ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މަޖީދީ މަގުގައި މޭ 6 ވަނަ ދުވަހުގެރޭ ބޮން ގޮއްވި މައްސަލަ ބަލަން ކްރިމިނަލް ކޯޓުން ތިން ފަނޑިޔާރުންގެ ބެންޗެއް އެކުލަވާލައިފި އެވެ.
އެ މައްސަލައިގައި ޖުމްލަ 10 މީހުން ހައްޔަރު ކުރި އިރު މިހާތަނަށް ދައުވާ ކުރަން ފޮނުވާފައި ވަނީ އަހުމަދު އަދުހަމް، 23، އާއި މުޖާޒް އަހްމަދު، 21 އަދި އިތުރުން ތަހުމީން އަހްމަދު، 32، ގެ މައްޗަށެވެ.
ބ. ދަރަވަންދޫން ފުލުހުން ހައްޔަރު ކުރި އަދި ކުރިން އެ އިދާރާގެ ޖާސޫސީ ޑިޕާޓްމަންޓުގައި މަސައްކަތް ކުރި އަހުމަދު ފާތިހު، 23، ގެ މައްޗަށް ދައުވާ ކުރުމަށް ވެސް ފުލުހުން ފޮނުވި އެވެ. ނަމަވެސް ޕްރޮސެކިއުޓާ ޖެނެރަލް ހުސެއިން ޝަމީމް ނިންމެވީ އޭނާގެ މައްޗަށް މިވަގުތު ދައުވާ ނުއުފުލުމަށެވެ.
ބޮން ގޮއްވި މީހުންގެ މައްސަލަތައް ބަލަން ތިން ފަނޑިޔާރުންގެ ބެންޗެއް އެކުލަވާލާފައިވާކަން ކްރިމިނަލް ކޯޓުގެ ރެޖިސްޓްރާ މުހައްމަދު އިބްރާހިމް "އަދަދު" އަށް ކަށަވަރުކޮށްދިނެވެ. ނަމަވެސް މައްސަލަތައް ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ބޭފުޅުންގެ ނަންތައް ހާމައެއް ނުކުރައްވަ އެވެ.
ދައުވާ ލިބޭ މީހުންގެ ތެރެއިން އަދުހަމަކީ ފާރަލުމަށްފަހު ރިމޯޓް ބޭނުންކޮށްގެން ބޮން ގޮއްވާލި މީހާ އެވެ. މުޖާޒްއަކީ އޭނާ ފިލުވުމަށް އެހީތެރިވެދިން މީހާ އެވެ. އަދި ތަހުމީނަކީ ބޮން ހަރުކޮށްފައި ހުރި ސައިކަލުގެ ވެރި މީހާ އެވެ.
އޭގެ ތެރެއިން ބޮން ގޮއްވާލި އަދުހަމް ކުށަށް އެއްބަސްވެ، ދައުލަތާއެކު އިއުތިރާފުގެ އެއްބަސްވުމަކަށްދާން ބޭނުންވާ ކަމަށް ވަނީ ބުނެފަ އެވެ. އެފަދަ އެއްބަސްވުމަށް ގޮސްފި ނަމަ އޭނާގެ އަދަބު ކުޑަކުރުމަށް ދައުލަތުން އެދޭނެ އެވެ.
ކޯޓުގައި މައްސަލަ އޮތް ތިން މީހުންނާއި ފާތިހުގެ އިތުރުން އެ މައްސަލައިގައި ހައްޔަރުކޮށްފައި ވަނީ މ. ކުދެހިގޭ، އިސްހާގާއި ގއ. ވިލިނގިލީ، ހުދުރުމާގޭ، ފަހުމީ އަލީ އާއި އއ. މާޅޮސް، އަސަރީގޭ މުހައްމަދު ނާޒިމާއި ހއ. ހޯރަފުށީ އަލަނާސިގޭ މުހައްމަދު ތަސްލީމް އަދި ހއ. މޮޅަދޫ، ބަހާރުގޭ އަބްދުﷲ އަލިމަނިކެވެ.
އޭގެ ތެރެއިން ތަސްލީމަކީ 2017 ވަނަ އަހަރު މާލޭގެ އޮފީހެއްގެ ތެރޭގައި ބޮމެއް ހެދި މައްސަލައިގައި ހައްޔަރު ކުރި މީހުންގެ ތެރޭގައި ހިމެނޭ މީހެކެވެ. މި މައްސަލައިގައި އޭނާ ހައްޔަރު ކުރި އިރު ހުރީ ބަންދުން ދޫކޮށްލައިފަ އެވެ.
ނަޝީދު އަވަހާރަކޮށްލަން ބޮން ގޮއްވާލާފައި ވަނީ ގެކޮޅުން ނިކުމެވަޑައިގެން ކާރުކޮޅަށް ހަމައަށް ވަޑައިގެންނެވި ތަނުންނެވެ. ބޮން ގޮއްވާލާފައި ވަނީ އެ ހަރުކޮށްފައި އިން ސައިކަލާ ނަޝީދު އެންމެ ކައިރިވި ވަގުތު ބެލުމަށްފަހު ރިމޯޓެއް ބޭނުންކޮށްގެނެވެ.
ބޮން ގޮވުމާއެކު އެއަށް އަޅާފައި ހުރި ބެއަރިން ބޯޅައިގެ 10 ފުށް ނަޝީދުގެ ހަށިކޮޅު ފޫއަޅުވާލި އެވެ. އަދި ބޮން ހަރުކޮށްފައި އިން ވޭވް ސައިކަލުގެ ޕްލާސްޓިކް ކޮޅެއް ވެސް އެމަނިކުފާނުގެ ހަށިގަނޑަށް ވަނެވެ. ނަޝީދުގެ ފުރާނަ ސަލާމަތްވީ މެދުނުކެނޑި 16 ގަޑިއިރު ވަންދެން އެމަނިކުފާނުގެ ހަށިކޮޅުގައި އޭޑީކޭ ހޮސްޕިޓަލުގެ ޑޮކްޓަރުންގެ ޓީމަކުން ކުރެއްވި ސާޖަރީތަކަކަށްފަހު އެވެ.
ބޮމުގެ ބައިތައް ނަޝީދުގެ ފުއްޕާމޭ، ބޯ، ބަނޑު، އަތް، އަދި ފަޔަށް ވެސް އަމާޒުވެފައި ހުރިއިރު އެމަނިކުފާނުގެ ހިތާ އެންމެ ސެންޓިމީޓަރެއް ދުރުން ވެސް ބެއަރިން ބޯޅައެއް ހަށިގަނޑަށް ވަދެފައިވެ އެވެ. އެމަނިކުފާނު މިވަގުތު ހުންނެވީ ޖަރުމަނަށް ބޭސް ފަރުވާއަށް ވަޑައިގެންނެވުމަށްފަހު، ފަސޭހަވަންދެން އިނގިރޭސި ވިލާތުގަ އެވެ.
