އެފްއޭއެމުން، 2023/2024 ވަނަ އަހަރު ދިވެހި ޕްރިމިއާ ލީގު މުޅި ރާއްޖެ އަށް ފުޅާކުރުމުގެ މަސައްކަތުގެ ތެރެއިން އަތޮޅުތަކަށް ހާއްސަކޮށްގެން ވަރަށް ގިނަ ކޯޗުންނާއި ރެފްރީން އަދި މެޗު ކޮމިޝަނަރުން ތަމްރީން ކުރާނެ ކަމަށް ބުނެފި އެވެ.
ބުރާސްފަތި ދުވަހު ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގައި އެފްއޭއެމްގެ ރައީސް ބައްސާމް އަދީލް ޖަލީލާއި އެ އެސޯސިއޭޝަންގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) އަދި ލީގުގެ ކޮންސަލްޓަންޓެއްގެ ގޮތުގައި މަސައްކަތްކުރާ ކޯޗު މުހައްމަދު އާދަމް ވަނީ ލީގުގެ ކަންތައްތައް ވަރަށް ތަފްސީލްކޮށް ކިޔައިދީފަ އެވެ.
އެފްއޭއެމްގެ ރައީސް ބައްސާމް ވިދާޅުވީ މި ލީގުގެ މަސައްކަތަކީ ހަގީގަތުގައި ކުޑަ ކަމެއް ނޫން ކަމަށާއި ވަރަށް ބޮޑު ކަމެއް ކަމަށެވެ. އެއީ މި ލީގު ބޭއްވުުމުގެ މަސައްކަތާ އެކީގައި ބައިވަރު ކަންތައްތަކެއް އެފްއޭއެމުން ކުރަން ޖެހޭކަން ބައްސާމް ފާހަގަކުރެއްވި އެވެ.
"އޭގެ ތެރޭގައި އަޅުގަނޑުމެން ވަރަށް ބައިވަރު ކޯޗުން ތަމްރީންކުރަން ޖެހޭ. ވަރަށް ބައިވަރު ރެފްރީން އުފައްދަންޖެހޭ. ވަރަށް ބައިވަރު މެޗު ކޮމިޝަނަރުން އަންނަން ޖެހޭ. ދަނޑުތައް ބަލަހައްްޓާނެ ފަރާތެއް އެބަ އަންނަން ޖެހޭ. އެ ގޮތަށް ގޮސް ވަރަށް ބައިވަރު މޭން ޕަވާ (މީހުން އެކި ކަންކަމަށް) މި އަށް (ލީގަށް) ބޭނުންވޭ،" ބައްސާމް ވިދާޅުވި އެވެ.
އޭނާ ވިދާޅުވީ އެފްއޭއެމުން މިހާރު އެކުލަވާލާފައިވާ ލީގުގެ ޕްލޭންތަކުގެ ތެރޭގައި ހުރިހާ ކަމެއް ރޭވިފައި އެބަހުރި ކަމަށާއި ކުރިއަށް އޮތް އީދާއި ޖުލައި 26 ބަންދަށް ފަހު އޮގަސްޓް މަހުގެ ތެރޭގައި ލީގުގެ އެކި ކަންކަމާ ގުޅޭ މީހުން ތަމްރީން ކުރުމުގެ މަސައްކަތްތަށް ފެށިގެންދާނެ ކަމަށެވެ.
އެފްއޭއެމްގެ މިދިޔަ ދައުރު ފެށިގެން ވަނީ ކޯޗުން ތަމްރީންކުރުމާއި މެޗު ކޮމިޝަނަރުން އުފެއްދުމުގެ އެކި ޕްރޮގްރާމްތައް ކުރިއަށް ގެންގޮސްފަ އެވެ. މާލޭގެ އިތުރުން ރާއްޖޭގެ އެކި ރަށްރަށުގައި ވެސް އޭގެ މަސައްކަތްތަކެއް ކުރެވުނެވެ.
ރާއްޖެ އަށް ލީގު ފުޅާކޮށްގެން ބޭއްވޭއިރު، ލީގުގެ ފޯމެޓްގައިވާ ގޮތުން ރާއްޖެ ބަހާލާނީ ހަތަރު ޒޯނަކަށެވެ. ކޮންމެ ޒޯނެއްގައި ވަކިން އޯޕަން ޑިވިޝަނަކާއި ތިން ވަނަ ޑިވިޝަން، ދެ ވަނަ ޑިވިޝަން އަދި އެއް ވަނަ ޑިވިޝަނެއް އޮންނާނެ އެވެ.
ބައްސާމް ވިދާޅުވީ 2023/2024 ގެ ލީގުގެ ފުރަތަމަ މަސައްކަތްތައް މި އަހަރު ފަށަން ޖެހޭ ކަމަށެވެ. އަދި އެކަން ފަސޭހަގޮތަކަށް ކުރުމުގެ ގޮތުން ކޮންމެ ބައެއް (ޑިވިޝަނެއް) ގެންދާނީ ވަކިން ކަމަށް ވިދާޅުވި އެވެ.
"އެއް ފަހަރާ ހުރިހާ ކަމެއް އެއް ވަގުތެއްގައި ކުރިއަށް ގެންދަންވެއްޖިއްޔާ ވާނީ އުނދަގޫ ކަމަކަށް. އެކަމަކު ލީގު ފަށައިގެން ކުރިއަށް ގެންގޮސް ކުރިއަށް އޮތް ދެތިން އަހަރަކަށް ދާއިރު ހަމަ އެއް ފަހަރާ މި ލީގުތަކެއް ކުޅެވިގެންދާނެ،" ބައްސާމް ވިދާޅުވި އެވެ.
ލީގުގެ ޒޯން ބުރުގެ ޑިވިޝަންތަކުގެ މެޗުތައް ކުޅޭނީ ސެންޓްރަލައިޒް ދަނޑުތަކެއްގަ އެވެ. ހޯމް އެންޑް އަވޭ އުސޫލުން މެޗުތައް ކުޅޭނީ ޕްރިމިއާ ލީގުގަ އެވެ. ކޮންމެ ޒޯނެއްގެ ޗެމްޕިއަން ޕްރިމިއާ ލީގަށް ހޮވޭނެ އެވެ.
އެފްއޭއެމުން ބުނީ ލީގު ފަށާއިރު ވެސް ކޮންމެ ޒޯނެއްގައި ރީޖަނަލް އޮފީހެއް ހުންނާނެ ކަމަށެވެ. އެންމެ ފުރަތަަމަ ލީގުގެ އިންތިޒާމްތައް ކުރިއަށްގެންދާނީ އެފްއޭއެމާއި އެ ޒޯން އޮފީހެއް ގުޅިގެންނެވެ. ޒޯން އޮފީހުން ކަންތައްތައް ދަސްކޮށް އެކަމަށް ފަރިތަވާ މިންވަރަށް ބެލުމަށް ފަހު މުސްތަގުބަލުގައި ޒޯން ލީގު އިންތިޒާމް ކުރުމުގެ ފުރިހަމަ ބާރު ޒޯން އޮފީހަށް ދޭނެ އެވެ.
ބައްސާމް ވިދާޅުވީ މުސްތަގުބަލުގައި އެ ގޮތަށް ޒޯން އޮފީހެއްގެ ދަށަށް ލީގުތައް އިންތިޒާމްކުރުން ދޫކޮށްލަން ޖެހޭ ސަބަބެއް އެބައޮތް ކަމަށެވެ. އެއީ މުޅި ދިވެހި ޕްރިމިއާ ލީގު ކުރިއަށް ގެންދާނީ ހާއްސަ ބޯޑެއްގެ ބެލުމުގެ ދަށުން ކަމަށާއި އެއީ ހަގީގަތުގައި އެކަން ވާން ޖެހޭ ގޮތްކަމަށް ފެންނާތީ ކަމަށް ބައްސާމް ވިދާޅުވި އެވެ.
"މުޅި ލީގު ވަކި ބޯޑެއްގެ ދަށަށް ދާން ޖެހޭ. އެކަމަށް ޑެޑިކޭޓެޑް ހާއްސަ ބަޔަކު ތިބެގެން އެކަން ކުރުން އެންމެ ރަނގަޅީ. އެފްއޭއެމަށް އޮންނަން ޖެހޭނެ ކަމަކީ މުޅި ފުޓްބޯޅައިގެ ޑިވެލޮޕްމަންޓް މަސައްކަތާއި ގައުމީ ޓީމާ ގުޅޭ ކަންކަން ކުރުން،" ބައްސާމް ވިދާޅުވި އެވެ.
ދިވެހި ފުޓްބޯޅައިގެ އެންމެ ބޮޑު ލީގުގެ ފޯމެޓަށް ބޮޑު ބަދަލެއް ގެންނަން ނިންމާފައިވާއިރު، އެ މަސައްކަތުގެ ތެރެއިން އެފްއޭއެމުން ވަނީ ފުޓްބޯޅަ ކޯޗުންނާއި ކުޅިވަރާ ބެހޭ އެގި ވުޒާރާތަކުގެ ވެރިންނާ ބައްދަލުކޮށް ހިޔާލު ހޯދައިފަ އެވެ.
