އަތޮޅުތެރޭގައި ގެދޮރު އިމާރާތްކުރަން ބޭނުންވާ ފަރާތްތަކަށް ސަރުކާރުން ތައާރަފުކޮށްފައިވާ "ގެދޮރުވެރިޔާ" ލޯނަށް ތަރުހީބު ރަނގަޅުކަމަށް އެޗްޑީއެފްސީން ބުނެފި އެވެ.

ހައުސިން މިނިސްޓްރީ އަދި އެޗްޑީއެފްސީ ގުޅިގެން ހިންގާ ގެދޮރުވެރިޔާ ލޯން ސްކީމަކީ ރަށްރަށުގައި ދިރިއުޅޭ ފަރާތްތަކަށް ގެދޮރު އިމާރާތްކުރަން ދޫކުރާ ދިގު މުއްދަތުގެ އިންޓްރެސްޓް ކުޑަ ލޯނު ދޫކުރުމަށް ހިންގާ ގެދޮރުވެރިކަމުގެ ސްކީމެކެވެ.

މި ލޯނުގެ ތެރެއިން ގިނަވެގެން ހަތް ލައްކަ ރުފިޔާ ގެދޮރު އިމާރާތްކުރަން ނުވަތަ މަރާމާތުކުރަން ދޫކުރަން ސަރުކާރުން އޮތީ ނިންމައިފަ އެވެ.

މިދިޔަ މަހުގެ 14 ވަނަ ދުވަހު އިފްތިތާހުކުރި ސްކީމާ ގުޅޭގޮތުން މައުލޫމާތު ސާފުކުރަން މަސް ދުވަހުގެ ތެރޭގައި 1,500 އަށް ވުރެ ގިނަ މީހުން ގުޅާފައިވާ ކަމަށް އެޗްޑީއެފްސީން ބުނެ އެވެ.

އެޗްޑީއެފްސީގެ މީޑިއާ އޮފިޝަލް "އަދަދު"އަށް ވިދާޅުވި ގޮތުގައި އެ މުއްދަތުގެ ތެރޭގައި އެ ލޯނަށް 62 އެޕްލިކޭޝަން ލިބިފައި ވެ އެވެ.

"އެއީ ގާތްގަނޑަކަށް 39 މިލިއަން ރުފިޔާގެ އެޕްލިކޭޝަންތައް،" އޮފިޝަލް ވިދާޅުވި އެވެ.

ގެދޮރުވެރިޔާ ލޯންގެ ތަފްސީލް

• ލޯން ދޫކުރާނީ އަމިއްލަ ގޯތީގައި އަލަށް ގެއެއް އަޅަން ނުވަތަ ނުނިމި ހުރި މަސައްކަތްތައް ކުރަން.
• ހަދަން ފަށާފައި ނުނިމި ހުރި އިމާރާތަށް ބައެއް އިތުރުކުރަން ވެސް ލޯނަށް އެދެވިދާނެ.
• އެކަކަށް އެންމެ ގިނައިން ދޫކުރަން ނިންމާފައި ވަނީ 700,000ރ.
• 15 އަހަރަށް ބަހާލުމުން މަހަކު ދައްކަން ޖެހޭނީ 5,907ރ.
• 16 އަހަރަށް ބަހާލުމުން މަހަކު ދައްކަން ޖެހޭނީ 5,680ރ.
• 17 އަހަރަށް ބަހާލުމުން މަހަކު ޖެހޭނީ 5,485ރ.
• 18 އަހަރަށް ބަހާލުމުން މަހަކު ދައްކަން ޖެހޭނީ 5,307ރ.
• 19 އަހަރަށް ބަހާލުމުން މަހަކު ދައްކަން ޖެހޭނީ 5,153ރ.
• 20 އަހަރަށް ބަހާލުމުން މަހަކު ދައްކަން ޖެހޭނީ 5,015ރ.

މި ލޯނަށް އެދޭ މީހާގެ ނަންމަތީގައި އަމިއްލަ ބިމެއް ރަޖިސްޓްރީވެފައި އޮންނަން ޖެހެ އެވެ. އަދި އެ ބިން ލިބިފައިވާ ރަށުގެ ރަށްވެއްސަކަށް ވުމާއި އެ ރަށުގައި އާއިލާއެކު ދިރިއުޅޭތާ މަދުވެގެން ތިން އަހަރު ވެފައިވާން ޖެހެ އެވެ.

އޭގެ އިތުރުން އެޕްލިކޭޝަން ހުށަހެޅުމުގައި ގޯތީގެ ވެރިފަރާތުގެ އިތުރުން ޝަރުއީގޮތުން ވާރުތަވާ މަދުވެގެން އެކަކު ކޯއެޕްލިކަންޓެއްގެ ގޮތުގައި ބައިވެރިވާންޖެހެ އެވެ.

އެގޮތުން، އެޕްލިކޭޝަންތަކާއެކު ހުށަހަޅާ އައިޑީކާޑާއި އުފަންދުވަހުގެ އަދި ކައިވެނީގެ ސެޓްފިކެޓުތަކުގެ ސައްހަކަން ރަށު ކައުންސިލުތައް މެދުވެރިކޮށް ކަށަވަރުކުރަން ބައެއް ދަތިތައް ދިމާވަމުންދާކަމަށް އެޗްޑީއެފްސީން ބުންޏެވެ.

އޭގެ އިތުރުން އެޕްލިކޭޝަންތައް ހުށަހަޅާއިރު ލިޔެކިޔުންތައް ފުރިހަމަނުވާ މައްސަލަތައް ވެސް ފާހަގަވާކަމަށް ވެސް ބުނެފައި ވެ އެވެ.

ގެދޮރުވެރިޔާ ލޯނަކީ ހަ ޕަސެންޓް އިންޓްރެސްޓް ރޭޓުގައި މަހަކު ކުޑަ އިންސްޓޯލްމަންޓެއް ދައްކައިގެން 20 އަހަރު ދުވަހުން އަދާކުރަން ޖެހޭ ލޯނެކެވެ. މިއީ މިހާރު ރާއްޖޭގައި ހުރި ކޮމާޝަލް ބޭންކުތަކާއި މާލީ އިދާރާތަކުން ދޫކުރާ ހައުސިން ލޯނުތަކުގެ އިންޓްރެސްޓް ރޭޓަށް ވުރެ ގާތްގަނޑަކަށް ދެބައިކުޅަ އެއްބައި ކުޑަ އަދަދެކެވެ.

ނަމަވެސް، ހަތް ލައްކަ ރުފިޔާއަކީ ގެދޮރު އިމާރާތްކުރަން އެކަށީގެންވާ އަދަދެއް ނޫން ކަމަށް ބުނެ ގިނަ ބަޔަކު ދަނީ ޝަކުވާ ކުރަމުންނެވެ.

އެއާއެކު އެ އަދަދު އިތުރުކުރަން ވިސްނަމުންދާކަމަށް ރައީސް އިބްރާހިމް މުހައްމަދު ސޯލިހު ދާދި ފަހުން ވަނީ ވިދާޅުވެފަ އެވެ.