ޓޯކިޔޯ (އޮގަސްޓް 1) - ދުނިޔޭގައި ބޭއްވޭ އެންމެ ބޮޑު ކުޅިވަރު ހަރަކާތުން ރަން ވަނަ ހޯދާ އެތުލީޓުންނަށް އެކި ގައުމުތަކުގައި ބޮޑެތި އަދަދުތަކުން ފައިސާގެ އިނާމް ދެ އެވެ. އެ ގޮތުން އޮލިމްޕިކްސް އިން މެޑަލެއް ހޯދާ އެތުލީޓުންނަށް އެންމެ ބޮޑު ފައިސާގެ އިނާމެއް ދޭން ހުށަހަޅާފައިވާ ގައުމަކީ ސިންގަޕޫރެވެ.
މަޝްހޫރު މީޑިއާއެއް ކަމަށްވާ ސީއެންބީސީ އިން ތައްޔާރުކޮށްފައިވާ އޮލިމްޕިކްސްގެ މާލީ ރިޕޯޓްތަކުގައިވާ ގޮތުން ސިންގަޕޫރުން ރަން މެޑަލަކަށް 737،000 ޑޮލަރު ދެ އެވެ. އަދި ރިހި މެޑަލަކަށް 369،000 ޑޮލަރު ދޭން ނިންމާފައިވާއިރު، ލޯ މެޑަލަކަށް 184،000 ޑޮލަރު ދޭނެ އެވެ.
މެޑަލަށް ފައިސާގެ އިނާމް ދިނުމުގެ ލިސްޓުގެ ދެ ވަނައިގައި އޮތީ ކަޒަކްސްތާން އެވެ. ކަޒަކްސްތާނުން ރަން މެޑަލަކަށް 250،000 ޑޮލަރު ދޭއިރު، ރިހި މެޑަލަކަސް ވަނީ 150،000 ޑޮލަރު ދޭން ނިންމައިފަ އެވެ. އަދި ލޯ މެޑަލަކަށް 75000 ޑޮލަރު ދޭނެ އެވެ. އެމެރިކާ އިން ރަން މެޑަލަކަށް ދެނީ 37،500 ޑޮލަރެވެ. އަދި ރިހި މެޑަލަކަށް 22،500 ޑޮލަރު ދޭއިރު، ލޯ މެޑަލަކަށް 15،000 ޑޮލަރު ދޭ ގޮތަށް އޮވެ އެވެ.
މި ފަހަރުގެ އޮލިމްޕިކްސްގައި ފިލިޕީންސް އިން ވަނީ ރަން މެޑަލެއް ހޯދައިފަ އެވެ. މިއީ އެ ގައުމުގެ 97 އަހަރުވީ އޮލިމްޕިކްސް ތާރީހުގައި ހޯދި ފުރަތަމަ ރަން މެޑަލް އެވެ. ފިލިޕީންސަށް މި ތާރީހީ ކާމިޔާބީ ހޯދައިދިނީ ވެއިޓްލިފްޓަރު ހިޑިލީން ޑިއާޒް އެވެ. ފިލިޕީންސް ސަރުކާރުން ޑިއާޒަށް ދޭނީ 200،000 ޑޮލަރެވެ. ފިލިޕީންސް ސަރުކާރާއި ސަރުކާރުގެ ސްޕޯޓްސް ކޮމިޝަންގެ ފަރާތުން ޑިއާޒަށް ލިބޭ އިނާމް ފައިސާ އެއްކޮށްލުމުން ޖުމްލަ އެއްކޮށް 660،000 ޑޮލަރަށް އަރަ އެވެ.
ސީއެންބީސީގެ ލިސްޓުގައިވާ ގޮތުން އޮލިމްޕިކްސް އިން މެޑަލް ހޯދައިފިނަމަ އެންމެ ބޮޑު އިނާމް ފައިސާއެއް ދޭ ލިސްޓުގެ ކުރީގައި ގައުމުތަކަށް ބަލާއިރު، މެލޭޝިއާ، އިޓަލީ، ފިލިޕީންސް، ހަންގޭރީ، ބްރެޒިލް، ޖަޕާން، އެމެރިކާ، ދެކުނު އެފްރިކާ، ކެނަޑާ އަދި އޮސްޓްރޭލިއާ ހިމެނެ އެވެ.
މި ލިސްޓުގައި ރާއްޖޭގެ ނަން ނެތް ނަމަވެސް ނިސްބަތުން ބަލާއިރު، އޮލިމްޕިކްސްގެ މެޑަލަކަށް ރާއްޖޭން ވެސް ރަނގަޅު ފައިސާގެ އިނާމެއް ދޭ ގޮތަށް އުސޫލުތަކުގައި އޮވެ އެވެ. އެކަމަކު، ރާއްޖެ އަށް އޮލިމްޕިކްސް އިން މިހާތަނަށް މެޑަލެއް ލިބިފައިނުވާތީ، އެ ލިސްޓުގައި ރާއްޖެ ނުހިމެނެނީ ކަމަށް ބެލެވެ އެވެ.
ސީއެންބީސީން އެކުލަވާލާފައިވާ ފައިސާގެ އިނާމްތަކުގެ ތަފްސީލް.-- ފޮޓޯ: ސީއެންބީސީ
ރާއްޖޭން ދެނީ ކިހާ ވަރެއް؟
ބައިނަލްއަގުވާމީ މުބާރާތްތަކުން ރަން ވަނަ ހޯދާ އެތުލީޓުންނަށް ފައިސާގެ އިނާމް ދޭ އުސޫލެއް ރާއްޖޭގައި ވެސް އެކުލަވާލެވިފައި އޮވެ އެވެ. އެންމެ ފުރަަތަމަ އުސޫލެއް އެކުލަވާލީ މިދިޔަ ސަރުކާރުގަ އެވެ. އެއީ 2017 ވަނަ އަހަރުގެ ޖޫން މަސް ތެރޭގަ އެވެ. އޭގެ ފަހުން އިނާމް ފައިސާ ދޭނެ އުސޫލަށް ބަދަލު ގެންނަން މި ސަރުކާރުން މަޝްވަރާތަކެއް ކުރެވުނު ނަމަވެސް އަދި މިހާތަނަށް ބޮޑު ބަދަލެއް ގެނެސްފައިވާ ކަމުގެ މައުލޫމާތު ލިބިފައިނުވެ އެވެ. މި ސަރުކާރުން ވަނީ އެކި ކުޅިވަރު މުބާރާތްތަކުގައި މެޑަލް ހޯދި އެތުލީޓުންނަށް އިނާމް ފައިސާ ދީފަ އެވެ.
އެންމެ ފަހުން 2019 ވަނަ އަހަރު ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން އެންމެ ބޮޑު ކާމިޔާބެއް ހޯދި ގައުމީ ޓީޓީ ޓީމުގެ ކުޅުންތެރިންނަށް ޖުމްލަ 1.1 މިލިއަން ރުފިޔާ ލިބުނެވެ.
އޮލިމްޕިކްސް ފަދަ ބޮޑު ކުޅިވަރު މުބާރާތަކުން ރާއްޖެ އަށް މެޑަލް ލިބިއްޖެނަމަ ދޭ އިނާމް ފައިސާ އަށް އޮތީ މިހާތަނަށް ބަދަލެއް ނުގެނެސް އެވެ. އެ އުސޫލުގައިވާ ގޮތުން އޮލިމްޕިކްސްގެ ޓީމު އިވެންޓް ކުޅިވަރުތަކުގެ ބައިން ރަން މެޑަލް ހޯދައިފިނަމަ ކޮންމެ ކުޅުންތެރިއަކަށް 100،000 ރުފިޔާ ދޭނެ އެވެ. މިއީ ޑޮލަރުން ބަލާނަމަ 6485 ޑޮލަރެވެ. ޓީމު އިވެންޓް ބައިން ރިހި މެޑަލް ހޯދައިފިނަމަ ކޮންމެ ކުޅުންތެރިއަކަށް 75،000 ރުފިޔާ (4863 ޑޮލަރު) ދޭނެ އެވެ. އަދި ޓީމު އިވެންޓެއްގެ ކެޓަގަރީން ލޯ މެޑަލް ލިބިއްޖެނަމަ 50،000 ރުފިޔާ (3242 ޑޮލަރު)، ކޮންމެ ކުޅުންތެރިއަކަށް ލިބޭނެ އެވެ.
އޮލިމްޕިކްސްގެ އިންޑިވިޖުއަލް ކެޓަގަރީގެ ކުޅިވަރުތަކަށް ބަލާއިރު ރަން މެޑަލަކަށް 1،500،000 ރުފިޔާ (97،276 ޑޮލަރު) ލިބެ އެވެ. އިންޑިވިޖުއަލް ބައިން ރިހި މެޑަލަކަށް 1،000،000 ރުފިޔާ (64،850 ޑޮލަރު) ދޭ ގޮތަށް ހަމަޖެހިފައިވާއިރު، ލޯ މެޑަލަކަށް ދޭނީ 750،000 ރުފިޔާ (48،638 ޑޮލަރު) އެވެ.
ރާއްޖޭން މިހާތަނަށް އޮލިމްޕިކްސްގައި ވާދަކޮށްފައިވަނީ ކޮލިފައިން ޖާގަތަކުގެ ބަދަލުގައި އެހެން ގޮތްގޮތުން ލިބޭ ފުރުސަތުތަކުގަ އެވެ.
އޮލިމްޕިކްސް އަށް 2.5 ބިލިއަން ޑޮލަރުގެ އިންޝިއުރެންސް ޕެކޭޖެއް
މިދިޔަ އަހަރު ބާއްވަން އެންމެ ފުރަަތަމަ ތާވަލުކުރި އޮލިމްޕިކްސް ކޮވިޑް-19ގެ ސަަބަބުން މި އަހަރަށް ފަސްކުރި އެވެ. މި އަހަރު ވެސް އޮލިމްޕިކްސް ބޭއްވޭނެ ކަމާ މެދު ސުވާލު އުފެދޭ ފަދަ ހާލަތްތަކެއް ދިޔަ އެވެ. ޖަޕާނުގައި ކޮވިޑް-19ގެ ހާލަތު ވަރަށް ފަހަކާ ޖެހެންދެން ވެސް އޮތީ ވަރަށް ގޯސްކޮށެވެ.
އެކަމަކު، ސަލާމަތީ ފިޔަވަޅުތައް ވަރުގަދަ ކޮށްގެން، ސަޕޯޓަރުން ވެސް ނުވައްދައި، ގޭމްސް ކުރިއަށް ގެންދަން ނިންމީ މި އަހަރު ނުބޭއްވިއްޖެނަމަ މާލީ ގޮތުން ފޫނުބެއްދޭނެ ވަރުގެ ގެއްލުމަކާ ކުރިމަތިލާން ޖެހޭނެތީ އެވެ.
މި ފަހަރުގެ އޮލިމްޕިކްސްގެ އިންޝިއުރެންސް ޕެކޭޖްގެ އަގަަކީ 2.5 ބިލިއަން ޑޮލަރެވެ. މި ޕެކޭޖް ބެހިފައިވަނީ ތިން ބަޔަކަށެވެ. އެއީ އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އާއި ޓޯކިޔޯ އޮލިމްޕިކް ކޮމިޓީން ކުރާ ހަރަދުތަކުގެ އިންޝިއުރަންސްގެ ގޮތުގައި 1.4 ބިލިއަން ޑޮލަރާއި ބްރޮޑްކާސްޓަރުންނަށް ހާއްސަކޮށްފައިވާ 800 މިލިއަން ޑޮލަރުގެ އިތުރުން ޓީމުތަކާއި ސްޕޮންސަރުން އަދި ހޮސްޕިޓަލިޓީ (އެކޮމަޑޭޝަން) އަށް ހާއްސަކޮށްފައިވާ 300 މިިލިއަން ޑޮލަރެވެ.
ވަކިވަކި އެތުލީޓުންގެ އާމްދަނީ އަށް ބަލާއިރު، އިޝްތިހާރުގެ ޑީލްތަކުގެ ތެރެއިން ގިނަ ކުޅިވަރު ތަރިންނަށް ބޮޑެތި އަދަދުތަކުން އާމްދަނީ ލިބެ އެވެ. އެ ގޮތުން ޖަޕާނުގެ ޓެނިސް ތަރި ނައޯމީ އޮސާކާ އަށް އަހަރެއްގެ މައްޗަށް އިޝްތިހާރުތަކުން އެކަނި 55 މިލިއަން ޑޮލަރު ލިބޭ ކަމަށް ފޯބްސްގެ ތަފާސްހިސާބުތަކުން ދައްކަ އެވެ. ނައޯމީގެ އިޝްތިހާރު އާމްދަނީގެ ބޮޑު ބައެއް ހިއްސާކުރަނީ އޭޝިއާ މާކެޓުންނެވެ.
