އެމެރިކާގެ މަޝްހޫރު "ޓައިމް" މަޖައްލާ އިން އެކުލަވާލި 2021 ވަނަ އަހަރު ދުނިޔޭގެ އެންމެ ވަރުގަދަ 100 މަންޒިލުގެ ލިސްޓުގައި ދިވެހިރާއްޖެ ހިމެނިއްޖެ އެވެ.
އަންނަ މަހު ނެރޭ ޓައިމް މަޖައްލާގެ ކަވާ ސްޓޯރީގައި ހަދާފައިވާ މި ލިސްޓުގައި ގައުމުތަކުގެ އިތުރުން ސަރަހައްދުތަކާއި ސިޓީތަކާއި އަވަށްތައް ހިމެނެ އެވެ. ލިސްޓް އެކުލަވާލީ، އާ އަދި ހިތްދަމައިގަންނަ ފަދަ ތަޖުރިބާތައް އޮފާކުރާ މަންޒިލުތަކަށް ހާއްސަ ނަޒަރެއް ދީގެން، ޓައިމްގެ ކޮރެސްޕޮންޑެންޓުންނާއި ކޮންޓްރިބިއުޓަރުންގެ ބައިނަލްއަގްވާމީ ނެޓްވޯކުން ނޮމިނޭޓްކުރި މަންޒިލުތަކުގެ ތެރެއިންނެވެ.
"މިދިޔަ ދޮޅު އަހަރުގެ ގޮންޖެހުންތަކުން އަހަރެމެންގެ ދުނިޔެ އެއްކޮށް ބަދަލުކޮށްލައިފި. އަދި ދަތުރުފަތުރާއި ޓޫރިޒަމް އަދި ހޮސްޕިޓަލިޓީ އަށް ވުރެ ބޮޑަށް އަސަރުކުރީ މަދު އިންޑަސްޓްރީތަކަކަށް،" އެ މަޖައްލާ އިން ބުނެފައިވެ އެވެ.
"ޓައިމް" އިން ބުނީ އެ މަޖައްލާގެ ތިން ވަނަ އަހަރީ މި ލިސްޓަކީ، އެ އިންޑަސްޓްރީތަކުގެ ކުރީގައި ތިބެ، އާދަޔާހިލާފު ހާލަތްތަކާ އެކު ވެސް، އަލުން ބިނާކޮށް ހާލަތާ ކުރިމަތިލައި އާ ކަންކަން ހޯދައިގަތް މީހުންނާއި ވިޔަފާރިތަކަށްދޭ ހަދިޔާއެއް ކަމަށެވެ.
ވަކި ތަރުތީބެއް ނެތް މި ލިސްޓުގައި ރާއްޖެއާ ބެހޭގޮތުން ބުނެފައިވަނީ، މި ގައުމަކީ ވެކްސިން ޖަހާފައިވާ މީހުންނަށް ކަރަންޓީނުވުމެއް ނެތި ޗުއްޓީ ހޭދަކުރުމުގެ ފުރުސަތު ހުޅުވާލި ފުރަތަމަ ގައުމު ކަމަށެވެ. އަދި އިތުރު މީހުން ޒިޔާރަތްކުރުވުމަށްޓަކައި، އާބާދީއެއް ވެކްސިން ޖަހައި ނިމުމުން ޓޫރިސްޓުންނަށް ވެކްސިން ދިނުމުގެ ޕްލޭނެއް ވެސް ރާއްޖޭގައި އޮތް ކަމަށް ބުނެފައިވެ އެވެ. ރާއްޖޭގައި ދާދި ފަހުން ހުޅުވި ފަރި އައިލެންޑްސް އަދި ވެލާ ޕްރައިވެޓް އައިލެންޑުގެ ވާހަކަ ހިމަނާފައިވާ އެ ބަޔާނުގައި، އަންނަ އަހަރު ރާއްޖޭގައި ތަރައްގީކުރަން ފަށާ ފްލޯޓިން ސިޓީގެ ވާހަކަ ވެސް އޮތެވެ.
މި ލިސްޓުގައި ހިމެނޭ ބައެއް އެހެން މަންޒިލްތައް:
އެންޓާޓިކާ، އަރޫކާ (ޕޯޗުގަލް)، އެތެންސް (ގްރީސް)، ބެންކޮކް (ތައިލެންޑް)، ގާހިރާ (މިސްރު)، ކޮސްޓަ ރީކާ، ދުބާއީ (ޔޫއޭއީ)، ގޮތެންބާގް (ސްވިޑެން)، ޖައިޕޫރް (އިންޑިއާ)، މަރަކޭޝް (މޮރޮކޯ)، މެޑްރިޑް (ސްޕެއިން)، ނިއު ޔޯކް ސިޓީ (ޔޫއެސްއޭ)، ޕެރިސް (ފްރާންސް)، ސިސިލީ (އިޓަލީ)، ސިންގަޕޫރު، ޒިއުރިކް (ސްވިޒަލެންޑް).
