އޮސްޓްރޭލިއާގެ ސަރުކާރުން ދިވެހި އަސްކަރިއްޔާއަށް ގާޑިއަން ކްލާސް ޕެޓްރޯލް ބޯޓަކާއި ހައިޑްރޮގްރަފީ ހެދުމަށް ބޭނުންވާ ސާމާނު ހަދިޔާކުރަން ނިންމައިފި އެވެ.
މިކަން އިއުލާނުކުރީ އޮސްޓްރޭލިއާގެ ޑިފެންސް މިނިސްޓަރު ރިޗާޑް މާލްސް އަދި ރާއްޖޭގެ ޑިފެންސް މިނިސްޓަރު ގައްސާން މައުމޫން ނެރުއްވި ޖޮއިންޓް ނޫސް ބަޔާނެއްގައި އެވެ. ރިޗާޑް މިހާރު ހުންނެވީ ރަސްމީ ދަތުރެއްގައި މާލޭގަ އެވެ.
ދެ ގައުމުގެ ޑިފެންސުން ނެރުނު ބަޔާނުގައި ބުނެފައިވަނީ އޮސްޓްރޭލިއާއިން ފަރުމާކޮށް އެ ގައުމުގައި ބަންނަ ގާޑިއަން ކްލާސް ޕެޓްރޯލް ބޯޓު، ދިވެހި އަސްކަރިއްޔާއަށް ހަދިޔާކުރަން ނިންމުމަކީ ދެ ގައުމުގެ ދެމެދު އޮތް ގުޅުން ދައްކުވައިދޭ ރަމްޒެއް ކަމަށެވެ.
މިއީ ރާއްޖެއިން ދިވެހި ކަނޑުތަކުގެ ސަލާމަތްތެރިކަން ބެލެހެއްޓުމަށް އަދި އިންޑިއާ ކަނޑުގެ ރައްކާތެރިކަމަށް ކަށަވަރުކުރުމަށް އެޅިގެންދާ ފިޔަވަޅެއް ކަމަށް ވެސް ބަޔާނުގައި ބުނެފައިވެ އެވެ. އަދި، ރާއްޖޭގެ ބޮޑު އިގުތިސޯދީ ސަރަހައްދުގައި ހިނގާ ގައިރު ގާނޫނީ ކަންކަން ހުއްޓުވުމަށް މިކަމުގެ ސަބަބުން އިތުރު ބާރެއް ލިބިގެންދާނެ ކަމަށް ދެ ގައުމުން ބުނެފައިވެ އެވެ.
ގާޑިއަން ކްލާސްގެ ބޯޓުތަކަކީ އޮސްޓަލް ޝިޕްސް އިން ބަންނަމުންދާ އެ ގައުމުގެ ކަނޑުގެ ސަލާމަތަށް ބޭނުންކުރާ ކުދި ބޯޓުތަކެކެވެ. ރާއްޖޭގެ އިތުރުން އޮސްޓްރޭލިއާއިން ވަނީ މީގެ ބޯޓުތަކެއް ފިޖީ، ޓޮންގާ، ޓިމޯ ލެސޭ ފަދަ ޖަޒީރާ ގައުމުތަކަށް ހަދިޔާކޮށްފަ އެވެ. ދިވެހި އަސްކަރިއްޔާއަށް އައު ބޯޓު ލިބޭނީ އަންނަ އަހަރު އެެވެ.
އޭގެ އިތުރުން އޮސްޓްރޭލިއާއިން ރާއްޖެއަށް ހަދިޔާކުރަން ނިންމާފައިވަނީ މަލްޓި ބީމް އެކޯ ސައުންޑާ އެކެވެ. މިއީ ހައިޑްރޮގްރަފީ ދިރާސާ ކުރުމަށް ބޭނުންކުރާ އާލާތެކެވެ. ދެ ގައުމުން ނެރުނު ބަޔާނުގައި ބުނެފައިވަނީ މި އެހީއާއެކު ރާއްޖެއިން އަމިއްލައަށް ދިވެހި ކަނޑުތަކުގެ އަޑި މެޕް ކުރުމުގެ ގާބިލުކަން ހޯދުމަށް މަގުފަހިވެގެންދާނެ ކަމަށެވެ.
މިދިޔަ ސަރުކާރުން ހައިޑްރޮގްރަފީގެ މަސައްކަތް ކުރީ އިންޑިއާގެ ސަރުކާރާއެކު ވެވުނު އެއްބަސްވުމެއްގެ ދަށުންނެވެ. ނަމަވެސް، ރާއްޖޭގެ ކަނޑުފަޅުތައް ދިރާސާކޮށް، ޗާޓު ހެދުން ފަދަ މަސައްކަތް ކުރުމަށް އެކުލަވާލި އެ އެއްބަސްވުން އައު ނުކޮށް އުވާލަން މި ސަރުކާރުން ނިންމި އެވެ.
ހައިޑްރޮގްރަފީ އެއްބަސްވުން އާ ނުކުރަން ނިންމި މައިގަނޑު މަގުސަދަކީ ދިވެހި ކަނޑުފަޅުގެ މައުލޫމާތަކީ "ހަމައެކަނި ދިވެހިންނަށް" އެނގޭ މައުލޫމާތަށް ހެދުން ކަމަށް އޭރު ސަރުކާރުން ބުންޏެވެ. އޭގެ ފަހުން ރައީސް މުހައްމަދު މުއިއްޒު ވަނީ އެކަން ކުރުމަށް ދިވެހި އަސްކަރިއްޔާގެ ގާބިލުކަން އިތުރުކުރާނެ ކަމަށް ވިދާޅުވެފަ އެވެ.
އެމްއެންޑީއެފުން ނޮވެމްބަރު، 2021، ގައި ހިއްސާކުރި މައުލޫމާތައް ބަލާއިރު، ހައިޑްރޯގްރަފީ އެއްބަސްވުމުގެ ދަށުން، އެ ސާވޭ ކުރުމަށް އެހީވެދީގެން، އެއްކުރެވޭ ޑޭޓާތަކުގެ މައްޗަށް ބިނާކޮށް ހަދާ ޗާޓުތައް ބޭރުގެ ފަރާތްތަކުގެ ވިއްކުމުގެ ހުއްދަ އިންޑިއާއަށް ލިބެ އެވެ.
ހައިޑްރޮގްރަފީ ސާމާނު ރާއްޖެއަށް ހަދިޔާ ކުރާނެ ސީދާ ތާރީހެއް ބަޔާނުގައި ބުނެފައެއް ނުވެ އެވެ. އަންނަ އަހަރު ހަދިޔާކުރާ ބޯޓުގެ މަރާމާތުގެ މަސައްކަތް ކުރުމަށް ޕްލޭނެއް އެކުލަވާލާފައިވާ ކަމަށް ދެ ގައުމުން ބުނެފައިވެ އެވެ.
