ކޮވިޑުގެ ސަބަބުން ނޭދެވޭ އަސަރުކޮށްފައިވާ ޓޫރިޒަމް ދާއިރާގެ ކުދި އަދި މެދު ފަންތީގެ ވިޔަފާރިތަކަށް އަމާޒުކޮށްގެން ޔޫރަޕިއަން ޔޫނިއަން (އީޔޫ)އިން ދެ މިލިއަން ޔޫރޯ (36.2 މިލިއަން ރުފިޔާ)ގެ ހިލޭ އެހީ ފޯރުކޮށްދީފި އެވެ.
އެ އެހީގެ އެއްބަސްވުމުގައި އީޔޫގެ ފަރާތުން ސޮއި ކުރެއްވީ އެ ޖަމިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑެނިސް ޗައިބީ އެވެ.
ޓޫރިޒަމް މިނިސްޓަރު ޑރ. އަބްދުﷲ މައުސޫމާއި އިކޮނޮމިކް މިނިސްޓަރު ފައްޔާޒް އިސްމާއިލް ވެސް ބައިވެރިވެވަޑައިގެންނެވި އެ ރަސްމިއްޔާތުގައި ރާއްޖޭގެ ފަރާތުން އެ އެއްބަސްވުމުގައި ސޮއި ކުރެއްވީ މޯލްޑިވްސް ފަންޑް މެނޭޖްމަންޓް ކޯޕަރޭޝަންގެ އެމްޑީ ހަސަން މަނިކެވެ.
މި މަޝްރޫއުގެ މައިގަނޑު މަގުސަދަކީ ޓޫރިޒަމް ސިނާއަތުގައި ހަރަކާތްތެރިވާ ކުދި ވިޔަފާރިތައް ކޮވިޑުގެ ނޭދެވޭ އަސަރުތަކުން އަރައިގަނެ، އިގުތިސޯދު ސިންދަފާތު ކުރުމަށް އެހީތެރިވެދިނުން ކަމަށް އީޔޫން ބުންޏެވެ.
އެގޮތުން، މައިގަނޑު ދެ ބަޔަކަށް ބެހިފައިވާ މި މަޝްރޫއުގެ ދަށުން 1.4 މިލިއަން ޔޫރޯ ފައިސާގެ އެހީގެ ގޮތުގައި ވިޔަފާރިތަކަށް ފޯރުކޮށްދެވޭއިރު، ބާކީ 600،000 ޔޫރާ ބޭނުންކުރާނީ ތަމްރީން ޕްރޮގްރާމްތަކަށް ހާއްސަކޮށްގެންނެވެ.
ވިޔަފާރިތަކަށް ހިންގޭ ތަމްރީން ޕްރޮގްރާމްތަކުގެ ތެރޭގައި ވިޔަފާރި ހިންގުމާއި، މާލީ ހިސާބުތައް ބެލެހެއްޓުމުގެ އިތުރުން ދެމެހެއްޓެނިވި ގޮތެއްގައި ކުނި މެނޭޖްކުރުން ވެސް ހިމެނޭނެ ކަމަށް ވެސް އީޔޫއިން ބުނެފައި ވެ އެވެ.
ކޮވިޑުގެ ސަބަބުން އެންމެ ބޮޑު ގެއްލުމެއް ލިބެމުންދަނީ ޓޫރިޒަމް ދާއިރާގައި ހިމެނޭ ގެސްޓްހައުސްތަކާއި ސަފާރީ ފަދަ ކުދި ވިޔަފާރިތަކަށެވެ.
އެގޮތުން، 40 އެނދަށް ވުރެ ކުދި ވިޔަފާރިތަކަށް އަމާޒުކޮށްގެން ރާވާފައިވާ މި މަޝްރޫއުގެ ދަށުން 600 އަށް ވުރެ ގިނަ ގެސްޓްހައުސްތަކާއި ސަފާރީތަކަށް އެހީތެރިކަން ފޯރުކޮށްދެވޭނެ ކަމަށް އީޔޫން ވަނީ ލަފާކޮށްފަ އެވެ.
ކޮވިޑުގެ ބަލިމަޑުކަމާ ގުޅިގެން އީޔޫން މީގެ ކުރިން ވެސް ރާއްޖެއަށް ގިނަ އެހީތަކެއް ވަނީ ފޯރުކޮށްދީފަ އެވެ.
އެގޮތުން، ސިއްހީ ދާއިރާއަށް ފޯރުކޮށްދިން އެއް މިލިއަން ޔޫރޯގެ އިތުރުން އިގުތިސޯދު އަލުން ކޮޅަށް ޖެހުމަށް ޔޫރަޕިއަން އިންވެސްޓްމަންޓް ބޭންކު މެދުވެރިކޮށް ހަމަޖައްސައިދިން 20 މިލިއަން ޔޫރޯގެ ލޯނެއް ވެސް ވަނީ ދީފަ އެވެ.
