ރާއްޖޭގައި ކޮވިޑުގެ ހާލަތު ރަނގަޅުވަމުން އަންނައިރު، މުހިންމު ގިނަ މާކެޓުތަކަށް ކުރިއެރުން ލިބި މިހިނގާ އޯގަސްޓް މަހުގެ ފުރަތަމަ އެގާރަ ދުވަހު ބައިލައްކައަށް ވުރެ ގިނަ ޓޫރިސްޓުން ޒިޔާރަތްކޮށްފި އެވެ.
ޓޫރިޒަމް މިނިސްޓްރީން މިދިޔަ ބުދަ ދުވަހާ ހަމައަށް ހާމަކޮށްފައިވާ ޓޫރިޒަމްގެ ހިސާބުތަކަށް ބަލާއިރު، މި މަހުގެ އެހާތަނަށް ޖުމްލަ 52،792 ފަތުރުވެރިން ރާއްޖެއަށް ވަނީ ޒިޔާރަތްކޮށްފަ އެވެ.
ފާއިތުވި ދެ މަހެއްހާ ދުވަހުގެ ތެރޭގައި ޓޫރިޒަމް ރަނގަޅުވާން ފަށާފައިވާއިރު، މިދިޔަ ޖުލައި މަހު ރާއްޖެއަށް ވަނީ ލައްކައަކަށް ވުރެ ގިނަ ޓޫރިސްޓުން ޒިޔާރާތްކޮށްފަ އެވެ.
އެއީ ކޮވިޑް ބަލިމަޑުކަމުގެ ތެރޭގައި ބޯޑަރުތައް ހުޅުވާލި ފަހުން އެއް މަސް ދުވަހުގެ މުއްދަތެއްގެ ތެރޭގައި ރާއްޖެއަށް ލައްކައަކަށް ވުރެ ގިނަ ޓޫރިސްޓުން ޒިޔާރަތްކުރި ދެ ވަނަ ފަހަރެވެ. ކުރިން މި އަދަދަށް ޓޫރިސްޓުން އައީ މި އަހަރުގެ މާޗު މަހުގަ އެވެ.
މި މަސް ދެ ބައިވުމުގެ ކުރިން ބައި ލައްކަ ހުރަސްކޮށްފައިވާއިރު، މި މަހު ވެސް ލައްކައަކަށް ވުރެ ގިނަ ޓޫރިސްޓުން އަންނާނެކަމަށް ލަފާކުރެވެ އެވެ.
އޭގެ މައިގަނޑު އެއް ސަބަބަކީ ދުވާލެއްގެ މައްޗަށް އަންނަ ފަތުރުވެރިން މިދިޔަ މަހާ އަޅާބަލާއިރު މި މަހުގެ މިހާތަނަށް ވަރަށް ބޮޑަށް އިތުރުވެފައިވުމެވެ.
އެގޮތުން ބަލާއިރު، ޖުލައި މަހުގެ ޑެއިލީ އެވަރެޖު ހުރީ 3،284 ގަ އެވެ. ނަމަވެސް، މި މަހުގެ ފުރަތަމަ 11 ދުވަހު އެ އަދަދު ވަނީ 4،799 އަށް އިތުރުވެފަ އެވެ.
ރާއްޖޭގެ ޓޫރިޒަމަށް ކުރިއެރުން ލިބުނު ސަބަބުތަކުގެ ތެރޭގައި ކޮވިޑް ނަމްބަރުތައް ތިރިވެ، ގައުމުތަކުގެ ފެހި ލިސްޓުން ރާއްޖެއިން ޖާގަ ހޯދުމާއި ރާއްޖެ އަންނަ ފްލައިޓްތައް އިތުުރުވުން ހިމެނެ އެވެ.
އަދި ބަލިފެތުރުން ކޮންޓްރޯލް ކުރަން އަޅާފައިވާ ބައެއް ފިޔަވަޅުތަކަށް ލުއިދިނުމާ އެކު މީހުން އުޅޭ ރަށްރަށުގައި ހުންނަ ގެސްޓްހައުސްތަކަށް ދެވޭ ގޮތަށް ހުއްދަ ދިނުން ވެސް، މި ބަދަލުތައް އައި ސަބަބުތަކުގެ ތެރޭގައި ފާހަގަކުރެ ވެ އެވެ.
މީގެ އިތުރުން ދެކުނު އޭޝިއާ ގައުމުތަކުން ދަތުރުކުރާ ޓޫރިސްޓުންނަށް ރާއްޖެ ހުޅުވާލުމާއި، ވެކްސިން ފުރިހަމަކޮށްފައިވާ ޓޫރިސްޓުންނަށް ދީފައިވާ ލުއިތަކުގެ ސަބަބުން ވެސް ރާއްޖެ އަންނަ ޓޫރިސްޓުން އަދަދުތައް އަންނަނީ އިތުރުވަމުންނެވެ.
އެގޮތުން، ރާއްޖެއަށް މުހިންމު ބައެއް މާކެޓުތަކުން ވެސް ފަތުރުވެރިން އަންނަ މިންވަރު ވަނީ މައްޗަށް ގޮސްފަ އެވެ.
އޭގެ ތެރޭގައި އިރުމަތީ ޔޫރަޕާއި އެމެރިކާގެ އިތުރުން މެދުއިރުމަތީގެ ބައެއް ގައުމުތައް ހިމެނެ އެވެ.
