ވެލާނާ އިންޓަނޭޝަނަލް އެއާޕޯޓުގައި އިމާރާތްކޮށްފައިވާ އާ ސީޕްލޭން ޓާމިނަލްގެ އެގްޒެކެޓިވް ލައުންޖް ހިންގާނެ ބަޔަކު ހޯދަން އެއާޕޯޓްސް ކުންފުނި (އެމްއޭސީއެލް) އިން އިއުލާނުކޮށްފި އެވެ.
މިކަމާއި ގުޅިގެން އެމްއޭސީއެލްއިން ކުރި އިއުލާނުގައި ބުނީ މި ލައުންޖަށް ކުރިމަތިލެވޭނީ ރާއްޖޭގައި ރަޖިސްޓްރީކޮށްގެން ހިންގާ ރިސޯޓުތަކާއި، ސީޕްލޭން އޮޕަރޭޓަރުންނާއި، ޓުއާ އޮޕަރޭޓަރުންނަށް ކަމަށެވެ. އަދި މީގެ ތެރެއިން ލައުންޖް ހިންގަން ޝައުގުވެރިކަން ހުރި ފަރާތްތަކުން އެކަމަށް އެދި ބިޑު ހުށައެޅުމަށް ވަނީ ހުޅުވާލާފަ އެވެ.
މި އެގްޒެކެޓިވް ލައުންޖް އެމްއޭސީއެލްއިން ދޫކުރަނީ ގޮޅިތަކަށް ބަހާލައިގެންނެވެ. އަދި އެމްއޭސީއެލްގެ އިރުޝާދާ އެއްގޮތަށް މި ގޮޅިތަކުގައި އިތުރަށް ކުރަން ޖެހޭ މަސައްކަތްތައް ނިންމާ، ހިންގަން ޖެހެނީ އެ ގޮޅި ލިބޭ ފަރާތުންނެވެ. އަދި އެއް ގޮޅިޔަށް ވުރެ ގިނަ ގޮޅިޔަށް ވެސް އެއް ފަރާތަކަށް ހުށައެޅި ދާނެ އެވެ.
އެމްއޭސީއެލްއިން ބުނީ މި ލައުންޖްތައް ހިންގަން ޝައުގުވެރިވާ ފަރާތްތަކުން 12 ސެޕްޓެމްބަރުގެ ކުރިން ބިޑު ހުށައަޅަން ރަޖިސްޓްރީ ވުމަށް ފަހު، 27 ސެޕްޓެމްބަރުގެ ކުރިން ބިޑު ހުށަހަޅަން ޖެހޭ ކަމަށެވެ. އަދި އެދޭ ކޮންމެ ގޮޅިޔަކަށް ބިޑް ސެކުއިރިޓީގެ ގޮތުގައި 10،000 ޑޮލަރު (154،200ރ.) ދައްކަން ޖެހެ އެވެ.
މީގެ ކުރިން ވެސް އެމްއޭސީއެލްއިން އާ ޓާމިނަލުގައި ލައުންޖްތައް ހިންގަން ހުޅުވާލި އެވެ. އަދި އެކަމަށް ގިނަ ފަރާތްތަކަކުން ކުރިމަތިލި އެވެ. މިއީ އެ ބިޑުތައް ކެންސަލް ކުރުމަށް ފަހު އަލުން ހުޅުވާލި ޖާގައެއްތޯ ނޫނީ މުޅިން އާ ޖާގަތަކެއްތޯ އެމްއޭސީއެލްއިން އޮޅުންފިލުވަން ކުރި މަސައްކަތް ވަނީ ނާކާމިޔާބުވެފަ އެވެ.
އާ ސީޕްލޭން ޓާމިނަލަކީ ވެލާނާ އެއާޕޯޓު ތަރައްގީކުރުމުގެ މަޝްރޫއުގެ ތެރެއިން، 55 މިލިއަން ޑޮލަރު (850 މިލިއަން ރުފިޔާ) ހަރަދުކޮށްގެން ތަރައްގީކުރާ ތަނެކެވެ. ހަތަރު ފަންގިފިލާގެ މި ޓާމިނަލަކީ މިހާރު ބޭނުންކުރާ ޓާމިނަލަށް ވުރެ ޖާގައިގެ ގޮތުން ތަނަވަސް، ޒަމާނީ ވަސީލަތްތައް ހުންނަ ޓާމިނަލެކެވެ.
އެމްއޭސީއެލްއިން މައުލޫމާތު ދީފައިވާ ގޮތުގައި މިހާރު ކުރިޔަށްދަނީ ޓާމިނަލު ނިންމުމުގެ ކުރިން ނިންމަން ޖެހޭ އެންމެ ފަހު މަސައްކަތްތަކެވެ. އަދި އެއްކޮށް ޓާމިނަލް ހަވާލުކުރާނީ އެ މަސައްކަތް ނިމުމުން ކަމަށް އެމްއޭސީއެލްއިން މައުލޫމާތު ދެ އެވެ. އެކަމަކު ކުއްޔަށް ދޫކޮށްފައިވާ ލޯންޖުތަކުގެ ފިނިޝިން އާއި އެހެނިހެން މަސައްކަތްތައް ނިންމުމަށް ޓާމިނަލް ބޭނުންކުރެވޭ ގޮތަށް ވަނީ ހަމަޖައްސައިދީފަ އެވެ.
