ގްރޭޓާ މާލެ ސަރަހައްދުގައި ހިމެނޭ ރަށްތައް ގުޅާލަން ހިންގާ މާލެ-ތިލަފުށި ލިންކް މަޝްރޫއުގެ މަސައްކަތް އިންޑިއާގެ އެފްކޮންސް ކުންފުންޏާ މިއަދު ހަވާލުކޮށްފި އެވެ.
ގާތްގަނޑަކަށް 7.7 ބިލިއަން ރުފިޔާ ހޭދަވާނެ ކަމަށް ބެލެވޭ މި މަޝްރޫއަކީ މިހާތަނަށް ރާއްޖޭގައި ހިންގޭ އެންމެ ބޮޑު އުމްރާނީ ތަރައްގީގެ މަޝްރޫއެވެ. މި ޕްރޮޖެކްޓަށް ހަރަދުކުރަނީ އިންޑިއާ ސަރުކާރުން ދިން 100 މިލިއަން ޑޮލަރުގެ ހިލޭ އެހީ އާއި އިންޑިއާ އެގްޒިމް ބޭންކުން ހަމަޖެހިފައިވާ 400 މިލިއަން ޑޮލަރުގެ ލޯނުންނެވެ.
މާލެ-ތިލަފުށި ލިންކް ދަށުން މާލެ އާއި، ވިލިމާލެ އާއި، ގުޅިފަޅާއި، ތިލަފުށި ގުޅާލާނެ އެވެ. އަދި މި ލިންކު ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމު ކުރެވޭނެ އެވެ.
މި ލިންކުގައި ހިމެނޭ ކޮންމެ ބްރިޖެއްގައި ވެސް ކަނޑު އުޅަނދުފަހަރަށް ދަތުރުކުރެވޭ ގޮތަށް ނެވިގޭޝަން ބްރިޖް ބައެއް ހިމެނޭނެ އެވެ. މިއީ 70 މީޓަރު ފުޅާ 12 މީޓަރު އުސް މިނުގައި ކޮންމެ ކަނޑުއޮޅިއެއްގައި ގާއިމު ކުރެވޭ ބްރިޖްތަކެކެވެ. މިތަނުގެ ދަށުން ބޮޑެތި މަސް ދޯނިފަހަރަށާއި، މުދާ އުފުލާ ދޯނިފަހަރާއި، ބާޖުތަކަށް ދަތުރުކުރެވޭނެ އެވެ. އެކަމަކު އެއްވެސް ސައިޒެއްގެ އާގުބޯޓަކަށް ދަތުރެއް ނުކުރެވޭނެ އެވެ.
ސަރުކާރުން މި މަޝްރޫއަށް އެންމެ ބޮޑު އިސްކަމެއްދޭ ސަބަބުތަކުގެ ތެރޭގައި މާލޭ ކޮމާޝަލް ބަނދަރު ގުޅީފަޅަށް ބަދަލު ކުރުމުގެ މަޝްރޫއު ހިމެނެ އެވެ. އަދި މި ސަރަހައްދުގެ ހުރިހާ ރަށެއް ގުޅާލުމުގެ މައިގަނޑު ބޭނުމަކީ ޕޯޓުގެ މަސައްކަތް ގުޅިފަޅަށް ބަދަލުކުރުމާއި ތިލަފުށީގައި ހިންގާ އިންޑަސްޓްރިއަލް މަސައްކަތްތަކާ ގުޅުވާލުމެވެ.
މީގެ ސަބަބުން އިގުތިސޯދަށް، ހާއްސަކޮށް އެކްސްޕޯޓާއި އިމްޕޯޓުގެ ދާއިރާއަށް ބޮޑު ކުރިއެރުމެއް ލިބޭނެ ކަމަށް ސަރުކާރުން ބުނެ އެވެ. އަދި މި ލިންކުގެ ސަބަބުން މާލޭ ސަރަހައްދުގެ ހުރިހާ ރަށްތަކެއް ގުޅާލެވުމުން އާންމުންނަށާއި ވިޔަފާރިތަކުގެ ހިދުމަތްތައް އިތުރަށް ފުޅާވެ، ގިނަ ފުރުސަތުތަކެއް ހުޅުވިގެން ދާނެ ކަމަށް ވަނީ ބުނެފަ އެވެ.
މި މަޝްރޫއުގެ މަސައްކަތް ކުރިޔަށްދަނީ ދެ ބަޔަކަށް ބަހާލައިގެންނެވެ. މިގޮތުން ފުރަތަމަ ބައިގައި ހިމެނެނީ މާލެއިން ގުޅީފަޅަށް ގުޅާލުމެވެ. މި މަސައްކަތް 27 މަސް ދުވަހުގެ ތެރޭގައި ނިންމާލެވޭނެ ކަމަށް ލަފާކުރެވެ އެވެ. ދެވަނަ ބައިގައި ހިމެނެނީ ތިލަފުށިން ގުޅިފަޅަށް ގުޅާލުމެވެ.
މި މަސައްކަތް ނިންމަން 32 މަސް ހޭދަވާނެ އެވެ. އެކަމަކު މި ދެބައިގެ މަސައްކަތް ފަށާނީ އެއްފަހަރާ އެވެ.
މި މަސައްކަތް ހަވާލުކުރި އިންޑިއާގެ އެފްކޮންސް ކުންފުންޏަކީ މިފަދަ މަސައްކަތް ކުރުމުގެ ގާބިލުކަން ލިބިފައިވާ ތަޖުރިބާކާރު ކުންފުންޏެކެވެ. އެގޮތުން އިންޑިއާ އަދި އެފްރިކާ ބައްރުގައި ބޮޑެތި މަޝްރޫއުތަކެއް މި ކުންފުނިން ވަނީ ކާމިޔާބުކޮށްފަ އެވެ.
