ޓޯކިޔޯ (ޖުލައި 27) - ޓޯކިޔޯ އޮލިމްޕިކްސްގެ ޓެނިސް އިވެންޓުން ޖަޕާނުގެ މަޝްހޫރު ކުޅުންތެރިޔާ ނައޯމީ އޮސާކާ ކަޓައިފި އެވެ.
އޮލިމްޕިކްސްގެ ތިން ވަނަ ބުރުގައި މިއަދު ކުޅުނު މެޗުން ދުނިޔޭގެ 42 ވަނައިގައި އޮތް ޗެކް ރިޕަބްލިކްގެ މާކެޓާ ވޮންދްރޮސޯވާ އަތުން ނައޯމީ ބަލިވީ ގިނަ ގޯސްތަކެއް ހެދިގެންނެވެ. މެޗުގެ ސެޓުތައް ދިޔައީ 6-1، 6-4 އިންނެވެ.
މި މެޗުގެ ކުރިން ނައޯމީ ވަނީ ހާޑް ކޯޓުގައި ކުޅުނު 26 މެޗުން 25 މެޗު ކާމިޔާބުކޮށްފަ އެވެ.
ދުނިޔޭގެ ރޭންކިންގެ ދެ ވަނައިގައި އޮތް އުމުރުން 23 އަހަރުގެ ނައޯމީ ބުނީ މި ފަަހަރުގެ އޮލިމްޕިކްސް އަކީ އޭނާ އަށް ވަރަށް ބޮޑު ޕްރެޝަރުތަކެއް އޮތް މުބާރާތެއް ކަމަށާއި އެހެންވެ މެޗުގައި ގިނަ ގޯސްތަކެއް ހެދުނު ކަމަށެވެ.
"ވެދާނެ އަހަރެން މީގެ ކުރިން އޮލިމްޕިކްސް އެއްގައި ކުޅެފައި ނެތި މި ވަރުގެ ބޮޑު ޕްރެޝަރެއް ނަގައިގެން މި މުބާރާތުގައި ކުޅެން ޖެހުނީމަ ވީ ކަމެއް ކަމަށް. މިއީ އަހަރެންގެ ކުޅުން ނުދެއްކި މުބާރާތެއް ނިންމާލަން ޖެހުނު ފަހަރެއް،" މި ފަހަރުގެ އޮލިމްޕިކްސްގެ ހުޅުވި ރަސްމިއްޔާތުގައި ގޭމްސްގެ ދަންމަރު ދިއްލާލި ނައޯމީ ބުންޏެވެ.
ގައުމަށް ކާމިޔާބީ ހޯދައިދިނުމުގެ ޕްރެޝަރުގެ އިތުރުން ނައޯމީ އަށް އިތުރު ގޮންޖެހުމެއް ވެސް އޮތެވެ. މިއީ ފްރެންޗް އޯޕަން މެދުތެރެއިން އެ މުބާރާތުން ވަކިވެ، ވިމްބަލްޑަން ވެސް ނުކުޅެން ނިންމި ފަހުން ނައޯމީ މުބާރާތަކަށް ނުކުތް ފުރަތަމަ ފަހަރެވެ.
ފްރެންޗް އޯޕަން ކުރިން ނައޯމީ ބުނީ އޭނާ އެ މުބާރާތުގައި އެއްވެސް ނޫސްވެރިންގެ ބައްދަލުވުމެއްގައި ބައިވެރިނުވާނެ ކަމަށާއި އެއީ ނަފްސާނީ ދުޅަހެޔޮކަމަށް ވިސްނާފައި ނިންމި ނިންމުމެއް ކަމަށެވެ. އެއީ މީޑިއާގެ ޕްރެޝަރުތަކާ ހެދި އޭނާ ޑިޕްރެޝަރުގެ ޝިކާރައަކަށް ވަމުންދާތީ އެވެ.
ނޫސްވެރިންގެ ބައްދަލުވުންތައް ބޮއިކޮޓް ކުރަން ނައޯމީ ނިންމި ނިންމުމާ އެއްގޮތަށް އޭނާ އަމަލުކުރަން ފެށުމާ އެކު، ޓެނިހުގެ ހަތަރު ގްރޭންޑް ސްލޭމް މުބާރާތުން އޭނާ ސަސްޕެންޑްކުރަން ޖެހިދާނެ ކަމުގެ އިންޒާރު ދިނެވެ. އެކަން އެގޮތަށް ކުރިއަށްދިއުމާ ތަފާތު ފިއްތުންތަކާ ހެދި ނައޯމީ ފްރެންޗް އޯޕަން އިން ވަކިވީ އެވެ. އަދި އޭގެ ފަހުން ބޭއްވި ވިމްބަލްޑަންގައި ވެސް ނުކުޅެ އެވެ.
މިއަދުގެ މެޗަށް ފަހު ނައޯމީ ބުނީ ބްރޭކަކަށް ފަހު އެނބުރި އައިސް ކުޅެވުނު ފޯމާ މެދު ހިތްހަމަޖެހޭ ކަމަށާއި ދެން އޮތް މުބާރާތްތަކުގައި ރަނގަޅަށް ޕާފޯމް ކުރެވޭނެ ކަމުގެ އުއްމީދު އެބައޮތް ކަމަށެވެ.
ނައޯމީގެ މައްޗަށް ކުރިހޯދި ވޮންދްރޮސޯވާ ކުއާޓާ ފައިނަލުގައި ނުކުންނާނީ ސްޕެއިނުގެ ޕޯލާ ބަޑޯސާއާ ދެކޮޅަށެވެ.
