މިލާން (އޮގަސްޓް 6) - މި އަހަރުގެ މޮޓޯޖީޕީ ސީޒަނަށް ފަހު ދުނިޔޭގައި އުފެދުނު އެންމެ މޮޅު އެއް ސައިކަލް ދުއްވުންތެރިޔާ އިޓަލީގެ ވެލެންޓީނޯ ރޮސީ ރިޓަޔާކުރަން ނިންމާފައިވާކަން އިއުލާނުކޮށްފި އެވެ.
ސްޓީރިއަން ގްރޯންޑް ޕްރީގެ ކުރިން ބޭއްވި ނޫސްވެރިންގެ ބައްދަލުވުމެއްގެ ތެރެއިން އުމުރުން 42 އަހަރުގެ ރޮސީ ބުނީ މިއީ އޭނާ އަށް ދައްކަން އެހާ ފަސޭހަ ވާހަކައެއް ނޫން ކަމަށާއި މި ސީޒަނަށް ފަހު ރޭސް ޓްރެކުން ދެން ނުފެންނާނެ ކަމަށެވެ.
"ވަރަށް އުނދަގޫ ހިތަށް ގެންނަން ވެސް. އަންނަ އަހަރު އަހަރެން މި ރޭސް ޓްރެކަކުން ނުފެންނާނެ. ވަރަށް ބައިވަރު ފޮނި ހަނދާންތަކަކާ އެކު އަހަރެން މިކަން އިއުލާނު މި ކުރަނީ ނުހަނު ހިތާމައިގައި ހުރެ،" 25 އަހަރުގެ ދިގު ކެރިއަރު ނިންމާލުމާ ބެހޭގޮތުން ރޮސީ ބުންޏެވެ.
ރޭހެއްގެ ތެރެއިން ރޮސީ: މި ސީޒަނަށް ފަހު އޭނާ ރިޓަޔާކުރަން ވަނީ ނިންމާފައި.-- ފޮޓޯ: އޭއެފްޕީ
ރޮސީ އަކީ މޮޓޯޖީޕީގެ ގިނަ ރެކޯޑްތަކެއް އޮތް ދުވުންތެރިއެކެވެ. ދުނިޔޭގެ ޗެމްޕިއަންކަން ނުވަ ފަހަރު ހޯދި ރޮސީ ރޭސިން އަށް އެންމެ ފުރަތަމަ ނުކުތީ 1996 ވަނަ އަހަރު އެވެ. އޭގެ ފަހުން އޭނާ ހެދި ގިނަ ރެކޯޑްތަކުގެ ތެރެއިން އަދިވެސް ގިނަ ބަޔަކަށް އަތްނުލެވި އޮތް އެންމެ ފާހަގަކޮށްލެވޭ ރެކޯޑަކީ 125 ސީސީ އާއި 250 ސީސީ އަދި 500 ސީސީގެ ޗެމްޕިއަންޝިޕްގެ އިތުރުން މޮޓޯޖީޕީގެ ޗެމްޕިއަންކަން ހޯދި ހަމައެކަނި މީހާގެ ޝަރަފެވެ.
ރޮސީ އެންމެ ފަހުން ދުނިޔޭގެ ޗެމްޕިއަންކަން ހޯދީ 2009 ވަނަ އަހަރު އެވެ. އޭގެ ފަހުން އޭނާ ވަނީ ތިން ފަހަރެއްގެ މަތިން ދުނިޔޭގެ ދެ ވަނަ ހޯދައިފަ އެވެ. އެއީ 2014، 2015 އަދި 2016 ވަނަ އަހަރު އެވެ. ރޮސީ އަކީ ރަސްމީ ސައިކަލް ރޭސްތަކުގެ ތެރެއިން 400 ރޭހަށް ވުރެ ގިނަ އިވެންޓްތަކުގައި ބައިވެރިވި ހަމައެކަނި އެތުލީޓެވެ.
