އެކަށީގެންވާ އަދަދެއްގެ ގިނަ ރައްޔިތުން އެދޭ ނަމަ ވެރިކަން ހިންގުމުގެ ނިޒާމާމެދު އާންމު ރައްޔިތުންގެ ވޯޓަކަށް ދިޔުމުގެ މަސައްކަތް ސަރުކާރުން ކުރާނެ ކަމަށް ތަރުޖަމާނު މަބްރޫކް އަޒީޒް މިއަދު ވިދާޅުވެއްޖެ އެވެ.
މިއަދު ރައީސް އޮފީހުގައ ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު މަބްރޫކް ވިދާޅުވީ ބަރުލަމާނީ ނިޒާމެއް ގެނައުމަށް ގޮވާލާ މިހާރު ސޮއި ކުރަމުންދާ ޕެޓިޝަންގައި ގިނަ އަދަދެއްގެ ރައްޔިތުން ސޮއި ކޮށްފި ނަމަ, އެ މަސައްކަތަށް ރައީސް ހުރަސްނުއަޅުއްވާނެ ކަމަށެވެ.
ޕެޓިޝަން ރައީސް އޮފީހަށް ފޮނުވައިފި ނަމަ އެއާމެދު އަޅަންޖެހޭ ފިޔަވަޅުތައް ގަވާއިދުން އަޅާނެ ކަމަށް ވެސް މަބްރޫކް ވިދާޅުވި އެވެ.
"އެއީ އަދި ރައްޔިތުންގެ މަޖިލިހަށް ޕެޓިޝަން ކުރެވިގެން އައި ކަމެއް ނަމަވެސް ރައީސް ގަބޫލު ކުރައްވަނީ ރައްޔިތުންގެ ރިފަރެންޑަމަކުންނޭ ގޮތެއް ނިންމަންޖެހޭނީ،" އޭނާ ވިދާޅުވި އެވެ.
ވެރިކަން ހިންގާ ނިޒާމު ބަދަލު ކުރުމަށް ގޮވާލާ ޕެޓިޝަނެއްގައި ސޮއި ކުރަމުންދާއިރު އެމްޑީޕީގެ ވަރަށް ގިނަ އާންމު މެމްބަރުންނާއި އެ ޕާޓީގެ ޕާލަމެންޓަރީ ގްރޫޕުގެ މެމްބަރުން ގެންދަނީ ސޮއި ކުރަމުންނެވެ. ޕެޓިޝަން ތައްޔާރު ކުރާ ފަރާތްތަކުން ބުނަނީ އަމާޒަކީ އެ ޕެޓިޝަނަށް 100،000 ސޮއި ހޯދުން ކަމަށެވެ.
އެ ޕެޓިޝަންގައި ސޮއި ކުރުމުގެ މަސައްކަތް ފަށާފައި މި ވަނީ މި ހިނގާ ރިޔާސީ ދައުރުގެ މެދު ތެރެއިން ނިޒާމުގެ ވޯޓަކަށް ގޮސް ބަރުލަމާނީ ނިޒާމަކަށް ވެރިކަން ހިންގުން ބަދަލު ކުރުމަށް ކުރީގެ ރައީސް މުހައްމަދު ނަޝީދު ގޮވާލައްވާފައި އޮއްވަ އެވެ.
ބަރުލަމާނީ ނިޒާމަށް ހިންގުން ބަދަލު ކުރުމަށް ގޮވާލެއްވުމަށްފަހު ނަޝީދު ވަނީ ރައީސް ސޯލިހާއެކު ސިޔާސީ ގޮތުން ހުންނެވެން ނެތްކަން ވެސް އިއުލާން ކުރައްވައިފަ އެވެ. އަދި އިދިކޮޅު ޕީޕީއެމް އަދި ކުރީގެ ރައީސް އަބްދުﷲ ޔާމީނާއެކު ކޯލިޝަނެއް ހެއްދެވުމަށް ބޭނުންވެވަޑައިގަންނަވާ ކަމަށް ވެސް ނަޝީދު ވަނީ ވިދާޅުވެފަ އެވެ.
ނިމިދިޔަ 2018 ވަނަ އަހަރުގެ ރިޔާސީ އިންތިހާބަށް މިހާރު ވެރިކަން ހިންގާ އެމްޑީޕީގެ ފަރާތުން ނެރުނު މެނިފެސްޓޯގައި ބުނެފައި ވަނީ ބޮޑުވަޒީރަކު ހުންނަވާ ގޮތަށް ވެރިކަން ހިންގުމުގެ ނިޒާމު އިސްލާހު ކުރާނެ ކަމަށެވެ.
"... ގާނޫނު އަސާސީ އިސްލާހު ކުރުމަށްފަހު އެކުލަވާލެވޭ ސަރުކާރުގައި ބޮޑުވަޒީރާއި އޭނާގެ ކެބިނެޓް އެކުލަވާލެވޭނީ މަޖްލިސް ތެރެއިން. މިހެން މި ބަދަލު ގެނައުމުން ސަރުކާރުގެ މަތިބަރުކަން މާބޮޑަށް ކުޑަ ކުރެވިގެންދާނެ،" އެ މެނިފެސްޓޯގައިވެ އެވެ.
އޭގެ އިތުރުން ކޯލިޝަން މެނިފެސްޓޯގައި ވެސް ވެރިކަން ހިންގުމުގެ ނިޒާމު އިސްލާހު ކުރުމުގެ ވާހަކަ ދައްކާފައިވެ އެވެ. އެގޮތުން "ރާއްޖޭގެ ވެރިކަން ހިންގުމުގެ ނިޒާމު ހަރުދަނާކުރުމަށްޓަކައި ގާނޫނު އަސާސީއަށް ގެންނަންޖެހޭ ބަދަލުތައް ގެނައުން" އެއީ ކުރާނެ މަސައްކަތެއްގެ ގޮތުގައި އެ މެނިފެސްޓޯގައި ލިޔެފައިވެ އެވެ.
