ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ބާރުގަދަ އެއްޗެއް ގޮއްވާލައި ދިން ހަމަލާއާ ގުޅިގެން އައްޑޫ ސިޓީން ވެސް މީހަކު މިއަދު ހައްޔަރުކޮށްފައިވާ ކަމަށް މައުލޫމާތު ލިބިއްޖެ އެވެ.
"އަދަދު"އަށް މައުލޫމާތު ލިބިފައިވާ ގޮތުގައި ހަމަލާ ދިނުމުގައި ބައިވެރިވާ ކަމުގެ ތުހުމަތަށް އައްޑޫ ސިޓީން ހައްޔަރުކޮށްފައިވަނީ ހއ. ހޯރަފުށީ، އަލަނާސިގޭ މުހައްމަދު ތަސްލީމެވެ.
އޭނާގެ މައްޗަށް ފުލުހުން ބޮޑެތި ތުހުމަތުތަކެއް ކުރެ އެވެ. އެގޮތުން ތަސްލީމަކީ ޓެރަރިސްޓް ހަމަލާ ރާވައި، އެކަމުގެ އިރުޝާދު ދިނުމުގައި އެންމެ އިސްކަން އުޅުނު މީހާ ކަމަށް ތަހުގީގަށް ހޯދިފައިވާ ކަމަށް ފުލުހުން ވަނީ ބުނެފަ އެވެ.
އައްޑޫ ސިޓީ މަރަދޫ މެޖިސްޓްރޭޓް ކޯޓުގެ ކޯޓު އަމުރެއްގެ ދަށުން 33 އަހަރު ތަސްލީމު ހައްޔަރުކޮށްފައިވަނީ ޓެރަރިޒަމްގެ ތުހުމަތާއެކު އެވެ. އަދި، އޭނާ ހައްޔަރުކުރަން ބޭނުންވާ ސަބަބެއް ކަމަށް އަމުރުގައި ބުނެފައިވަނީ ނަޝީދަށް ދިން ހަމަލާއާ ގުޅިގެން ތަސްލީމުގެ މައްޗަށް ކުރެވޭ ތުހުމަތުތަކާ ގުޅޭ ހެއްކަށް ނުފޫޒު ފޯރުވަދާނެތީ ކަމަށެވެ.
ނަމަވެސް، ނަޝީދަށް ދިން ހަމަލާއަށްފަހު ފުލުހުންނާއި ސިފައިން ހަރުކަށި ފިކުރާ ދެކޮޅަށް ހިންގި އޮޕަރޭޝަންގައި އައްޑޫ ސިޓީން ނުވަ މީހަކު ހައްޔަރުކުރި އެވެ. އެ މީހުންގެ ތެރެއިން ބައެއް މީހުން ފަހުން ދޫކޮށްލި އެވެ. އެކަމަކު، ހައިކޯޓުގެ އަމުރެއްގެ ދަށުން އަލުން ހައްޔަރުކުރި އެވެ.
އޭގެ ތެރެއިން އެކަކު ދޫކޮށްލުމަށް ސުޕްރީމް ކޯޓުން ހުކުމްކުރުމާއެކު، އާ ހެކިތަކާއެކު އެމީހާ ވެސް އަލުން ވަނީ ހައްޔަރުކޮށްފަ އެވެ.
ހަރުކަށި ފިކުރާ ދެކޮޅު އޮޕަރޭޝަނުގައި މާލެ އާއި ހުޅުމާލެއިން ވެސް ބަޔަކު ހައްޔަރުކުރި އެވެ. އޭގެ ތެރެއިން ތިން މީހެއްގެ މައްޗަށް މިހާރު ވަނީ ހަމަލާގައި ބައިވެރިވި ކަމުގެ ތުހުމަތުކޮށްފަ އެވެ. އޭގެ ތެރެއިން އެކަމަކީ މީގެކުރިން ފުލުހުން ވަނަވަރު ހާމަކޮށްފައިވާ އަލީ ހައިޝަމެވެ.
އަނެއް ދެ މީހުންނަކީ މި ނޫހަށް އެނގިފައިވާ ގޮތުގައި މ. ކުދެހިގެ އިސްހާގާއި ހ. ހިޔާކަން ފަހުމީ އަލީ އެވެ.
ހަމަލާއާ ގުޅިގެން ޖުމްލަ އަށް މީހަކު ފުލުހުންގެ ބެލުމުގެ ދަށުގައި ތިބިއިރު އޭގެ ތެރެއިން ހަތަރު މީހެއްގެ މައްޗަށް ދައުވާކުރުމަށް މިހާރު ވަނީ ފޮނުވާފަ އެވެ. އެއީ، ހަމަލާއާ ގުޅިގެން އެންމެ ފުރަތަމަ ހައްޔަރުކުރި އަހުމަދު އަދުހަމް، 25، އާއި މުޖާޒް އަހްމަދު 21، އާއި ތަހުމީން އަހްމަދު، 32 އަދި އަހުމަދު ފާތިހު، 23 ގެ މައްޗަށެވެ.
މީގެތެރެއިން މުޖާޒާއި ތަހުމީނު އަދި އަދުހަމް ވަނީ ޝަރީއަތް ނިމެންދެން ބަންދުކޮށްފަ އެވެ.
މިދިޔަ މެއި މަހުގެ ތެރޭގައި ނަޝީދަށް އަމާޒުކުރި ހަމަލާގައި އަމަލީ ގޮތުން އުޅުނު މީހުން ހައްޔަރުކޮށްފައިވާ ކަން ފުލުހުން ހާމަކުރުމާ އެކު ކަންބޮޑުވުމަކަށް ވީ ހަމަލާ ރާވައި ހިންގުމުގައި އަދި ހަރަދުކުރި ބަޔަކު ނުހޯދިދާނެ ކަމެވެ. އެކަމަކު, އެ ބަޔަކު ހޯދުމަކީ ތަހުގީގުގެ އިސް އަމާޒެއް ކަމަށް ފުލުހުން ވަނީ ބުނެފަ އެވެ.
އެ ތަހުގީގައި ފުލުހުން އަންނަނީ ބޭރުގެ މާހިރުންގެ ވެސް އެހީ ހޯދަމުންނެވެ.
