އއ. އަތޮޅުގައި އޮންނަ ވެލިގަނޑު އައިލެންޑް ރިސޯޓުން މަޑިވަރު ފަޅުގެ ބައެއް ގަވައިދާ ހިލާފަށް ހިއްކަމުންދާތީ އެކަން ހުއްޓުވައި ދިނުމަށް ގޮވާލައި ހުށަހެޅި މައްސަލަ ރައްޔިތުންގެ މަޖިލީހުން މިއަދު ބަލައިގެންފި އެވެ.
ކްރައުން ކޮމްޕެނީން ހިންގާ ވެލިގަނޑު އައިލެންޑް ރިސޯޓުގެ ބައެއްގެ ގޮތުގައި ހަދާފައިވާ ވެލިފިނޮޅު ބޮޑުކުރަން ފަޅު ހިއްކުމުގެ ތެރޭގައި އެ ސަރަހައްދުގެ ފަރުތަކަށާއި ހިމާޔަތް ކޮށްފައިވާ މަޑިވަރު ފަޅަށް ގެއްލުންވަމުންދާ ކަަމަށް ރަސްދޫ ކައުންސިލުން ވަނީ ބުނެފަ އެވެ.
އެކަމާ ގުޅިގެން ރަސްދޫގެ ބަޔަކު މުޒާހަރާކުރަން ފެށުމާ ގުޅިގެން އެންވާރަމެންޓަލް ޕްރޮޓެކްޝަން އެޖެންސީ (އީޕީއޭ) އިން މިވަގުތަށް ހުއްޓުވާފަ އެވެ.
ނަމަވެސް، އެ މަސައްކަތް ދާއިމީކޮށް ހުއްޓުވައި ދިނުމަށް ގޮވާލައި، ތޮއްޑޫ ދާއިރާގެ މެމްބަރު ހަސަން ޝިޔާން މިއަދު މަޖިލީހަށް ހުށަހެޅުއްވި މައްސަލާގައި ބުނެފައިވަނީ ޑައިވިން އަދި ސްނޯކްލިންއަށް މަގުބޫލު ޕޮއިންޓުތަކެއް އެ ފަޅުގައި ހިމެނޭއިރު، ވެލިގަނޑު ރިސޯޓުން ހިއްކުމަށް ކުރާ މަސައްކަތްތަކުން އެ ސަރަހައްދަށް ގެއްލުންވަމުންދާ ކަމަށެވެ.
އަދި އެ މަޝްރޫއުއަށް ވެލި ނަގަމުންދަނީ، އީޕީއޭއިން މީގެ ކުރިން ވެލި ނެގުން މަނާކޮށްފައިވާ ސަރަަހައްދަކުން ކަމަށާއި ހުއްދަ ދީފައިވާ ސަރަހައްދުގެ ބޭރުން ބޮޑު ބައެއް ވެސް އެ ރިސޯޓުން ހިއްކާފައިވާ ކަމަށް އެ މައްސަލައިގައި ބުނެފައި ވެ އެވެ.
އެހެންކަމުން، އެ މަޝްރޫއު ހުއްޓުވައި ދިނުމަށް ކަމާގުޅޭ އިދާރާތަކަށް އެ މައްސަލައިގައި ވަނީ ގޮވާލައިފަ އެވެ.
އެ މައްސަލަ މިއަދުގެ ޖަލްސާގައި މަޖިލީހަށް ބަލައިގެންފައިވަނީ، އެކަމަށް ނެގުނު ވޯޓުގައި ބައިވެރިވެވަޑައިގެންނެވި 31 މެމްބަރުންގެ އިއްތިފާގުންނެވެ.
މަޑިވަރު ފަޅު ސަރަހައްދު ސަރުކާރުން ހިމާޔަތް ކޮށްފައި ވަނީ އޮކްޓޯބަރު 7، 2018 ގަ އެވެ. އެ ފަހުން 2019ގައި އެ ފަޅު ކައިރި ރަށްރަށުގެ މީހުން ވިޔަފާރި އުސޫލުން ވެލިނަގައިގެން ވިއްކުމާއި އެ ރަށްރަށު މީހުން އަމިއްލަ ބޭނުމަށް މަޑިވަރު ފިނޮޅާ ދުރުން ވެލި ނެގުމުން، ވެލިގަނޑާއި މަޑިވަރާ ދޭތެރޭގެ އެއްވެސް ސަރަހައްދަކުން ވެލި ނެގުމަކީ މަނާ ކަމަށް އީޕީއޭއިން ވަނީ އަންގާފަ އެވެ.
މި މައްސަލައިގައި އީޕީއޭން ބުނީ ވެލިގަނޑު ރިސޯޓުގައި ކުރިއަށްގެންދާ މަސައްކަތްތަކުގެ ސަބަބުން ރިޒޯޓުގެ ފަޅުން ބޭރަށް ސެޑިމެންޓް ޕްލޫމް ދަތުރުކޮށް، ކައިރީގައިވާ ފަރުތަކަށް ސެޑިމެންޓްގެ އަސަރު ފޯރާފައިވާކަމުގެ ޝަކުވާތައް އެ އޭޖެންސީއަށް ލިބިފައިވާ ކަމަށެވެ. ސަރުކާރުގެ ކަމާ ގުޅުން ހުރި ފަރާތްތަކާއެކު، އެމައްސަލަ ބަލަމުން އަންނަ ކަމަށް އީޕީއޭ އިން ބުންޏެވެ.
"އެ ސެޑިމެންޓްގެ އަސަރު ކުޑަކުރުމަށް އިތުރު ފިޔަވަޅުތައް އެޅުމަށާއި، މަޝްރޫއުގެ ބައެއް މަސައްކަތްތައް ވަގުތީގޮތުން މަޑުޖައްސާލަން މި އެޖެންސީން ވަނީ އަންގާފައި،" އީޕީއޭ އިން ބުންޏެވެ.
އެ މަޝްރޫއު ވަގުތީ ގޮތުން ހުއްޓުވާފައިވީ ނަމަވެސް، އެ މަސައްކަތް އަލުން ފަށައިފިނަމަ، އަލުން މުޒާހަރާކުރާނެ ކަމަށް އެކަމުގައި އުޅޭ މީހުން ވަނީ ބުނެފަ އެވެ.
