ޕެރިސް (ޖުލައި 16) - އަންނަ ހަފްތާގައި ޕެރިހުގައި ފަށާ އޮލިމްޕިކްސްގެ ކުރިން ޗައިނާގެ ފެތުންތެރިން މަނާބޭހަށް ޓެސްޓް ކުރާ މިންވަރު އެހެން ގައުމުތަކަށް ވުރެ އިތުރުކުރަން ނިންމައިފި އެވެ.
އެއީ އެންމެ ފަހުން، 2021 ވަނަ އަހަރު ބޭއްވި، 2020 ވަނަ އަހަރުގެ އޮލިމްޕިކްސްގައި ހިނގާދިޔަ ކަމެއްގެ ސަބަބުންނެވެ. އޮލިމްޕިކްސް ބާއްވަން އޮތް އަހަރު ނުބޭއްވުނީ، ކޮވިޑް-19އާ ހެދި އެެވެ.
މަނާބޭހަށް ޓެސްޓްކުރާ އެޖެންސީ އަށް ދާދި ފަހުން ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. އެއީ، މަނާބޭހުގެ ގޮތުގައި ލިސްޓުކޮށްފައިވާ ބޭހަކަށް ޕޮޒިޓިވްވެފައިވާ ޗައިނާގެ 23 ފެތުންތެރިއަކު، 2020 ގެ އޮލިމްޕިކްސްގައި ވާދަކުރަން ފުރުސަތު ދިނުމުންނެވެ. އޭގެ ތެރެއިން 11 ފެތުންތެރިއަކު، މި ފަހަރުގެ އޮލިމްޕިކްސްގައި ވާދަކުރާ ޗައިނާގެ ސްވިމިން ސްކޮޑުގައި ވެސް ހިމެނެ އެވެ.
ވޯލްޑް އެކުއަޓިކްސް އިން، 2020 ވަނަ އަހަރުގެ އޮލިމްޕިކްސްއާ ގުޅޭ އެ މައްސަލައިގެ ރިވިއު އެއް ހެދިއިރު، އޭގައި ބަޔާންކޮށްފައިވަނީ، އެ ވަގުތު ހާލަތު ދިމާވި ގޮތުން، އެންޓި-ޑޯޕިން ސިސްޓަމް (މަނާބޭހަށް ޓެސްޓްކުރާ ސިސްޓަމް) މަސައްކަތްކޮށްފައިވަނީ އެންމެ ރަނގަޅަކަށް ނޫން ކަމަށެވެ.
މިއާ އެކު، ޕެރިސް އޮލިމްޕިކްސްގެ ކުރިން، ޗައިނާގެ އެތުލީޓުން، އަށް ފަހަރު އެންޓި ޑޯޕިން ޓެސްޓް ހަނދާނެ އެވެ. މީގެ އިތުރުން، ޗައިނާގެ އެތުލީޓުންގެ އެންޓި ޑޯޕިން ޓެސްޓްތައް، އެ ގައުމުގެ އެންޓި ޑޯޕިން އެޖެންސީ، ޗައިނާޑާ އިން ނޫން ތާކުން ހަދަން ވެސް ވަނީ ހަމަޖެހިފަ އެވެ.
އެންމެ ކާމިޔާބު އޮލިމްޕިއަން، ފެތުންތެރިޔާ، މައިކަލް ފެލްޕްސް އާއި އެމެރިކާގެ އޮލިމްޕިކް ކޮމިޓީން ވަނީ، ވޯލްޑް އެންޓި ޑޯޕިން އެޖެންސީ (ވާޑާ) އިން މަނާބޭހުގެ ކަންކަން ކޮންޓްރޯލް ކުރަން ކުރާ މަސައްކަތަށް އިތުބާރު ނުކުރެވޭ ކަމަށް ބުނެފަ އެވެ. އެއާ އެކު، އިންޓަނޭޝަނަލް އޮލިމްޕިކް ކޮމިޓީން ވަނީ ވާޑާ އަށް އިތުބާރު އެބައޮތް ކަމަށާއި ހުރިހާ ފަރާތަކުން ވެސް ވާޑާ އަށް އިހުތިރާމް ކުރަން ޖެހޭނެ ކަމަށް ބުނެފަ އެވެ.
