ވެލާނާ އިންޓަނޭޝަނަލް އެއާޕޯޓަށް ފުރަންދިޔަ ޓޫރިސްޓެއްގެ އަތުން ވަޒަންތަކެއް ފެނުނު މައްސަލާގައި އެ މީހާ ހައްޔަރުކޮށް ދެ ފަހަރެއްގެ މަތިން ބަންދުގެ މުއްދަތު އިތުރު ކުރި ނަމަވެސް އެ ވަޒަން ރާއްޖެ އެތެރެވިގޮތް ކަމާ ބެހޭ އިދާރާއަކުން ބުނެ ނުދިނެވެ.
ވަޒަންތަކެއް ފެނުނީ މިދިޔަ ހަފްތާ ހޮނިހިރު ދުވަހު ހެނދުނު އެއާޕޯޓަށް ދިޔަ ޓޫރިސްޓެއްގެ ދަބަހުންނެވެ. އެއީ، އެފެރިކާގެ ގައުމެއް ކަމަށްވާ ނެމީބިއާއަށް ނިސްބަތްވާ 60 އަހަރުގެ ފިރިހެނެކެވެ. އެ ވަޒަންތައް ފެނުމާއެކު އޭނާއާ ސުވާލުކޮށް، ފުލުހުންގެ ބެލުމުގެ ދަށަށް ގެންދިޔަ އެވެ.
ފުރަތަމަ އޭނާގެ ބަންދަށް ވަނީ ތިން ދުވަސް އިތުރުކޮށްފަ އެވެ. އެ މުއްދަތު ހަމަވުމުން އަނެއްކާ ވެސް ހަތަރު ދުވަސް އޭނާގެ ބަންދަށް ބުރާސްފަތި ދުވަހު ވަނީ ޖަހައިފަ އެވެ.
ވަޒަންތައް ފެނުނީ ރާއްޖެއިން ފުރަންވެގެން އެ ޓޫރިސްޓު އެއާޕޯޓަށް ދިޔުމުން ކަމަށްވާތީ، އޭނާ ރާއްޖެ އެތެރެވީ ވެސް ވަޒަންތަކާއެކު ކަމަށް ބެލެވެ އެވެ.
އެކަމާ ގުޅޭގޮތުން ފުލުހުންނާއި ކަސްޓަމްސްގައި ތަކުރާރުކޮށް ސުވާލު ކުރުމުން ވެސް އެއްވެސް ޖަވާބެއް ނުދިނެވެ.
