މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލާ ބިލާއެކު، ރައްޔިތުންގެ މަޖިލީހުގެ މި ހިނގާ ތިން ދައުރަށް މުހިންމު ބިލުތަކެއް ހުށަހަޅަން ސަރުކާރުން ތައްޔާރުވެއްޖެ އެވެ.
ބަންޑަރަނައިބުގެ އޮފީހުން ހާމަކޮށްފައިވާ މައުލޫމާތައް ބަލާއިރު، އިއްޔެ ފެށުނު މަޖިލީހުގެ ތިން ވަނަ ދައުރަށް އެކި ދާއިރާތަކުން ޖުމްލަ 32 ބިލެއް ހުށަހަޅަން ވަނީ ނިންމައިފަ އެވެ.
އޭގެ ތެރޭގައި، ގާނޫނީ އަދި ޝަރުއީ ދާއިރާއާ ގުޅުންހުރި ބިލުތަކާއި، ދީނީ އަދި އިޖްތިމާއީ ދާއިރާއާގުޅޭ ބިލުތަކާއި، އިގުތިސޯދީ އަދި ތިމާވެށީގެ ދާއިރާއާގުޅޭ ބިލުތައް ހިމެނެ އެވެ.
އެގޮތުން، މީޑިޔާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލައިގެން އުފައްދައި މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ބިލު ފާހަގަކޮށްލެވެ އެވެ.
އޭގެ އިތުރުން، ހެއްކާބެހޭ ބިލާއި، އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައި ދިނުމާއި ގާނޫނީ އެހީތެރިކަން ފޯރުކޮށްދިނުމާއި ޑިޕްލޮމެޓިކް އިމްތިޔާޒްތަކާ ބިލު ވެސް މި ދައުރަށް ހުށަހަޅަން ވަނީ ނިންމައިފަ އެވެ.
ވިޔަފާރީގެ ދާއިރާއިން ބަލާއިރު، ފޮރިން އިންވެސްޓްމަންޓުގެ ބިލާއި، އިލެކްޓްރޯނިކް މުއާމަލާތްތަކާއި، ކުންފުނިތަކާއި ޓްރޭޑްމާކުގެ ބިލެއް ވެސް ފާހަގަކޮށްލެވެ އެވެ.
އޭޖީ އޮފީހުގެ ލިސްޓަށް ބަލާއިރު، މަދަނީ ވައިގެ ދަތުރުފަތުރުގެ ބިލެއްގެ އިތުރުން ކުނި މެނޭޖްކުރުމަށްވެސް ހާއްސަ ބިލެއް ހުށަހަޅަން ސަރުކާރުން ވަނީ ނިންމައިފަ އެވެ.
ދެން އެންމެ ބޮޑަށް ފާހަގަކޮށްލެވޭ އެއް ބިލަކީ އިންޑަސްޓްރިއަލް ރިލޭޝަންސްގެ ބިލެވެ. މިއީ މަސައްކަތްތެރިންގެ ހައްގުތައް ރައްކާތެރިކޮށްދިނުމަށް ހާއްސަކޮށްގެން ފަރުމާކުރާ ބިލެކެވެ.
އެ ލިސްޓު ރައީސް އޮފީސް މެދުވެރިކޮށް ލިބިވަޑައިގެންފައިވާކަން މިއަދުގެ ޖަލްސާގައި ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވި އެވެ.
އެގޮތުން، ސަރުކާރުގެ ލެޖިސްލޭޓިވް އެޖެންޑާގެ ދަށުން އެ މަސައްކަތްތައް މަޖިލީހުގެ ތެރެއިން ކުރިއަށް ގެންދަވާނެ ކަމުގެ ޔަގީންކަން އީވާ ދެއްވި އެވެ.
ކޮވިޑުގެ ހާލަތު އޭރު ގޯސްވުމުގެ ސަބަބުން މަޖިލީހުގެ ޖަލްސާތައް ވެސް އޮންލައިންކޮށް ކުރިއަށް ގެންދަން ޖެހުމުގެ ސަބަބުން، ނިމުނު ދެވަނަ ދައުރުގައި މަޖިލީހުން ކުރި މަސައްކަތްތައް ނިސްބަތުން ދަށެވެ.
އެގޮތުން، ފުރަތަމަ ދައުރުގައި ނުނިމި ހުރި 25 ބިލަކާއި ދެވަނަ ދައުރުގައި ހުށަހެޅުނު 16 ބިލަކާއެކު ޖުމްލަ 41 ބިލެއްގެ މަސައްކަތް ކުރެވުނުއިރު، އެ ދައުރުގެ ތެރޭގައި ނިންމިފައިވަނީ ނުވަ ބިލެއްގެ މަސައްކަތެވެ.
އެ ނުވަ ބިލުގެ ތެރޭގައި ގެމަނަފުށި ދާއިރާގެ މެންބަރު އަހުމަދު ސައީދު ހުށަހަޅުއްވައި، އަނބުރާ ނެންގެވި ދެ ބިލެއް ވެސް ހިމެނެ އެވެ.
