ބްރެޒިލުން އިއްޔެ ރާއްޖެ އައި އެ ގައުމުގެ ރައްޔިތެއްގެ އަތުން 3.197 ކިލޯގެ ކޮކެއިން މޯލްޑިވްސް ކަސްޓަމްސް ސާވިސަސް އިން އަތުލައިގެންފި އެވެ.
ކަސްޓަމްސް އިން ބުނީ އެތަކެތީގެ މަގުމަތީގެ އަގު 15.9 މިލިއަން ރުފިޔާ އަށް އަރާ ކަމަށެވެ.
އުމުރުން 31 އަހަރުގެ އެ މީހާ އަތުން މަސްތުވާތަކެތި ފެނުނީ، ކަސްޓަމްސް އިން ބުނި ގޮތުގައި އިއްޔެ މެންދުރުފަހު އެ މީހާ ވެލާނާ އިންޓަނޭޝަނަލް އެއާޕޯޓަށް ފޭބިއިރު އަމަލުތައް ހުރި ގޮތުން ޝައްކުކުރެވިގެން ލަގެޖް ބަލާފާސްކުރުމުން ކަމަށެވެ.
"ފުރަތަމަ މަރުހަލާގައި ކަސްޓަމްސް އިން މިތަކެތި ޓެސްޓުކުރިއިރު މަސްތުވާތެކެތީގެ ބާވަތެއް ކަމުގައިވާ ކޮކެއިން އަށް ވަނީ ޕޮޒިޓިވްވެފަ އެވެ," ކަސްޓަމްސް އިން ބުންޏެވެ.
"އަދި މި މައްސަލައިގައި ޝާމިލްވާ މީހާ އާއި އަތުލައިގަނެވުނު މަސްތުވާތަކެތި ވަނީ އިތުރަށް ތަހުގީގްކުރުމަށްޓަކައި މޯލްޑިވްސް ޕޮލިސް ސާވިސްއާ ހަވާލުކުރެވިފަ އެވެ."
