ރާއްޖޭގައި ބޭއްވޭ އެންމެ ބޮޑު ފުޓްބޯޅަ ލީގު، ދިރާގު ދިވެހި ޕްރިމިއާ ލީގުގެ ލޯގޯ ފަރުމާ ކުރުމުގެ ފުރުސަތު ހުޅުވާލައި، އެއް ވަނަ ހޯދާ ފަރާތަކަށް އިނާމެއްގެ ގޮތުގައި 100،000 ރުފިޔާ ހަމަޖައްސައިފި އެވެ.
އެފްއޭއެމުން އިއްޔެ ސޯޝަލް މީޑިއާ މެދުވެރިކޮށް ކުރި ޕޯސްޓްގައިވަނީ ދިވެހި ޕްރިމިއާ ލީގުގެ ލޯގޯ ފަރުމާކުރަން ޝައުގުވެރިވާ ފަރާތްތަކުން މި ފުރުސަތުގެ ބޭނުން ހިފުމަށް އެދިފަ އެވެ. ލޯގޯ ފަރުމާކުރުމުގެ މުބާރާތް ކުރިއަށްދާނީ އަންނަ މަހުގެ 10 ވަނަ ދުވަހުގެ ނިޔަލަށެެވެ.
މިއީ ރާއްޖޭގެ އެންމެ ބޮޑު ލީގުގެ ލޯގޯ ފަރުމާކުރުން މުބާރާތެއް މެދުވެރިކޮށް ކުރިއަށް ގެންދަން އެފްއޭއެމުން ނިންމި ފުރަތަމަ ފަހަރެވެ. ރާއްޖޭގައި އާޓް އާއި ޑިޒައިނަށް ޝައުގުވެރިވާ ގިނަ އަދަދެއްގެ މީހުން އުޅޭއިރު، މީގެ ސަބަބުން ވެސް ފުޓްބޯޅައިގެ ސަޕޯޓަށް ކޮންމެވެސް ވަރެއްގެ ދިރުމެއް އަންނާނެ ކަމަށް އެފްއޭއެމުން އުއްމީދު ކުރެ އެވެ.
އެފްއޭއެމުން ވަނީ މި މުބާރާތުގައި ބައިވެރިވާ ފަރާތްތަކުން އަމަލުކުރަން ޖެހޭ އުސޫލެއް ކަނޑައަޅައިފަ އެވެ. އެ ގޮތުން އެއް ވަނަ އަށް ދާ ފަރާތަކާ އެކު އެފްއޭއެމުން ހާއްސަ އެގްރީމެންޓެއް ހަަދައި ލޯގޯގެ ކޮޕީރައިޓްސް އެފްއޭއެމަށް ދޭ ގޮތަށް ކޮންޓްރެކްޓެއްގައި ސޮއިކުރާނެ އެވެ.
ރާއްޖޭގައި ބޭއްވޭ އެންމެ ބޮޑު ލީގު، ދިވެހި ޕްރިމިއާ ލީގުގެ ނަަމަށް ރީބްރޭންޑް ކުރީ 2015 ވަނަ އަހަރު އެވެ. އޭގެ ފަހުން އެންމެ ފުރަތަމަ އުރީދޫ ދިވެހި ޕްރިމިއާ ލީގުގެ ނަމުން ދިރާގު ދިވެހި ޕްރިމިއާ ލީގަށް ބަދަލުވިއިރު، ވެސް މައިގަނޑު ގޮތެއްގައި ބޭނުންކުރި ލޯގޯ ހުރީ ގާތްގަނޑަކަށް އެއް ޑިޒައިނަކަށެވެ.
ރާއްޖޭގެ ފުޓްބޯޅައިގައި ވީހާވެސް ގިނަ ދިވެހިން ޝާމިލުވެ، އެކި ދާއިރާތަކުގެ ހުނަރުވެރި ފަންނާނުން ބައިވެރިވެ އުޅެވޭނެ ގޮތެއް ފަހިވުމަކީ އެފްއޭއެމްގެ ވަރަށް ބޮޑު ބޭނުމެކެވެ. އެއީ ފުޓްބޯޅައިގެ މާކެޓިން އަށް ވެސް މުހިއްމު ކަމެކެވެ. އެފްއޭއެމުން ވަނީ މިދިޔަ ސީޒަނުގައި ސަޕޯޓަރުންގެ މެދުގައި މެޗު ހަފްތާގެ އެންމެ މޮޅު ކުޅުންތެރިން ހޮވަން ފަށައިފަ އެވެ. އެއީ ސޯޝަލް މިޑިއާ ޕްލެޓްފޯމް ފޭސްބުކް މެދުވެރިކޮށެވެ.
