ކިޔެވުމުގެ ބޭނުމަށް ސްކޫލުން ދިން ޓެބްލެޓް ވިއްކާލި އަންހެނަކު ޖަލަށްލާން ކުރިމިނަލް ކޯޓުން ހުކުމްކޮށްފި އެވެ.
ވިލިމާލޭގައި ދިރިއުޅޭ އާއިލާއެއްގެ ތެރޭ ހިނގި މި ހާދިސާގައި އަންހެން މީހާ ވަގަށް ނަގައި، ވިއްކާލާފައިވަނީ އޭނާގެ އެއްބަނޑު އެއްބަފާ ކޮއްކޮއަށް އެޑިއުކޭޝަން މިނިސްޓްރީން ދީފައިވާ ޓެބްލެޓެވެ.
ކުރިމިނަލް ކޯޓުން އާންމުކޮށްފައިވާ ޝަރީއަތް ނިންމި ގޮތުގެ ރިޕޯޓަށް ބަލާއިރު ޓެބްލެޓް ނަގައިގެން އަންހެން މީހާ ދިޔައިރު އޭނާ ހުރީ މަސްތުގެ ހާލަތުގަ އެވެ. އަދި، އެ ދިޔަ މަގުމަތީ އޭނާގެ ރައްޓެއްސަކަށް ޓެބްލެޓް ވިއްކާލީ 300 ރުފިޔާ އެވެ.
ޓެބްލެޓް ގެންދިޔަކަން އޭނާގެ މަންމައަށް އެނގިގެން އެކަމާ ސުވާލުކުރުމުން ބުނެފައިވަނީ މީހަކަށް ކުޅެލަން ދިނީ ކަމަށެވެ. އެ ޓެބްލެޓް އަނބުރާ ގެނައުމަށް މަންމަ އެންގުމުން، އޭނާގެ އެކުވެރިޔާ ގާތަށް ގޮސް ހުއްޓައި ފުލުހުން އެ ދެ މީހުން ހައްޔަރުކުރި އެވެ.
އޭގެފަހުން ފުލުހުން ވަނީ ޓެބްލެޓް، އަންހެންމީހާގެ މަންމައާ ހަވާލުކޮށްފަ އެވެ. އެއަށް އެއްވެސް ގެއްލުމެއް ލިބިފައެއް ނުވެ އެވެ. ނަމަވެސް، ޓެބްލެޓް ވަގަށް ނަގާފައިވާތީ ދަރިފުޅަށް ދައުވާ ކުރަން ބޭނުންވާ ކަމަށް މަންމަ ވަނީ ފުލުހުން ގާތު ބުނެ ބަޔާން ދީފަ އެވެ.
އެކަމާ ގުޅިގެން އެ މައްސަލާގައި ދައުވާކޮށް ދިނުމަށް އެދި ފުލުހުން ޕްރޮސިކިއުޓާ ޖެނަރަލްގެ އޮފީހަށް ފޮނުވުމުން އެމީހެއްގެ މުދަލަކަށް ހުއްދަ ނޫން ގޮތެއްގައި ބާރު ހިންގުމުގެ ދައުވާ އުފުލި އެވެ.
މި ދައުވާގެ ޝަރީއަތުގައި އަންހެންމީހާ ވަނީ ޓެބްލެޓް ވިއްކި ކަމަށް އިއުތިރާފުވެފަ އެވެ. އެހެންވެ، އޭނާގެ މައްޗަށް ކުށް ސާބިތުވާ ކަމަށް ކަނޑައަޅައި، ގާނޫނުލްއުގޫބާތުގެ ދަށުން ދެ މަހާއި 12 ދުވަހަށް ޖަލަށްލުމަށް މިދިޔަ ބުދަ ދުވަހު ކުރިމިނަލް ކޯޓުން ވަނީ ހުކުމްކޮށްފަ އެވެ.
