ދޯހާ، ގަތަރު (ސެޕްޓެމްބަރު 2) - އެމެރިކާގެ ފައުޖުތައް އަފްގާނިސްތާން ދޫކޮށް ދިޔަ ފަހުން ބަންދުކޮށްފައިވާ ކާބުލް އެއާޕޯޓު އަލުން ހުޅުވަން ތާލިބާނާއެކު ގަތަރުން މަސައްކަތް ފަށައިފި އެވެ.
އެމެރިކާގެ ފައުޖުތައް ފުރި ފަހުން އެއާޕޯޓަށް ޖެއްސި އެންމެ ފުރަތަމަ ފްލައިޓަކީ ޓެކްނީޝަނުންގެ ޓީމެއް ގޮވައިގެން އައި ގަތަރު އެއާވޭޒްގެ ފްލައިޓެކެވެ. ގަތަރުގެ ދޯހާއަކީ އަފްގާނިސްތާނު ދޫކޮށް ދިޔަ ގިނަ ރެފިއުޖީން ތިން ވަނަ ގައުމެއްގައި ދިރިއުޅުން ފެށުމުގެ ކުރިން މަޑުކުރާ ޕޮއިންޓެވެ.
ގަތަރުން ބުނީ ކާބުލް އެއާޕޯޓުގެ އޮޕަރޭޝަންތައް އެއްވެސް މައްސަލައެއް ނެތި އަވަހަށް ފެށުމަށް ބުރަ މަސައްކަތްތަކެއް ކުރަމުންދާ ކަމަށެވެ.
"އުއްމީދަކީ ވީ އެންމެ އަވަހަކަށް މަސައްކަތް ނިންމާ އެއާޕޯޓު އޮޕަރޭޓް ކުރަން ފެށުން،" ގަތަރުގެ ފޮރިން މިނިސްޓަރު ޝެއިހް މުހައްމަދު ބިން އަބްދުލް ރަހްމާން އަލް ސާނީ ވިދާޅުވި އެވެ.
އޯގަސްޓު 15 ވަނަ ދުވަހު އަފްގާނިސްތާނުގެ ވެރިކަމަށް އައި ތާލިބާނުންނާއި ގަތަރުގެ ސަރުކާރާ މެދު ގާތް ގުޅުމެއް އޮވެ އެވެ.
"އަފްގާނިސްތާނުގެ ރައްޔިތުންނަށް ރައްކާތެރިކަމާއެކު ގައުމުން ފުރުމުގެ ހުއްދަ ދިނުމާއި ދަތުރު ކުރުމުގެ މިނިވަންކަން ދޭނެ ކަމަށް ތާލިބާނުން ވެފައިވާ ވައުދު ތަންފީޒު ކުރާ މަންޒަރު ފެނުން ވަރަށް މުހިއްމު".
ޝެއިހް މުހައްމަދު އިތުރަށް ވިދާޅުވީ އެއާޕޯޓު އަލުން ހުޅުވުމާ ގުޅޭ މަޝްވަރާތަކުގައި ތުރުކީން ވެސް ބައިވެރިވަމުންދާ ކަމަށާއި އެ ގައުމުން ޓެކްނިކަލް އެހީތެރިކަން ލިބޭނެ ކަމަށެވެ.
ބުރާސްފަތި ދުވަހު ތުރުކީން ބުނީ އެއާޕޯޓާ ގުޅޭ ގޮތުން ތާލިބާނުންނާއި ބައެއް އެހެން ފަރާތްތަކުން ހުށަހެޅު ހުށަހެޅުންތައް އިވެލުއޭޓް ކުރަމުންދާ ކަމަށެވެ.
ތުރުކީގެ ފޮރިން މިނިސްޓަރު މެވްލުތް ކަވުސޮގްލޫ ވިދާޅުވީ އެންމެ ބޮޑު އިސްކަމެއް ދޭނީ އެއާޕޯޓުގެ ބޭރާއި އެތެރޭގެ ސެކިއުރިޓީއަށް ކަމަށެވެ.
އަފްގާން ސިވިލް އޭވިއޭޝަން އޮފިޝަލަކު ގަތަރުގެ އަލްޖަޒީރާ ނޫހަށް ބުނީ ކާބުލް އެއާޕޯޓުގެ އޮޕަރޭޝަންތައް ވަރަށް އަވަހަށް ފަށާނެ ކަމަށެވެ.
"ޑޮމެސްޓިކް ފްލައިޓުތައް ހުކުރު ދުވަހު ފަށާނެ. އެކަމަކު އިންޓަނޭޝަނަލް ފްލައިޓުތައް އަލުން ފެށުމަށް ވަގުތު ނަގާނެ".
