ޓޯކިޔޯ (އޮގަސްޓް 1) - މި ފަހަރުގެ އޮލިމްޕިކްސްގެ ފެތުމުގެ އިވެންޓްތައް މިއަދު ނިމުނުއިރު، އޮސްޓްރޭލިއާގެ ކުޅަދާނަ އަންހެން ފެތުންތެރިޔާ އެމާ މެކްކިއޯން ހަތް މެޑަލް ހޯދައި ރެކޯޑް ފޮތުން ޖާގަ ހޯދައިފި އެވެ.
އެމާ، 27، އަކީ އޮލިމްޕިކްސްގެ އެއް މުބާރާތެއްގަައި ފެތުމުން ހަތް މެޑަލް ހޯދި ފުރަތަމަ އަންހެން އެތުލީޓެވެ.
މީގެ ކުރިން އޮލިމްޕިކެއްގެ އެއް މުބާރާތުގައި ފެތުމުން ގިނަ މެޑަލް ހޯދުމުގެ ރެކޯޑް އޮތް ފިރިހެން ފެތުންތެރިންނަކީ މައިކަލް ފެލްޕްސް، މާކް ސްޕިޓްޒް އަދި މެޓް ބިއޯންޑީ އެވެ. މީގެ ތެރެއިން ފެލްޕްސް ވަނީ 2004 ވަަނަ އަހަރުގެ އެތަންސް އޮލިމްޕިކްސްގައި ހަ ރަން މެޑަލާއި ދެ ލޯ މެޑަލް ހޯދައިފަ އެވެ. އަދި 2008 ވަނަ އަހަރު ބެއިޖިންގައި ބޭއްވި އޮލިމްޕިކްސް އިން އަށް ރަން މެޑަލް ހޯދި އެވެ.
މި ފަހަރުގެ އޮލިމްޕިކްސްގައި އެމާ ވަނީ ހަތަރު ރަން މެޑަލާއި ތިން ލޯ މެޑަލް ހާސިލްކޮށްފަ އެވެ.
އެމާ މެޑަލް ދައްކާލަނީ.-- ފޮޓޯ: އޭއެފްޕީ
ރަން މެޑަލް ހޯދި އިވެންޓްތަކަކީ 100 މީޓަރު ފްރީސްޓައިލް، ހަތަރެއް ގުނަ 100 މީޓަރު ފްރީސްޓައިލް ރިލޭ، ހަތަރެއް ގުނަ 100 މެޑްލީ ރިލޭ އިވެންޓާއި 50 މީޓަރު ފްރީ ސްޓައިލް އިންނެވެ. އަދި ލޯ މެޑަލް ހާސިލްކުރީ މިކްސް ހަތަރެއް ގުނަ 100 މެޑްލީ ރިލޭ، 100 މީޓަރު ބަޓަފްލައި، ހަތަރެއް ގުނަ 200 ފްރީސްޓައިލް ރިލޭ އިވެންޓުންނެވެ.
"އަހަރެން މެޑަލް ތާވަލަކަށް ނުބަލަން. ހަގީގަތުގައި މި ހިސާބަށް އަންނަން އަހަރެން ކުރީ ވަރަށް ބުރަ މަސައްކަތް. މި ވަރުގެ ކާމިޔާބެއް ލިބުމުން ވަރަށް ބޮޑަށް ފަހުރުވެރިވޭ. ހަގީގަތުގައި މިއީ އަހަރެން އުއްމީދުކުރި ވަރަށް ވުރެ ބޮޑު ކާމިޔާބެއް،" އެމާ ބުންޏެވެ.
އެހެން ކުޅިވަރަކުން އެއް އޮލިމްޕިކްސްގައި ހަތް މެޑަލް ހާސިލްކުރި ހަމައެކަނި އަންހެން އެތުލީޓަކީ 1952 ވަނަ އަހަރުގެ އޮލިމްޕިކްސްގެ ޖިމްނާސްޓިކް އިވެންޓުން މެޑަލްތައް ހޯދި ސޯވިއެޓްގެ އެތުލީޓް މާރިއޯ ގޮރޮހޯވްސްކައީއާ އެވެ.
މި ފަހަރުގެ އޮލިމްޕިކްސްގައި އެމާ އަށް ފަހު ދެން އެންމެ ރެކޯޑް ރަނގަޅު ފެތުންތެރިއަކީ އެމެރިކާގެ ފިރިހެން ފެތުންތެރިޔާ ކޭލެބް ޑްރެސެލް އެވެ. އުމުރުން 24 އަހަރުގެ ކޭލެބް ވަނީ ފަސް ރަން މެޑަލް ހޯދައިފަ އެވެ. ކޭލެބް ބުނީ މިއީ ކުރިއަށް ހުރި މުބާރާތްތަކަށް ދާއިރު ކޮންފިޑެންސާ އެކު ވާދަކުރަން ލިބުނު ހިތްވަރެއް ކަމަށެވެ.
