ޓޯކިޔޯ (އޮގަސްޓް 1) - އެންމެ ފަހުން ބޭއްވި ތިން އޮލިމްޕިކްސްގައި ވެސް 100 މީޓަރު ދުވުމުން ރަން މެޑަލް ހޯދި ޖެމެއިކާގެ އުސައިން ބޯލްޓަށް ފަހު، މި ފަހަރުގެ އޮލިމްޕިކްސްގެ އެ އިވެންޓް ކާމިޔާބުކޮށް 100 މީޓަރުގެ އާ ޗެމްޕިއަންގެ ޝަރަފް އެމެރިކާ އަށް އުފަަން އިޓަލީގެ ދުވުންތެރިޔާ ލެމޯން މާސެލް ޖޭކޮބްސް ހޯދައިފި އެވެ.
ޖެމެއިކާގެ ސްޕްރިންޓް ލެޖެންޑް ބޯލްޓް ވަނީ 2008 ވަަނަ އަހަރު ބެއިޖިންގައި ބޭއްވި އޮލިމްޕިކްސް އާއި 2012 ވަނަ އަހަރު ލަންޑަންގައި ބޭއްވި އޮލިމްޕިކްސް އަދި 2016 ވަނަ އަހަރު ބްރެޒިލްގެ ރިއޯގައި ބޭއްވި އޮލިމްޕިކްސްގެ 100 މީޓަރު އިވެންޓާއި 200 މީޓަރު އިވެންޓުން ރަން މެޑަލް ހޯދައިފަ އެވެ.
މިހާރު ރިޓަޔަކޮށްގެން ހުރި ބޯލްޓަށް ފަހު އޮލިމްޕިކްސްގެ 100 މީޓަރުގެ އިވެންޓް ކާމިޔާބުކުރި ފުރަތަމަ ދުވުންތެރިޔާގެ ޝަރަފް ހޯދި ޖޭކޮބްސް، 26، އިވެންޓް ނިންމީ 9.80 ސިކުންތުންނެވެ. އޭނާ އަށް 100 މީޓަރު އިވެންޓް 10 ސިކުންތަށް ވުރެ އަވަހަށް އެންމެ ފުރަތަމަ ނިންމުނީ މީގެ މަހެއްހާ ދުވަސް ކުރިންނެވެ. އެހެންވެ، މި ކާމިޔާބީ ޖޭކޮބްސް ހޯދުން ވެގެންދިޔައީ ގިނަ ބަޔަކަށް ޝޮކެއް ލިބުނު ކަމަކަށެވެ.
100 މީޓަރު ދުވުމުގެ ގަދަ ތިން ދުވުންތެރިން: (ކ.ވ) ތިން ވަނަ ހޯދި ޑެ ގްރާސޭ، އެއް ވަނަ ހޯދި ޖޭކޮބްސް އަދި ދެ ވަނަ އަށް ދިޔަ ކޭލީ އެ ދުވުންތެރިއަކު ނިސްބަތްވާ ގައުމުގެ ދިދަ ހިފައިގެން.-- ފޮޓޯ: އޭއެފްޕީ
ދެ ވަނަ އަށް ދިޔައީ ޖޭކޮބްސް އަށް ވުރެ 0.04 ސިކުންތު ފަހުން ނިންމި އެމެރިކާގެ ފްރެޑް ކޭލީ އެވެ. އޭނާގެ ޓައިމިން އަކީ 9.84 ސިކުންތެވެ. އަދި ލޯ މެޑަލް ހޯދީ ކެނަޑާގެ އަންދްރޭ ޑެ ގްރާސޭ ރޭސް ނިންމީ 9.89 ސިކުންތުންނެވެ.
ޖޭކޮބްސް އަކީ 1992 ވަނަ އަހަރަށް ފަހު އޮލިމްޕިކްސްގެ 100 މީޓަރު އިވެންޓުން ރަން މެޑަލް ހޯދި ޔޫރަޕްގެ ފުރަތަމަ ދުވުންތެރިޔާ އެވެ. އެ ފަހަރު ރަން މެޑަލް ހޯދީ ގްރޭޓް ބްރިޓިއަން އެތުލީޓެއް ކަަމަށްވާ ލިންފޯޑް ކްރިސްޓީ އެވެ. އެންމެ ފަހުން އިޓަލީ އަށް ނިސްބަތްވާ ސްޕްރިންޓަރެއް އޮލިމްޕިކްސް އިން މެޑަލް ހޯދީ 1980 ވަނަ އަހަރު އެވެ. އެ ފަަހަރު 200 މީޓަރު ރޭސް ކާމިޔާބުކުރީ ޕިއެޓްރޯ މެނީއާ އެވެ.
ޔޫރަޕްގެ އިންޑޯ މުބާރާތުގެ 60 މީޓަރު ދުވުން ކާމިޔާބުކުރި ޖޭކޮބްސް ބުނީ އޮލިމްޕިކްސްގެ ރަން މެޑަލެއް ލިބުމަކީ ކެރިއަރުގެ އެންމެ އުހަށް ދެވުން ކަމަށެވެ.
"މިއީ ތާ އަބަދަށް ހަނދާން ހުންނާނެ ވަގުތެއް. މިއީ ވަރަށް ގިނަ މީހުން އެ ކަމަކާ ބެހޭގޮތުން ވާހަކަ ދައްކާނެ ކަމެއް. އަހަރެން މި ކާމިޔާބީ ހޯދަން އެތައް މަސައްކަތެއް ކުރިން. މިއީ އަހަރެން ކުރި ބުރަ މަސައްކަތުގެ ނަތީޖާ. އޮލިމްޕިކްސް އަކުން ރެން މެޑަލެއް ލިބުމަކީ ކެރިއަރުގައި އަބަދު ވެސް ފަހުރުވެރިވެވޭނެ ކަމެއް،" ޖޭކޮބްސް ބުންޏެވެ.
ޖޭކޮބްސް (މ) 100 މީޓަރުގެ ރޭސް ނިންމަނީ.-- ފޮޓޯ: އޭއެފްޕީ
ޖޭކޮބްސް އަކީ މީގެ ކުރިން ހައި ޖަމްޕްގައި ވެސް ވާދަކުރި އެތުލީޓެކެވެ. އަދިވެސް ބައެއް މުބާރާތްތަކުގެ އެ އިވެންޓްގައި އޭނާ ވާދަކުރެ އެވެ. އެކަމަކު، ފަހަކަށް އައިސް އޭނާގެ ރަސްމީ އިވެންޓަކަށް ވެފައިވަނީ 100 މީޓަރު ދުވުމެވެ. އޭނާގެ ކޯޗަކީ އިޓަލީގެ ކުރީގެ މަޝްހޫރު އެތުލީޓް ޕައޮލޯ ކަމޯސީ އެވެ.
މި ފަހަރުގެ 100 މީޓަރުގެ ފައިނަލުގައި އެ އިވެންޓްގައި މި ވަގުުތު އެންމެ މަގުބޫލު ދެ ދުވުންތެރިން ވާދަނުކުރެ އެވެ. އެއީ ވޯލްޑް ޗެމްޕިއަންޝިޕް ކާމިޔާބުކުރި އެމެރިކާގެ ކްރިސްޓިއަން ކޯލްމަން އާއި ޒުވާން ސްޕްރިންޓަރު ޓްރޭވަން ބްރޯމެލް އެވެ. އަނެއްކޮޅުން 2004 ވަނަ އަހަރަށް ފަހު ފުރަތަމަ ފަހަރަށް ބޯލްޓް ނުލައި 100 މީޓަރު ރޭސް ކުރިއަށްދިޔައިރު، މިއީ ފައިނަލުގައި މިދިޔަ 20 އަހަރު ތެރޭ ޖެމެއިކާ އެތުލީޓެއް ނެތި އިވެންޓް ކުރިއަށްދިޔަ ފުރަތަމަ ފަހަރެވެ.
