ކޮވިޑާ ދެކޮޅަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އަޅާފައިވާ ފިޔަވަޅުތަކާ ހިލާފަށް މީހުން ދިރިއުޅޭ ގެސްޓްހައުސްތަކަށް ފަތުރުވެރިން ގެންނަ މައްސަލަ ބޮޑުވެ، އެކަން ހުއްޓުވަން އިންސްޕެކްޝަނަށް ނުކުންނަން ނިންމައިފި އެވެ.
އެޗްޕީއޭ މިއަދު ކުރި އިއުލާނެއްގައި ބުނީ މާލެއާއި މީހުން ދިރިއުޅޭ ރަށްރަށުގައި ޗުއްޓީ ހޭދަކުރަން އަންނަ ފަތުރުވެރިން އާދެވޭނީ ރާއްޖޭގައި ބޭނުންކުރުމަށް ހުއްދަ ދީފައިވާ ކޮވިޑު ވެކްސިނެއްގެ ޑޯޒްތައް ފުރިހަމަކޮށް، ރާއްޖެއަށް ދަތުރުކުރާ ތާރީހަށް 14 ދުވަސް ވެފައިވާ ފަރާތްތަކަށް ކަމަށް އަންގާފައިވާ ކަމަށެވެ.
އަދި ވެކްސިންގެ ޑޯޒްތައް ހަމަނުވާ ފަތުރުވެރިންނަށް މީހުން ދިރިއުޅޭ ރަށްރަށުގައި ހޮޓާތަކާއި، ގެސްޓް ހައުސް ތަކުގައި ތިބެވޭނީ އެރަށެއްގެ މުޅި އާބާދީގެ 60 ޕަސަންޓަށް މަތިވެފައިވާނަމަ ކަމަށް އިއުލާން ކޮށްފައި ކަމަށެވެ.
ނަމަވެސް އެ އުސޫލުތަކާ ހިލާފަށް ގިނަ އަދަދެއްގެ ފަތުރުވެރިން ރާއްޖޭގައި ޗުއްޓީ ހޭދަކުރަމުންދާ ކަމުގެ މައުލޫމާތު ލިބެމުންދާތީ، އުސޫލާ ހިލާފުވާ ފަރާތްތަކާމެދު އަޅަންޖެހޭ ފިޔަވަޅުތައް އެޅުމަށްޓަކައި މާދަމާ އިން ފެށިގެން އިސްޕެކްޝަންތައް ފެށުމަށް ހަމަޖެހިފައިވާކަމަށް އެޗްޕީއޭއިން ބުންޏެވެ.
"މޯލްޑިވްސް އިމިގްރޭޝަން، މޯލްޑިވްސް ޕޮލިސް ސާވިސް، މިނިސްޓްރީ އޮފް ޓުއަރިޒަމް، މިނިސްޓްރީ އޮފް އިކޮނޮމިކް ޑިވެލޮޕްމަންޓް، ލޯކަލް ގަވަމަންޓް އޮތޯރިޓީ އަދި މިއެޖެންސީ ގުޅިގެން މާލެއާއި މީހުން ދިރިއުޅޭ އެހެން ރަށްރަށުގައި މި އިންސްޕެކްޝަން ކުރިއަށް ގެންދެވޭނެ އެވެ،" އެ އިއުލާނުގައި އިތުރަށް ބުނެފައި ވެ އެވެ.
ގެސްޓްހައުސްތައް އިންސްޕެކްޓް ކުރަން އެޗްޕީއޭއިން ނިންމާފައި މި ވަނީ، ފަހަކަށް އައިސް އޮޅުވާލައިގެން ރާއްޖެއަށް ފަތުރުވެރިން އެތެރެކުރަމުންދާ މައްސަލަ ބޮޑުވެފައި ވަނިކޮށެވެ.
އެގޮތުން، އޮޅުވާލައިގެން ޓްރެފިކް ކުރި 180 އަށް ވުރެ ގިނަ ބިދޭސީން ރާއްޖެ އެތެރެވުމުގެ ހުއްދަ ނުދީ އިއްޔެ އަނބުރާ ފޮނުވާލާފައިވާއިރު، އޭގެ ކުރިން ރޭ ރާއްޖެ އައި ބަޔަކަށް ފަސް ތަރީގެ ހޮޓަލެއް ކަމަށް ބުނެ ބުކިން ހައްދާފައި އޮތީ ފަޅު ގެއެއްގެ ނަމުގަ އެވެ.
އެ 27 މީހުންނަށް މިހާރު ކަމާގުޅޭ އިދާރާތަކުން ވަނީ އެހީތެރިކަން ފޯރުކޮށްދީފަ އެވެ.
އެ މައްސަލައިގައި ޓުއަރިޒަމް މިނިސްޓަރު އަބްދުﷲ މައުސޫމް ވެސް ވަނީ ކަންބޮޑުވުން ފާޅުކޮށް އެއީ ޓުއަރިޒަމް ނޫން ކަމަށާއި އެއީ އިންސާނީ ވަގުފާރި ކަމަށް ބުނެފަ އެވެ.
