މެޑްރިޑް (އޮގަސްޓް 4) - މަޝްހޫރު އިންވެސްޓްމަންޓް ކުންފުނި ސީވީސީ ކެޕިޓަލް އިން ސްޕެނިޝް ލީގު (ލަލީގާ)ގެ 10 ޕަސެންޓް ހިއްސާ ތިން ބިލިއަން ޑޮލަރަށް ގަންނަން އެއްބަސްވެފައިވާ ކަމަށް ލަލީގާ އިން އިއުލާނުކޮށްފި އެވެ.
މި އެއްބަސްވުން ފާސްކުރެވޭނީ ސްޕެއިނުގެ އެއް ވަނަ އަދި ދެ ވަނަ ޑިވިޝަންގެ 42 ކްލަބްގެ ވޯޓުގެ މެޖޯރިޓީ ކްލަބްތަކުގެ ތާއީދު ލިބިއްޖެނަމަ އެވެ.
މީގެ ކުރިން ސީވީސީ ކެޕިޓަލް އިން ވަނީ އިޓާލިއަން ލީގުގެ ހިއްސާއެއް ގަންނަން ވެސް މަސައްކަތް ކޮށްފަ އެވެ. އެކަމަކު، ކުޑަ ވަގުތު ކޮޅެއްގެ މާލީ މަންފާ އަށް ބަލައި ދުރުރާސްތާ ވިސްނުމެއް ނެތި ލީގުގެ ހިއްސާއެއް ވިއްކާލުމުގެ ގޯސް އަސަރުތަކެއް ކޮށްފައިވާނެތީ މަޝްހޫރު ކްލަބްތަކުން ވެސް އެ ޑީލަށް ނޫނެކޭ ބުނުމުން ސީވީސީ އަށް އެ ޑީލް ކުރިއަށް ނުގެންދެވުނެވެ. އިޓަލީގެ ބޮޑެތި ކްލަބްތަކުން ސީވީސީއާ އެކު އެއްބަސްވި ޑީލަށް ވޯޓު ނުދިން އަނެއް ސަބަބަކީ މުޅި ލީގުގެ ހައިބަތަށް ބަލާއިރު ސީވީސީން ހުށަހެޅި ތިން ބިލިއަން ޑޮލަރަކީ ކުޑަ އަގެއް ކަމަށް ފެންނާތީ އެވެ.
އިޓަލީގެ ކުރިން ސީވީސީން ޖަރުމަނު ލީގުގެ ހިއްސާއެއް ގަނެ، އިންވެސްޓްކުރަން ކުރި މަސައްކަތް ވެސް ކާމިޔާބުވާ ގޮތެއްނުވި އެވެ.
ލަލީގާގެ ރައީސް ހަވިއޭ ޓެބާސް އިންޓަވިއު ދެނީ.-- ފޮޓޯ: އޭއެފްޕީ
ސީވީސީން ލަލީގާގެ ރައިޓްސް ގަންނަން މަސައްކަތްކުރަމުން އަންނަ މި ދަނޑިވަޅަކީ ސްޕެއިނުގެ ގަދަ ދެ ބާރު ކަމަށްވާ ބާސެލޯނާ އާއި ރެއާލް މެޑްރިޑް މާލީ ގޮތުން އަޑިގަނޑެއްގެ ތެރޭގައި ވަނިކޮށެވެ. ސީވީސީގެ ޑީލް ކުރިއަށް ގޮސްފިނަމަ ބާސެލޯނާ އާއި ރެއާލްގެ މި ވަގުތު އޮތް މާލީ މައްސަލަތަކަށް ލުޔެއް ލިބޭނެ އެވެ. އެއީ ޑީލް ފާސްވުމާ އެކު ލަލީގާ އަށް ދޭ ފުރަތަމަ ޕޭމަންޓްގައި ހިމެނޭ ބޮޑު ޕަސެންޓަކީ ކްލަބްތަކަށް ބަހަން ޖެހޭ ފައިސާ ކަމަށްވާތީ އެވެ.
ރިޕޯޓްތައް ބުނާގޮތުން ކްލަބްތަކުގެ ހައިބަތަށް ބަލައިގެން އެ ޕޭމަންޓްތައް ބަހާއިރު، އެންމެ ގިނައިން ލިބޭނެ ދެ ކްލަބަކީ ބާސެލޯނާ އާއި ރެއާލް މެޑްރިޑަށެވެ. ސީވީސީ އާއި ލަލީގާގެ މި ޑީލާ ބެހޭގޮތުން ރެއާލާއި ބާސެލޯނާ އިން އަދި ރަސްމީކޮށް ބަހެއް ނުބުނެ އެވެ.
ލަލީގާ އިން ބުނީ މި ޑީލް ކުރިއަށްގެންދިޔަ ނަމަވެސް ސީވީސީ އަށް ވުރެ ބޮޑަށް ލީގުގެ ރައިޓްސްގެ ކަންކަމުގައި ފަހު ބަސް ބުނުމުގެ އިހުތިޔާރު އޮންނާނީ ލީގުގެ ބޯޑަށް ކަމަށެވެ.
ލަލީގާގެ އޮފިޝަލަކު ސްޕެއިނުގެ ނޫހަކަށް ދިން އިންޓަވިއުއެއްގައި ބުނީ މިއީ ކޮވިޑް-19ގެ ސަބަބުން ކުރިމަތިވެފައިވާ މާލީ މައްސަލަތަކުން ވަގުތީ ހައްލަކަށް ވިސްނައިގެން ކުރާ ކަމެއް ނޫން ކަަމަށެވެ. މި އިވެންސްޓްމަންޓްގެ ބޮޑު ބޭނުމަކީ ލަލީގާގެ ބްރޭންޑާއި ކްލަބްތަކުގެ ޑިވެލޮޕްމަންޓަށް ކުރާ މަސައްކަތްތައް ރައްކާތެރި އުސޫލެއްގެ ތެރެއިން ކުރިއަށް ގެންދިއުމުގެ ބޭނުމުގައި ކުރާ ކަމެއް ކަމަށް އޮފިޝަލް ބުންޏެވެ.
"ޓާގެޓަކީ ހަ އަހަރު ތެރޭގައި ޔޫރަޕްގައި އެންމެ މާލީ ގޮތުން ވަރުގަދަ ލީގަކަށް ލަލީގާ ހެދުން،" އޮފިޝަލް ބުންޏެވެ.
ފާއިތުވި އަހަރުތަކުގައި ސީވީސީން ވަނީ ޔޫރަޕްގެ ކުޅިވަރު ދާއިރާ އަށް ގިނަ ހަރަދުތަކެއް ކޮށްފަ އެވެ. އެ ގޮތުން ޔޫރަޕްގައި ކުރިއަށްދާ މަޝްހޫރު ރަގްބީ މުބާރާތް، ސިކްސް ނޭޝަންސް ޗެމްޕިއަންޝިޕްގެ އޮގަނައިޒިން ކޮމިޓީއާ އެކު ވިޔަފާރި ޑީލެއް ހެދިއިރު، އެއީ 500 މިލިއަން ޑޮލަރުގެ އިންވެސްޓްމަންޓެކެވެ. އަދި ސީވީސީން ވަނީ ވޮލީބޯޅައިގެ ދުނިޔޭގެ ފެޑެރޭޝަން، އެފްއައިވީބީއާ ގުޅޭ ބެޓް ކުރުމުގެ ވިޔަފާރީގައި 300 މިލިއަން ޑޮލަރު އިންވެސްޓްކޮށްފަ އެވެ.
އޭގެ އިތުރުން ސީވީސީން ވަނީ ދުނިޔޭގެ މައި ފުޓްބޯޅަ އިދާރާ ފީފާއާ ގުޅިގެން ފުޓްބޯޅައިގެ އެކި އިންވެސްޓްމަންޓްތަކުގައި ކުރިއަށްދާން ވެސް މަޝްވަރާކޮށްފަ އެވެ. އެ ގޮތުން އުމުރުފުރާ އެކި މުބާރާތްތަކުގެ ބްރޯޑްކާސްޓިން ރައިޓްސްގެ ކޮންޓްރޯލް ލިބޭ ވިޔަފާރި ޑީލްތަކެއް ކުރިއަށްގެންދަން ސީވީސީން ވަނީ ހުށަހަޅައިފަ އެވެ.
ސީވީސީގެ ހެޑްކުއާޓަރު ހުންނަނީ ލަގްޒެމްބާގްގަ އެވެ. އެންމެ ފަހުން އާންމުކުރި މި ސީވީސީގެ ތަފާސްހިސާބުތަކަށް ބަލާއިރު މި ކުންފުނީގެ މިލްކިއްޔާތުގައި 111 ބިލިއަން ޑޮލަރު އެބަހުއްޓެވެ.
