ޗެނަލް 13ގެ ޕްރޮގްރާމެއްގައި ދެއްކި ބޭއަދަބީ ވާހަކަތަކެއްގެ މައްސަލަ ބްރޮޑްކާސްޓިން ކޮމިޝަން (ބްރޯޑްކޮމް) އިން މިއަދު ބަލަން ފަށައިފި އެވެ.
ބްރޯޑްކޮމުން ބުނީ ރޭގެ ވަގުތެއްގައި ޗެނަލް 13ގެ "ހަޖަމް" ޕްރޮގްރާމުގައި ދެއްކި ވާހަކަތަކުގެ މައްސަލަ އެ ކޮމިޝަނުގެ ސަމާލުކަމަށް އައިސްފައިވާ ކަމަށެވެ. އަދި އޮންނަ އިޖުރާއަތްތަކުގެ ތެރެއިން އެ މައްސަލަ އެ ކޮމިޝަނުން ބަލަމުން އަންނަ ކަމަށް ވެސް ބްރޯޑްކޮމުން ބުންޏެވެ.
ސޯޝަލް މީޑީއާގައި ފެންނަން ހުރި ކްލިޕްތަކުގައި، އެ ޕްރޮގްރާމްގައި ވާހަކަ ދައްކަން ހުރި ޕްރެޒެންޓަރު ޕީޖީ ޝަމީމަށް ނިސްބަތްކޮށް ވަރަށް ހުތުރުކޮށް ވާހަކަތަކެއް ދެއްކި އެވެ.
އެ މައްސަލައިގައި ކޮމިޝަނުގެ ރައީސް މަރިޔަމް ވަހީދާ "އަދަދު" އާ ވާހަކަ ދައްކަވަމުން ވިދާޅުވީ ސޯޝަލް މީޑިއާގައި ރައްޔިތުންގެ ކަންބޮޑުވުން ހުރިކަމަށް ފާހަގަކުރެވުމާ އެކު މައްސަލަ ބަލަން ފަށާފައިވާ ކަމަށެވެ. އަދި ކުރިއަށް އޮތް އާދިއްތަ ދުވަހު މި މައްސަލަ ބަލަން ކޮމިޝަނުގައި ތާވަލުކުރެވިފައިވާ ކަމަށް ވެސް އޭނާ ވިދާޅުވި އެވެ.
އެ ޕްރޮގްރާމުގައި ދެއްކި ކޮން ވާހަކަތަކަކާ ގުޅިގެންތޯ ސުވާލުކުރުމުން މަރީ ވިދާޅުވީ، "ފެކްޓް ވެރިފައި ނުކޮށް" ވާހަކަތަކެއް އެ ޕްރޮގްރާމުގައި ދައްކާފައިވާތީ ކަމަށެވެ. އަދި އިތުރު މައުލޫމާތު ދެވޭނީ އޮންނަ އުސޫލުގެ ތެރެއިން ބަލަން ޖެހޭ ކަންކަން ބެލުމަށް ފަހު ކަމަށް އޭނާ ވިދާޅުވި އެވެ.
މީގެ ކުރިން ވެސް ބްރޯޑްކޮމުން ވަނީ ޗެނަލް13ގެ ހަޖަމް ޕްރޮގްރާމްގެ މައްސަލަތަކެއް ބަލާފަ އެވެ. އެ ޗެނަލުން ދައްކާ ޕްރޮގްރާމްތަކުގެ ބަސް މަގު ރަނގަޅު ކުރަން އެންގުމުގެ އިތުރުން އެއް ޕްރޮގްރާމް ނުދައްކަން ވެސް ކޮމިޝަނުން އެންގި އެވެ. އަދި ތަފާތު އެކި ފަހަރު މަތިން މައާފަށް އެދުމަށް ވެސް ޗެނަލް13 އަށް ވަނީ އަންގައިފަ އެވެ.
