކުޅޭ ގައުމަކަށްވާއިރު، މުސްތަގުބަލުގައި ރަނގަޅު ބީޗް ވޮލީބޯޅަ ޓީމުތަކެއް ވެސް ބޭއްވުމުގެ ބޭނުމުގަ އެވެ. އޭގެ ތެރެއިން ޓާގެޓެއް ކަނޑައަަޅައިގެން ޕްލޭނެއްގެ ތެރެއިން އެންމެ ހާއްސަ ބޭނުމެއްގެ ގޮތުގައި އޮތީ ބައިނަލްއަގުވާމީ ލެވަލްގައި ބީޗް ވޮލީބޯޅަ އިން ރާއްްޖެ އަށް ރަން މެޑަލެއް ހޯދުމަށެވެ.
ބީޗް ވޮލީ މުބާރާތުގައި ބައިވެރިވުމުގެ މުއްދަތު ހަމަވާނީ މިމަހުގެ 26 ވަނަ ދުވަހު އެވެ. އެ ދުވަހު މެންދުރު 12 ޖެހުމުގެ ކުރިން ޓީމް ލިސްޓް ހުށަހަޅަން ޖެހޭނެ ކަމަށް ވީއޭއެމުން ވަނީ ބުނެފަ އެވެ. މުބާރާތުގައި ބައިވެރިވުމުގެ ފޯމާއި ޓީމު ލިސްޓު އޮންލައިންކޮށް ހުށަހެޅުމުގެ އިންތިޒާމް ވީއޭއެމް އިން ވަނީ ހަމަޖައްސައިފަ އެވެ.
ދާދި ފަހުން 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގައި ބީޗް ވޮލީން ވަނީ ރިހި މެޑަލަކާއި ލޯ މެޑަލެއް ހޯދައިފަ އެވެ. ބީޗް ވޮލީގައި ރާއްޖޭން ވަނީ މެޑަލެއް ނުލިބުނު ކަމުގައި ވިޔަސް މީގެ ކުރިން ގިނަ މުބާރާތްތަކެއްގައި ރަނގަޅު ނަތީޖާ ނެރެފަ އެވެ.
