ރައީސް އިބްރާހިމް މުހައްމަދު ސޯލިހު ކުޅުދުއްފުށީ ސިޓީއަށް ވަޑައިގެންނެވުމުން އިދިކޮޅު، ޕީޕީއެމްއިން އަޑުއުފުލައިފި އެވެ.
ކުޅުދުއްފުށީ ސިޓީއަށް ރައީސް ސޯލިހު މިއަދު ހަވީރު ވަޑައިގެންނެވިއިރު އެ ސިޓީގެ އެއާޕޯޓް ސަރަހައްދުގައި ޕީޕީއެމްއަށް ނިސްބަތްވާ ބަޔަކު އަޑުގަދަކުރާއިން އަޑުއުފުލަމުން ދިޔަ އެވެ.
އެއާޕޯޓް ސަރަހައްދުގައި ޕީޕީއެމްއަށް ނިސްބަތްވާ މީހުން އެކަން ކުރަމުންދިޔައީ އެ ހަރަކާތް ނުބޭއްވުމަށް ފުލުހުން އަންގާފައިވަނިކޮށެވެ. އަދި، ހަރަކާތް ފެށުމުން ވެސް އެކަމަށް ފުލުހުން ހުރަސްއަޅާފައިވެ އެވެ.
ނަމަވެސް، ހިޔާލުފާޅުކުރުމުގެ މިނިވަންކަމާއި ސިޔާސީ ހަރަކާތް ހިންގޭނެ ކަމަށް ބުނަމުން އެމީހުން އަޑުގަދަކުރާ ބޭނުންކޮށްގެން އެއާޕޯޓް ސަރަހައްދުގައި އެމީހުން ހަރަކާތް ކުރިއަށް ގެންދިޔައީ އެވެ.
ރައީސް ސޯލިހު، އެއާޕޯޓުން ކާރުކޮޅަށް އަރާވަޑައިގަންނަވަން ވަޑައިގެންނެވިއިރު، އެމަނިކުފާނުގެ އިސްތިއުފާއަށް އަޑުގަދަކުރާއިން ގޮވި އެވެ. އަދި، ކުރީގެ ރައީސް އަބްދުﷲ ޔާމީން މިނިވަންކުރުމަށް ވެސް ގޮވާލަމުން ދިޔަ އެވެ.
ކާރުކޮޅަށް އަރާވަޑައިގަންނަވަން ރައީސް ވަޑައިގެންނެވިއިރު، އިދިކޮޅުން އުފުލަމުންދިޔަ އަޑުތަކަށް ސަމާލުކަން ދެއްވާފައެއް ނުވެ އެވެ.
އެއާޕޯޓުން ރައީސް ސޯލިހުގެ ދެކަނބަލުންނަށް މަރުހަބާ ދެންނެވުމަށް ވަޑައިގެން ތިއްބެވީ ސިޓީގެ އިދާރާތަކުގެ ވެރިންނެވެ. ކޮވިޑްގެ ހާލަތު އޮތް ގޮތުން ރައީސަށް މަރުހަބާ ދެންނެވުމަށް ގިނަ ބަޔަކު އެއްވެ ހަރަކާތްތައް ނުހިނގަން ރައީސް އޮފީހުން ވަނީ އަންގާފަ އެވެ.
މިއީ ކުޅުދުއްފުށި، ސިޓީއަކަށް ބަދަލުވި ފަހުން ރައީސް ސޯލިހު އެ ސިޓީއަށް ކުރައްވާ ފުރަތަމަ ދަތުރުފުޅެވެ. އަދި، ކުޅުދުއްފުށީ އެއާޕޯޓަށް ވެސް ރައީސް ކުރެއްވި ފުރަތަމަ ދަތުރުފުޅެވެ.
ކުޅުދުއްފުށީގައި މި ސަރުކާރުން އެންމެ އިސްކަމެއް ދީގެން ކުރިއަށް ގެންދަނީ އެ ސިޓީގެ ހޮސްޕިޓަލްގެ ހިދުމަތް ރަނގަޅު ކުރުމުގެ މަސައްކަތްތަކެވެ. އަދި، ކުޅުދުއްފުށީ ސިޓީގައި ޓާޝަރީ ހޮސްޕިޓަލެއް ވެސް އަޅަން މި ސަރުކާރުން ވަނީ ނިންމާފަ އެވެ.
މި ދަތުރުފުޅުގައި ކުޅުދުއްފުށީ ސިޓީގެ ހޮސްޕިޓަލަށް ރައީސް ސޯލިހު ޒިޔާރަތް ކުރައްވައި، އެތަނުގައި ކުރިއަށްދާ މަސައްކަތްތައް ބައްލަވާލައްވާނެ އެވެ. އަދި، އެ ސިޓީ ބައެއް އެހެން ތަންތަނަށް ވެސް ޒިޔާރަތް ކުރެއްވުމަށް ހަމަޖެހިފައިވެ އެވެ.
ކޮވިޑުގެ ސަބަބުން އަތޮޅު ތެރެއަށް ކުރައްވާ ދަތުރުފުޅުތައް މަޑުޖައްސަވާލެއްވުމަށްފަހު، ރައީސްގެ މި ދަތުރުފުޅުގައި ވަޑައިގަންނަވަނީ ކުޅުދުއްފުށީގެ އިތުރުން ހދ. ހަނިމާދޫ އަދި ކުމުންދޫއަށެވެ.
ތިން ދުވަހުގެ މި ދަތުރުފުޅުގައި އެ ތިން ރަށުގެ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީއާ ރައީސް ބައްދަލު ކުރައްވާނެ އެވެ. އަދި އެ ރަށްރަށުގެ ސަރުކާރު މުއައްސަސާތަކަށް ވެސް ޒިޔާރަތް ކުރެއްވުމަށް ވަނީ ނިންމަވައިފަ އެވެ.
