ޕޯސްޓާއި ވައިގެ މަގުން ރާއްޖެ އެތެރެ ކުރި ހަތް ކިލޯގެ މަސްތުވާތަކެތި އަތުލައިގެންފައިވާ ކަމަށް މޯލްޑިވްސް ކަސްޓަމްސް ސާވިސް އިން ބުނެފި އެވެ.
މިއަދު އާންމު ކުރި ސޯޝަލް މީޑިއާ ޕޯސްޓެއްގައި ކަސްޓަމްސް އިން ބުނީ، މަސްތުވާތަކެތި އަތުލައިގަތީ ޖޫން 18، އަދި ޖޫން 29، ގައި ކަމަށެވެ.
ޖޫން 18، ގައި އަތުލައިގަތީ ޕޯސްޓު މެދުވެރިކޮށް އެތެރެ ކުރަން އުޅުނު 3.6 ކިލޯގެ ސިންތެޓިކް ކެތިނޯން ކަމަށެވެ. އެ ތަކެތި ހިފެހެއްޓީ ޕޯސްޓު އޮފީހުންނެވެ. އެ ތަކެތީގެ މަގުމަތީ އަގު ފަސް މިލިއަން ރުފިޔާއަށް އަރަ އެވެ.
ޖޫން 29، ގައި އަތުލައިގަތީ 3.5 ކިލޯގެ ކެނަބިހާއި ހަޝިޝް އޮއިލް ކަމަށް ކަސްޓަމްސް އިން ބުނެ އެވެ. އެއީ ކެނަބިހުގެ 740 ގުރާމާއި ހަޝިޝް އޮއިލްގެ 2.7 ކިލޯ އެވެ. އެ ތަކެތި އަތުލައިގަތީ ވެލާނާ އިންޓަނޭޝަނަލް އެއާޕޯޓުންނެވެ. އެ ތަކެތީގެ މަގުމަތީ އަގު 2.7 މިލިއަން ރުފިޔާއަށް އަރަ އެވެ.
ދިވެހިރާއްޖޭގައި މަސްތުވާތަކެތި ބޭނުން ކުރާ މީހުންގެ އަދަދު 10،000 އަށް ވުރެ މަތިވާނެ ކަމަށް ބެލެވެ އެވެ. ނަމަވެސް ފަރުވާގެ ނިޒާމު ބަލިކަށިކަމުން އެ ނިޒާމުގެ ތެރެއަށް ވެއްދޭ މީހުންގެ އަދަދު ވަރަށް މަދެވެ.
ނަޖިސް ފެން ތަހުލީލުކޮށްގެން ބޭރުގެ ސައިންޓިސްޓުން ރާއްޖޭގައި ހެދި ދިރާސާއަކުން ދައްކާ ގޮތުގައި މާލޭގައި އެންމެ ގިނަ މީހުން ބޭނުން ކުރާ މަސްތުވާތަކެއްޗަކީ ރަލެވެ. ރަލަށްފަހު، ނަޖިސް ފެނުގައި އެންމެ ގިނައިން ހުރި ކަމަށް ދައްކަނީ ޓީއެޗްސީ (ކެނަބިސް) އާއި އެކި ބާވަތްތަކުގެ ކެމިކަލް ޑްރަގްސް އެވެ.
މި ވެރިކަމުގައި 1313 ކިލޯގެ މަސްތުވާތަކެތި މިހާތަނަށް އަތުލައިގަނެފައިވާ ކަމަށް ރައީސް އޮފީހުން ވަނީ މިފަހުން ބުނެފަ އެވެ. އަދި މަސްތުވާތަކެތީގެ އެކި މައްސަލަތަކުގައި 2588 މީހުން ހައްޔަރުކޮށް، އޭގެ ތެރެއިން 420 މީހަކު ރިހެބިލިޓޭޝަނަށް ފޮނުވާފައިވާ ކަމަށް ވެސް ސަރުކާރުން ބުނެ އެވެ.
