ސިޔާސީ ގޮތުން އެއްވެސް ބުރަދަނެއް ނެތް ސިޔާސީ ޕާޓީތަކަށް ދޫ ދީގެން، އެމްޑީޕީގެ އަސާސްތަކާ ހިލާފަށް ދީނީ ހައްދުފަހަނައެޅުމަށް ދީލައިލަން ބަލައިނުގަނެނެވޭތީ، މި ސަރުކާރަށް ތާއީދުކުރަން ދަތިކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މުޅި ދުނިޔެއަށް ރަސްމީކޮށް މިއަދު އިއުލާނުކުރައްވައިފި އެވެ.
ރައީސް އިބްރާހިމް މުހައްމަދު ސޯލިހްއާ ދެމެދު އެއްވެސް މައްސަލައެއް ނެތް ކަމަށާއި އެކަމަކު އެމަނިކުފާނާ އެކު ސިޔާސީ ގޮތުން ދެން ހުންނެވެން ނެތް ކަމަށް ނަޝީދު ވިދާޅުވެފައިވަނިކޮށް މިއަދު އިނގިރޭސި ބަހުން ނެރުއްވި ބަޔާނެއްގައި ވެސް ވަނީ ސަރުކާރަށް ބޮޑެތި ފާޑުކިޔުންތައް އަމާޒުކުރައްވައިފަ އެވެ.
ނަޝީދު ވިދާޅުވި ގޮތުގައި 2018 ވަނަ އަހަރު އެމްޑީޕީން ރިޔާސީ އިންތިހާބު ކާމިޔާބުކުރީ ކޯލިޝަނެއްގެ އެހީތެރިކަމާއެކު ކަމަށެވެ.
ނަމަވެސް، ކޯލިޝަނުގައި ހިމެނޭ އަދާލަތު ޕާޓީގެ ނަން ވަކިން ފާހަގަކުރައްވައި ނަޝީދު ވިދާޅުވީ ސަރުކާރުގެ ހުރިހާ ނިންމުތަކަކަށް ނުފޫޒު ފޯރުވަން ރައީސް ސޯލިހު ފުރުސަތު ދެއްވުމުގެ ސަބަބުން މުޅި ކޯލިޝަނުން ގަބޫލުކުރާ ޑިކޮމްރެޓިކް އަސާސްތައް މުގުރާލާފައިވާ ކަމަށެވެ.
ނަޝީދު ވިދާޅުވީ އެމްޑީޕީގެ ލީޑާޝިޕުން ބޭނުންވަނީ ކޯލިޝަން ދަމަހައްޓަން ޑިޕްލޮމަސީ އާއި ދޫދިނުން އެކަންޏެއް ނޫން ކަމަށާއި، ރައްޔިތުން ބޭނުންވާ އިގުތިސޯދީ ކުރިއެރުމާއި، މިނިވަންކަމާއި ހަމަހަމަކަން ދެމެހެއްޓުމުގެ ހިތްވަރު ވެސް ބޭނުންވާ ކަމަށެވެ.
އެގޮތުން، މި ފަހުން ސަރުކާރުން ހުށަހެޅި ނަފްރަތު އުފެއްދުން ހުއްޓުވުމުގެ ބިލާ ގުޅޭގޮތުން ކަން ހިނގައިދިޔަ ގޮތް ނަޝީދު ހާއްސަކޮށް ފާހަގަކުރެއްވި އެވެ.
ނަޝީދު ވިދާޅުވި ގޮތުގައި ދީނާ ގުޅުވައިގެން ނަފްރަތު އުފެއްދުން ކުށަކަށް ހަދަން ގާނޫނުލްއުގޫބާތު އިސްލާހުކުރަން ސަރުކާރުން މަޖިލީހަށް ހުށަހެޅީ ކުރިން ހިނގާފައިވާ ޑރ. އަފްރާޝީމް އަލީ، ޔާމީން ރަޝީދު އަދި އަހުމަދު ރިލްވާން އަނިޔާވެރިކޮށް މަރާލުމުގެ އިތުރުން އެމަނިކުފާނު ވެސް އަވަހާރަކޮށްލަން ދިން ޓެރަރިސްޓު ހަމަލާގެ ފަހަތުގައި އޮތީ މީހުން ކާފަރެއްގެ ގޮތުގައި ސިފަކޮށް އެބަޔެއްގެ ލޭ ހުއްދަކުރުން ކަމަށް ވިސްނިގެން ކަމަށެވެ.
ނަމަވެސް، އަދާލަތު ޕާޓީން އިސްވެ އެ ބިލާ ދެކޮޅު ހެދުމުން، ސަރުކާރުން އަމިއްލަ ހުށަހެޅި ބިލަށް ކުރި ތާއީދު އަނބުރާ ގެންދިޔައީ، ސަރުކާރުގެ ތެރޭގައި ތިއްބެވި ބޭފުޅުންނާ މެދު ވެސް ނަފުރަތު އުފައްދައި، ހަމަ އެފަދަ ނުރައްކާތެރިކަމަށް ހުށަހެޅިދާނެތީ ކަމަށް ނަޝީދު ތުހުމަތު ކުރެއްވި އެވެ.
"އެހެންކަމުން މި ބިލަށް ތާއީދުކޮށް، ގަބޫލުކުރާ ހަމަތަކުގެ މަތީގައި ސާބިތުވެ ތިބުމުގެ ލީޑާޝިޕް މި ސަރުކާރަށް ނުދެއްކޭނަމަ، އަޅުގަނޑަށް މި ސަރުކާރަށް ތާއީދުކުރަން ވަރަށް ދަތި،" ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި ބިރު ގަނެގެން، ޑިމޮކްރެޓިކް ވެރިކަމާއި ގައުމުގެ މުސްތަގުބަލުގެ ލަގަނު، ސިޔާސީ މާބޮޑު ބުރަދަނެއްނެތް އަދި ގިނަ ރައްޔިތުންގެ ތާއީދު ނެތް ކުޑަ ޕާޓީއެއްގެ އަތް މައްޗަށް އެއްވެސް ހާލެއްގައި ދޫކޮށްލައިގެން ނުވާނެ އެވެ.
"ރައްޔިތުންނާއެކު ވި އިޖުތިމާއީ އެއްބަސްވުމާއި އެމްޑީޕީގެ އެންމެ އަސާސީ މިންގަނޑުތައް ހިފެހެއްޓުމަށް ރައްޔިތުން އިންތިހާބު ކުރި ލީޑަރުންނަށް ޑިމޮކްރެޓިކް ހަމަތަކާއި، ގާނޫނުއަސާސީން ލާޒިމުކުރޭ،" ނަޝީދު ވިދާޅުވި އެވެ.
ނަޝީދާއި ރައީސް ސޯލިހާ ދެމެދު ސިޔާސީ ހިޔާލުތަފާތުވުން ބޮޑުވެފައިވާ ތަން ފެންނަން ފެށީ، ބަރުލަމާނީ ނިޒާމުގެ ވާހަކަތަކުންނެވެ. ނަޝީދު ވަނީ އެމަނިކުފާނު ބޮޑުވަޒީރަކަށް ވެވަޑައިގަތުމުގެ ފުރުސަތު ދެއްވަން ރައީސް ސޯލިހްގެ އަރިހުން އެދިވަޑައިގެންފަ އެވެ. އެކަމަކު ނިޒާމް ބަދަލުކުރުމަކީ ރައްޔިތުންގެ އަތްމަތީގައި އޮތް ކަމެއް ކަމަށް ތަކުރާރުކޮށް ރައީސް ސޯލިހް ވަނީ ވިދާޅުވެފަ އެވެ.
މި ފަހުން، މަޖިލީހުން ކުރިއަސް ގެންދިޔަ "އާސްކް ސްޕީކާ"ގެ ޕްރޮގްރާމްގައި އިނގިރޭސި ވިލާތުގައި ހުންނަވައި ވާހަކަފުޅު ދައްކަވަމުން ވެސް ނަޝީދު ވަނީ ބަރުލަމާނީ ނިޒާމް ގެންނަވާނެ ކަމަށް ވިދާޅުވެ ވާހަކަފުޅު ދައްކަވައިފަ އެވެ. އެމަނިކުފާނު ވިދާޅުވީ 2023 ވަނަ އަހަރުގެ ރިޔާސީ އިންތިހާބަށް އެމްޑީޕީގެ ޕްރައިމަރީ ބާއްވާނަމަ، އެ އިންތިހާބުގައި އެމަނިކުފާނު ވާދަ ކުރައްވާނެ ކަމަށެވެ.
"އެމްޑީޕީގެ ޕްރައިމަރީގައި އަޅުގަނޑު ބައިވެރިވާނަން، އަޅުގަނޑު މި ހުރީ އެ ޕްރައިމަރީގައި ބައިވެރިވެވޭ ގޮތަށް،" ނަޝީދު ވިދާޅުވި އެވެ.
ނަމަވެސް، 2023 ވަނަ ރިޔާސީ އިންތިހާބެއް އޮންނާނެ ކަމަކަށް އެމަނިކުފާނު ގަބޫލެއް ނުކުރައްވަ އެވެ.
ނަޝީދު ވިދާޅުވެފައިވާ ގޮތުގައި، ރާއްޖޭގެ ވެރިކަމުގެ ނިޒާމް 2023 ވަނަ އަހަރު ބަރުލަމާނީ ނިޒާމަކަށް ބަދަލު ކުރެވޭނެ ކަމަށާއި އޭގެފަހުން، ރައްޔިތުންގެ މަޖިލީހުގެ ތެރެއިން ސަރުކާރު އެކުލަވާލާނެ އެވެ.
އެކަމަށްޓަކައި އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމާއެކު މަސައްކަތް ކުރައްވަން ތައްޔާރަށް ހުންނެވިކަމަށް ނަޝީދު މިފަހުން ވަނީ ވިދާޅުވެފަ އެވެ.
