ދިވެހިރާއްޖެ އަށް 15.9 މިލިއަން ރުފިޔާގެ އަގުހުރި މަސްތުވާތަކެތި އެތެރެކޮށްގެން ފުލުހުން ހައްޔަރުކޮށްފައިވާ ބްރެޒިލް މީހާއާ ތަހުގީގުގެ ބޭނުމަށް ސުވާލުކުރުމަށްޓަކައި ޕޯޗުގީސް ބަސް އެނގޭ މީހެއްގެ އެހީއަށް ފުލުހުން އެދިއްޖެ އެވެ.
އެ މީހާ އަށް އިނގިރޭސި ބަހެއް ނޭގެ އެވެ. އޭނާ އަށް އެނގެނީ ބްރެޒިލްގެ ރަސްމީ ބަސް ކަމަށްވާ ޕޯޗުގަލް ބަހެވެ.
ފުލުހުން ކުރި ޓްވީޓެއްގައި ބުނީ ހިނގަމުންދާ ތަހުގީގަކަށް ޕޯޗުގީސް ތަރުޖަމާނެއްގެ ހިދުމަތް ހޯދަން މަސައްކަތްކުރާ ކަމަށެވެ. "އަދަދު" އަށް ކަށަވަރުވެފައިވާ ގޮތުގައި އެއީ ބްރެޒިލް މީހާގެ ތަހުގީގެވެ.
ފުލުހުން އެ ޓްވީޓްކުރުމުން އާއްމު މީހަކު ވަނީ، ފައިސާ ދީގެން ތަރުޖަމާނެއް ހޯދުމުގެ ބަދަލުގައި ގޫގަލް ޓްރާންސްލޭޓާ އެޕްލިކޭޝަން ބޭނުންކުރަން ގޮވާލައިފަ އެވެ. އެކަމަކު އެއީ ކުރެވޭނެ ކަމެއް ނޫނެވެ. ތައި ތަރުޖަމާނެއް ހޯދަން ފުލުހުން 2019 ވަނަ އަހަރު އިއުލާންކުރުމުން ގޫގަލް ޓްރާންސްލޭޓަރުގެ ވާހަކަ އައުމުން ފުލުހުން އޭރު ބުނީ "ގޫގަލް ޓްރާންސޭލަޓަރަކަށް ބަޔާނުގައި ސޮއިނުކުރެވޭ ކަމަށާއި" އަދި ކޯޓަށް ހެއްކެއްގެ ގޮތުގައި ހުށަނޭޅޭނެ" ކަމަށެވެ. މާނައަކީ ތަރުޖަމާކުރާ މީހާ، އެ މީހާ ދިން ބަޔާން ތެދުކަމަށް ސޮއިކުރަން ޖެހުމެވެ.
ފުލުހުން 2019 ވަނަ އަހަރު ވެސް ޕޯޗުގީސް ތަރުޖަމާނެއް ހޯދަން މަސައްކަތްކުރި އެވެ. މި ފަހަރު މި ތަހުގީގުކުރާ އުމުރުން 31 އަހަރުގެ ބްރެޒިލް މީހާ އަތުން މަސްތުވާތަކެތި ފެނުނީ، މޯލްޑިވްސް ކަސްޓަމްސް ސާވިސަސް އިން ބުނި ގޮތުގައި މިދިޔަ ހުކުރު މެންދުރުފަހު އެ މީހާ ވެލާނާ އިންޓަނޭޝަނަލް އެއާޕޯޓަށް ފޭބިއިރު އަމަލުތައް ހުރި ގޮތުން ޝައްކުކުރެވިގެން ލަގެޖް ބަލާފާސްކުރުމުން ކަމަށެވެ. އެތަކެތީގައި 3.197 ކިލޯގެ ބަރުދަން ހުއްޓެވެ.
"ފުރަތަމަ މަރުހަލާގައި ކަސްޓަމްސް އިން މިތަކެތި ޓެސްޓުކުރިއިރު މަސްތުވާތެކެތީގެ ބާވަތެއް ކަމުގައިވާ ކޮކެއިން އަށް ވަނީ ޕޮޒިޓިވްވެފަ އެވެ," ކަސްޓަމްސް އިން ބުންޏެވެ.
